InfoHub Logo

رەسەي قازاقستانداعى ءۇش جىلۋ ەلەكتر ورتالىعىنىڭ (جەو) قۇرىلىسىنا قاتىسپايدى. كوكشەتاۋ، سەمەي جانە وسكەمەن قالالارىنداعى جوبالاردى قازاقستاندىق-سينگاپۋرلىق كونسورسيۋم جۇزەگە اسىرادى.

بۇل تۋرالى Infohub.kz اقپارات اگەنتتىگى حابارلايدى.

سەمەي مەن وسكەمەندەگى جەو جوبالارى

ەنەرگەتيكا ۆيسە-مينيسترى سۇڭعات ەسىمحانوۆتىڭ ايتۋىنشا، سەمەي مەن وسكەمەندەگى جەو جوبالارى بويىنشا 2026 جىلدىڭ باسىندا EPC-كەلىسىمشارتتار جاسالعان. جاقىن ايلاردا مەردىگەر جۇمىستىڭ بەلسەندى كەزەڭىن باستايدى. مامىر ايىندا نەگىزگى جابدىقتارعا تاپسىرىس بەرۋ جوسپارلانىپ وتىر، سونىمەن قاتار ينجەنەرلىك ىزدەستىرۋ جۇمىستارى مەن الاڭداردى دايىنداۋ باستالادى.

نەگىزگى جابدىقتاردى جەتكىزۋ 2027 جىلدىڭ ءۇشىنشى توقسانىنان كۇتىلەدى، ال ستانسيالاردى پايدالانۋعا بەرۋ 2029 جىلدىڭ ءتورتىنشى توقسانىنا جوسپارلانعان.

كوكشەتاۋداعى جەو جاعدايى

كوكشەتاۋداعى جوبا دايىندىق جانە ءىشىنارا قۇرىلىس كەزەڭىندە. «سامۇرىق-ەنەرگو» مالىمەتىنشە، كوممۋنيكاسيالار جۇرگىزىلىپ، كىرمە جولدار سالىنعان. جوبالىق-سمەتالىق قۇجاتتاما ازىرلەنىپ جاتىر. 2026 جىلى اكىمشىلىك عيمارات قۇرىلىسىن باستاۋ كوزدەلگەن.

سونىمەن قاتار، ستانسيانىڭ جىلۋ قۋاتىن 520-دان 820 گيگاكالورييگە دەيىن ارتتىرۋ تۋرالى شەشىم قابىلداندى. بۇل تۋرالى مەردىگەرمەن جاسالعان كەلىسىمشارتقا ءتيىستى وزگەرىستەر ەنگىزىلدى. كوكشەتاۋداعى جەو-نى 2029 جىلدىڭ ءبىرىنشى توقسانىندا پايدالانۋعا بەرۋ جوسپارلانعان.

كىمدەر قۇرىلىسپەن اينالىسادى؟

ەسىمحانوۆتىڭ ناقتىلاۋىنشا، مەردىگەر رەتىندە قازاقستاندىق-سينگاپۋرلىق كونسورسيۋم ارەكەت ەتەدى. جوبالاردا قىتايلىق شەشىمدەردى قوسا العاندا، زاماناۋي تەحنولوگيالار قولدانىلادى.

«مەنىڭ ويىمشا، «سامۇرىق-ەنەرگو» كومپانياسىنىڭ ارىپتەستەرى كەز كەلگەن كومپانيانى الا سالمايدى. بۇل تاجىريبەسى بار جانە تەحنولوگيالارعا قولجەتىمدىلىگى بار مەردىگەرلەر. مۇنداي جوبالار ءۇشىن جەكە جاۋاپكەرشىلىك بار»، - دەدى ول ۇكىمەتتەگى بريفينگتە.

ءۇش ستانسيادا دا «تازا كومىر» تەحنولوگيالارىن جانە جاساندى ينتەللەكت ەلەمەنتتەرىن ەنگىزۋ جوسپارلانعان.

كەيىنىرەك، ەنەرگەتيكا ۆيسە-مينيسترى سۇڭعات ەسيمحانوۆ جوبالارعا رەسەيلىك قاتىسۋدىڭ تولىق توقتاتىلعانىن راستادى. ونىڭ ايتۋىنشا، كەلىسىمشارتتار جاسالعان.

«ءۇش جەو بويىنشا EPC-كەلىسىمشارتتار جاسالدى، رەسەيلىك مەردىگەرلەر جوق. قازاقستاندىق مەردىگەرلەر قۇرىلىسپەن اينالىسادى»، - دەدى ول.

ەسيمحانوۆ جوبالاردىڭ شامامەن قۇنىن دا جاريالادى. اتاپ ايتقاندا، كوكشەتاۋداعى جەو قۇرىلىسى شامامەن 350 ميلليارد تەڭگەگە باعالانسا، سەمەي مەن وسكەمەندەگى ستانسيالار ءارقايسىسى 400 ميلليارد تەڭگەگە جۋىق شىعىنعا شىعادى. بۇل ولاردىڭ ۇلكەن قۋاتىمەن بايلانىستى.

ول جوبالاردىڭ بيۋدجەت قاراجاتىن تىكەلەي تارتپاي جۇزەگە اسىرىلاتىنىن اتاپ ءوتتى.

«باعدارلاما بويىنشا بيۋدجەت قاراجاتى جوق. كومپانيالار وزدەرى قاراجات تارتادى، سالادى، ال ءبىز پايدالانۋعا بەرگەننەن كەيىن تولەي باستايمىز، سوندا ولار نەسيەلەرىن قايتارا الادى»، - دەپ ءتۇسىندىردى ۆيسە-مينيستر.