InfoHub Logo

قورعانىس مينيسترلىگىنىڭ باسپا ءسوز قىزمەتى الماتىداعى باۋىرجان مومىش ۇلى اتىنداعى اسكەري-سپورت كوللەدجىنە قايرات ساتىبالدى ۇلىنىڭ بارۋىنا قاتىستى اقپاراتقا تۇسىنىك بەردى. بۇعان دەيىن باق-تا ول ستۋدەنتتەرگە ءدارىس وقىدى دەگەن اقپارات تاراعان بولاتىن.

بۇل تۋرالى Infohub.kz اقپارات اگەنتتىگى حابارلايدى.

مينيسترلىك وكىلىنىڭ جاۋابى

ءماجىلىس كۋلۋارىندا جۋرناليستەر قورعانىس ءمينيسترىنىڭ ورىنباسارى دارحان احمەدييەۆتەن وسى جاعدايعا قاتىستى پىكىر سۇرادى. ول ساتىبالدى ۇلىنىڭ كوللەدجگە ءدارىس وقۋ ءۇشىن ەمەس، 40 جىلدىق مەرەيتويىنا ارنالعان شاراعا تۇلەك رەتىندە كەلگەنىن ايتتى.

«كوللەدجدە 40 جىلدىق مەرەيتوي بولدى. بۇل شارانى تۇلەكتەر ۇيىمداستىردى. مينيسترلىكتىڭ بۇعان ەشقانداي قاتىسى جوق. ولار وزدەرى مۇنداي مەرەيتويلاردى وتكىزەدى. ول بۇل وقۋ ورنىنىڭ تۇلەگى رەتىندە باردى. ول ءدارىس وقىدى دەگەندى ءبىرىنشى رەت ەستىپ تۇرمىن. ءدارىس وقىعان جوق، وقىمايدى دا. ءدارىس وقۋ ءۇشىن وقىتۋشىلار قۇرامىندا بولۋ كەرەك»، - دەدى ۆيسە-مينيستر.

كوللەدج باسشىلارى جازالاندى

جۋرناليستەر بۇل جاعدايعا بايلانىستى قورعانىس مينيسترلىگىنىڭ كوللەدج باسشىلىعىنا قانداي شارا قولداناتىنىن سۇراعاندا، احمەدييەۆ «جازا قولدانىلدى. ەگەر قاتەلەسپەسەم، جۇمىستان بوساتىلدى»، - دەپ جاۋاپ بەردى.

احمەدييەۆ ساتىبالدى ۇلىنىڭ كوللەدجگە بارۋىنا بايلانىستى قانداي باسشىنىڭ قىزمەتىنەن الىنعانىن ناقتىلامادى.

قايرات ساتىبالدى ۇلى كىم؟

قايرات ساتىبالدى ۇلى – قازاقستاننىڭ ەكس-پرەزيدەنتى نۇرسۇلتان نازاربايەۆتىڭ جيەنى. 2022 جىلى ول 6 جىلعا باس بوستاندىعىنان ايىرىلعان بولاتىن. تەرگەۋ مالىمەتتەرى بويىنشا، ول «قازاقتەلەكومعا» 12 ميلليارد تەڭگەدەن استام شىعىن كەلتىرگەن جانە كولىك قىزمەتتەرى ورتالىعىنىڭ مۇلكىن جىمقىرۋمەن بايلانىسى بار.

2023 جىلى تەرگەۋ باسقا ەپيزودتار بويىنشا جالعاستى. قاڭتار ايىندا ساتىبالدى ۇلى اقشانى جىلىستاتۋ فاكتىسىن مويىندادى. وسىدان كەيىن 2024 جىلى Kaisar Plaza بيزنەس ورتالىعى ونىڭ مەملەكەتكە قايتارعان اكتيۆتەرىنىڭ تىزىمىنە ەندى.

وسى تەرگەۋلەردەن كەيىن قايرات ساتىبالدىۇلىنان كوپتەگەن ءىرى اكتيۆتەر تاركىلەنىپ، مەملەكەتكە بەرىلدى. ولاردىڭ جالپى قۇنى 730 ميلليارد تەڭگەدەن اسقان.