InfoHub Logo

قازاقستاننىڭ الەۋمەتتىك جەلىلەرىندە «اسكەردەن بوساتۋ» نەمەسە «اق بيلەت» الۋعا كومەكتەسەتىن قىزمەتتەر تۋرالى جارنامالار بەلسەندى تۇردە تاراتىلۋدا. بۇل جاعدايعا بايلانىستى قورعانىس مينيسترلىگى ازاماتتاردى مۇنداي جالعان ۋادەلەرگە سەنبەۋگە شاقىردى.

مينيسترلىكتىڭ مالىمەتىنشە، اسكەرگە شاقىرۋدان كەيىن مەرزىمىن ۇزارتۋ نەمەسە بوساتۋ تۋرالى شەشىمدى تەك قازاقستان زاڭناماسىنا سايكەس، ارنايى شاقىرۋ كوميسسياسى عانا قابىلدايدى.

بۇل تۋرالى Infohub.kz اقپارات اگەنتتىگى حابارلايدى.

زاڭسىز ارەكەتتەردىڭ سالدارى

مينيسترلىك زاڭگەرلىك كەڭەس بەرۋ قىزمەتتەرىنىڭ زاڭدى ەكەنىن اتاپ ءوتتى. الايدا، مەديسينالىق قۇجاتتاردى قولدان جاساۋ، جالعان دياگنوزداردى راسىمدەۋ نەمەسە قىزمەتتەن زاڭسىز جالتارماق بولعان جاعدايلار قىلمىستىق جاۋاپكەرشىلىككە اكەپ سوعادى. بۇل جاۋاپكەرشىلىك تەك دەلدالدارعا عانا ەمەس، اسكەرگە شاقىرىلۋشىلارعا دا قاتىستى.

«اسكەري ءبولىم كومەكشىلەرىنە» سەنبەڭىز

قورعانىس مينيسترلىگى ازاماتتاردى «اسكەري بولىمدەردىڭ كومەكشىلەرى» دەپ اتالاتىن تۇلعالاردىڭ جالعان سحەمالارىنا قاتىسپاۋعا شاقىرادى. بۇل ادامدار اسكەري بولىمدەر نەمەسە مەديسينالىق كوميسسيالار ارقىلى «ماسەلەنى شەشۋگە» كەپىلدىك بەرەمىز دەپ، ازاماتتاردى الداپ سوعۋدا.

اسكەردەگى ارتىقشىلىقتار

مينيسترلىك اسكەردەگى قىزمەتتىڭ ءار ازاماتتىڭ كونستيتۋسيالىق بورىشى ەكەنىن ەسكە سالدى. سونداي-اق، بۇل – ءتارتىپتى، جاۋاپكەرشىلىكتى جانە ەرلىكتى ۇيرەتەتىن مەكتەپ. مەرزىمدى اسكەري قىزمەتتى وتەۋ كەزىندە ءبىلىم بەرۋ جەڭىلدىكتەرى مەن گرانتتار الۋ، كاسىبي داعدىلاردى يگەرۋ، دەنە شىنىقتىرۋدى جاقسارتۋ سياقتى ناقتى مۇمكىندىكتەر بەرىلەدى.

قىزمەت كەزىندە جانە ودان كەيىن ەكى اي بويى اسكەري قىزمەتشىلەر ءۇشىن نەسيەلىك دەمالىس قاراستىرىلعان. قىزمەتىن وتەگەن ازاماتتارعا جوعارى وقۋ ورىندارىنا ستۋدەنتتەر جاتاقحاناسىنان ورىن الۋدا باسىمدىق قۇقىعى بەرىلەدى. سونىمەن قاتار، ۇبت تاپسىرماي-اق جوعارى وقۋ ورنىنا گرانتپەن وقۋ مۇمكىندىگى بار. قازىرگى تاڭدا مەرزىمدى اسكەري قىزمەتتى وتەگەن 9 مىڭنان استام قازاقستاندىققا تەگىن ءبىلىم الۋعا ارنالعان سەرتيفيكات بەرىلگەن.

قورعانىس مينيسترلىگى ازاماتتاردى ءوز قۇقىقتارىن جۇزەگە اسىرۋدا تەك زاڭدى جولداردى پايدالانۋعا شاقىردى.