InfoHub Logo

قازاقستاندا وتكەن رەسپۋبليكالىق رەفەرەندۋمنان كەيىن ورتالىق رەفەرەندۋم كوميسسياسىنا (ورك) ەكى تالاپ-ارىز كەلىپ تۇسكەن. كوميسسيا مۇشەسى اسەل جانابيلوۆانىڭ ايتۋىنشا، سوتتار ەكى ءوتىنىشتى دە قاراپ، تالاپكەرلەردىڭ تالاپتارىن قاناعاتتاندىرۋدان باس تارتتى.

بۇل تۋرالى Infohub.kz اقپارات اگەنتتىگى حابارلايدى.

ءبىر تالاپ-ارىز اقتوبە وبلىسىنداعى ۋچاسكەدە برايل شريفتىمەن جازىلعان ترافارەتتىڭ وقىلمايتىنىنا قاتىستى بولسا، ەكىنشىسى استاناداعى ۋچاسكەلىك كوميسسيانىڭ باقىلاۋشىنى شىعارۋ تۋرالى شەشىمىنە قارسى بەرىلگەن. سوتتار ەكى تالاپ-ارىزدى دا قاناعاتتاندىرۋدان باس تارتتى.

جالپى 35 ءوتىنىش كەلىپ ءتۇستى

اسەل جانابيلوۆانىڭ سوزىنشە، داۋىس بەرۋ كۇنى جالپى 35 ءوتىنىش كەلىپ تۇسكەن. ولار زاڭنامانى، رەفەرەندۋمنىڭ ءمانىن، ۋچاسكەلىك كوميسسيالاردىڭ جۇمىسىن جانە شەتەلدەگى داۋىس بەرۋدى قامتىعان.

بارلىق وتىنىشتەر بويىنشا تۇسىنىكتەمە بەرىلىپ، كەيبىرى اۋماقتىق كوميسسيالار مەن ءتيىستى ورگاندارعا جولداندى.

استانادا – 11، الماتىدا – 6، ماڭعىستاۋ وبلىسىندا – 4، شىمكەنتتە، اباي جانە قىزىلوردا وبلىستارىندا – 3-تەن، الماتى، اقمولا، شىعىس قازاقستان، جامبىل جانە پاۆلودار وبلىستارىندا بىر-بىردەن ءوتىنىش تىركەلگەن.

«وتىنىشتەر رەفەرەندۋمنىڭ ءمانى، داۋىس بەرۋ پروسەسى، ۋچاسكەلەردى اۋىستىرۋ، وتكرەپيتەلنىي تالوندار الۋ، ۋچاسكەلەردىڭ ورنالاسۋى جانە داۋىس بەرۋ كۇنىندەگى بۇزۋشىلىقتارعا قاتىستى بولدى. اۋماقتىق كوميسسيالار 33 وتىنىشكە زاڭناماعا سايكەس جاۋاپ بەردى»، - دەدى جانابيلوۆا.

ورك بارلىق وتىنىشتەر بەلگىلەنگەن تارتىپپەن قارالعانىن اتاپ ءوتتى. كەلىپ تۇسكەن وتىنىشتەر مەن ەسكەرتۋلەر داۋىس بەرۋدىڭ بارىسىنا جانە رەفەرەندۋمنىڭ قورىتىندىسىنا ەلەۋلى اسەر ەتپەگەن.

جاڭا كونستيتۋسيا تۋرالى

بۇگىن ورك جاڭا كونستيتۋسيانى قابىلداۋ بويىنشا رەفەرەندۋمنىڭ قورىتىندىسىن جاريالادى. كوميسسيا دەرەكتەرى بويىنشا، جاڭا كونستيتۋسيانى 7 954 667 ازامات قولداپ داۋىس بەرگەن. بۇل داۋىس بەرگەندەر سانىنىڭ 87،15 پايىزىن قۇرايدى. قارسى 898 099 ادام داۋىس بەردى.

كونستيتۋسيا ءماتىنىنىڭ شامامەن 84 پايىزى وزگەرىسكە ۇشىرادى. باستى جاڭالىقتار قاتارىندا ۆيسە-پرەزيدەنت لاۋازىمىنىڭ ەنگىزىلۋى، ءبىر پالاتالى پارلامەنت – قۇرىلتايعا كوشۋ جانە قازاقستان حالىق كەڭەسى اتتى جاڭا كونسۋلتاتيۆتىك ورگان قۇرۋ بار.

پرەزيدەنتتىككە كانديداتتارعا قويىلاتىن تالاپتار دا وزگەردى: ەندى ولاردىڭ مەملەكەتتىك قىزمەتتە نەمەسە سايلانبالى لاۋازىمداردا كەمىندە بەس جىل جۇمىس ءوتىلى بولۋى كەرەك. پرەزيدەنت ءبىر مەرزىمگە عانا سايلاناتىنى تۋرالى نورما ساقتالادى.

سونىمەن قاتار، كونستيتۋسيادا ازاماتتاردىڭ قۇقىقتارى مەن بوستاندىقتارى، جەكە دەرەكتەردى قورعاۋ، تىلدەردىڭ مارتەبەسى، ءدىن، سونداي-اق نەكەنى ەر مەن ايەلدىڭ وداعى رەتىندە بەكىتەتىن جاڭا ەرەجەلەر ەنگىزىلدى. حالىقارالىق شارتتار، وڭىرلەردەگى ارنايى قۇقىقتىق رەجيمدەر جانە ۇيىمداردىڭ شەتەلدىك قارجىلاندىرۋىنىڭ اشىقتىعى تۋرالى ەرەجەلەر دە ەنگىزىلدى.