InfoHub Logo

قازاقستاننىڭ تاعى ءبىر وڭىرىندە، اتاپ ايتقاندا قوستاناي وبلىسىندا مۇناي ىزدەۋ جۇمىستارى قولعا الىنادى. بۇل تۋرالى يندۋستريا جانە قۇرىلىس مينيسترلىگى گەولوگيا كوميتەتى ءتوراعاسىنىڭ مىندەتىن اتقارۋشى قانات ەرۋبايەۆ مالىمدەدى.

جۋرناليستەردىڭ بريفينگتە قويعان سۇراعىنا جاۋاپ بەرگەن قانات ەرۋبايەۆ: «دجانگەلدى اۋدانىندا مۇناي تابىلعانى تۋرالى اڭگىمەلەر بولدى. ونى ءالى وندىرۋگە ەرتە مە؟» دەگەن ساۋالعا، مۇنايدى تابۋ ءۇشىن «پەرسپەكتيۆالى تۇزاقتاردى» انىقتاۋ قاجەتتىگىن ايتتى.

«بۇل – كۇردەلى جۇمىس، ءبىراق ونى جۇرگىزۋ كەرەك. بىزدە سولتۇستىك تورعاي شوگىندى باسسەينى وتە ۇلكەن. سونىمەن قاتار، سولتۇستىك ەلدەردە مۇناي مەن گاز وندىرىلەدى. بىزدە دە سونداي نىسانداردى تابۋعا جاعداي جەتكىلىكتى. سوندىقتان ءبىز قوستاناي وبلىسى اۋماعىندا سەيسموبارلاۋ جۇمىستارىن جوسپارلادىق»، - دەپ قوستى ول.

كوميتەت باسشىسىنىڭ مىندەتىن اتقارۋشىنىڭ ايتۋىنشا، جۇمىستار 2026 جىلى باستالىپ، ءۇش جىلعا سوزىلادى.

ايتا كەتەيىك، قازاقستاندا مۇناي نەگىزىنەن ەلدىڭ باتىس بولىگىندە وندىرىلەدى. مۇندا ءىرى كەن ورىندارى مەن نەگىزگى ينفراقۇرىلىم شوعىرلانعان. نەگىزگى مۇناي وندىرەتىن وڭىرلەر – اتىراۋ، ماڭعىستاۋ، باتىس قازاقستان، اقتوبە وبلىستارى. قىزىلوردا وبلىسىندا دا شاعىن كولەمدە ءوندىرىس بار.

ەستەرىڭىزگە سالا كەتەيىك، جاقىندا وتكەن ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ مۇناي سالاسىنداعى كۇردەلى جاعدايدى اتاپ وتكەن بولاتىن. ونىڭ ايتۋىنشا، قازاقستاندا جىلىنا شامامەن 100 ميلليون توننا مۇناي وندىرىلسە، ونىڭ تەك 18 ميلليون تونناسى عانا ەلىمىزدە قايتا وڭدەلەدى. جانار-جاعارمايعا سۇرانىستىڭ ارتۋىنا بايلانىستى پرەزيدەنت ۇكىمەتكە جۇمىس ىستەپ تۇرعان مۇناي وڭدەۋ زاۋىتتارىن جاڭعىرتۋدى جەدەلدەتىپ، جاڭا زاۋىت قۇرىلىسى بويىنشا شەشىم قابىلداۋدى تاپسىردى.