InfoHub Logo

اقش-تىڭ پرەزيدەنتى دونالد ترامپ رەسەيگە قارسى قولدانىلىپ كەلگەن سانكسيالاردىڭ مەرزىمىن رەسمي تۇردە تاعى ءبىر جىلعا ۇزارتتى. بۇل تۋرالى فەدەرالدى رەەستر سايتىندا جاريالاندى. بۇعان دەيىن بۇل شەكتەۋ شارالارىن 2021 جىلى دجو بايدەن №14024 جارلىعى نەگىزىندە ەنگىزگەن بولاتىن.

اتالعان سانكسيالار رەسەيدىڭ اقش-تىڭ ىشكى ىسىنە ارالاسۋىنا، كيبەرشابۋىل ۇيىمداستىرۋىنا، سايلاۋ پروسەسىنە ىقپال ەتۋ ارەكەتتەرىنە، سونداي-اق رەسەيدىڭ ءوز ىشىندەگى وپپوزيسيا مەن ەركىن باق-قا قىسىم كورسەتۋىنە بايلانىستى قابىلدانعان ەدى. قۇجات شەڭبەرىندە كوپتەگەن رەسەيلىك جەكە جانە زاڭدى تۇلعالارعا، سونداي-اق مەملەكەتتىك قۇرىلىمدارعا سانكسيالار سالىنعان.

ترامپ سانكسيالاردى ۇزارتۋ تۋرالى شەشىمىن ءتۇسىندىرىپ، "رەسەيدىڭ اقش-قا قارسى ارەكەتتەرى باسەڭدەگەن جوق، سوندىقتان ۇلتتىق قاۋىپسىزدىك ءۇشىن بۇل شارالاردى ساقتاۋ قاجەت" دەپ مالىمدەدى.

سونىمەن قاتار، ترامپ بيىلعى 27 اقپاندا تاعى ءبىر ماڭىزدى قۇجات – №13660 جارلىقتىڭ مەرزىمىن دە ۇزارتتى. بۇل جارلىق باراك وباما تۇسىندا قابىلدانعان جانە رەسەيدىڭ ۋكراينا ەگەمەندىگى مەن اۋماقتىق تۇتاستىعىنا قارسى ارەكەتتەرىنە جاۋاپ رەتىندە ازىرلەنگەن.

وسى اپتانىڭ وزىندە اقش پەن رەسەي اراسىندا ۋكرايناداعى سوعىستى توقتاتۋ جايلى بىرنەشە كەلىسسوز ءوتتى. 11 ساۋىردە ترامپتىڭ ارنايى وكىلى دجەيسون ۋيتكوفف ماسكەۋدە رەسەي پرەزيدەنتى ۆلاديمير پۋتينمەن كەزدەسىپ، بۇل ەكى اي ىشىندەگى ءۇشىنشى كەزدەسۋ بولدى. الايدا رەسەي تاراپى ءالى دە بولسا قاقتىعىستى توقتاتۋعا دايىن ەمەس ەكەنىن بايقاتىپ وتىر. 13 ساۋىردە رەسەي كۇشتەرى ۋكراينانىڭ سۋمى قالاسىنا سوققى جاساپ، 32 بەيبىت تۇرعىن قازا تاپتى.

Axios اگەنتتىگىنىڭ حابارلاۋىنشا، اقش ءساۋىردىڭ سوڭىنا دەيىن سوعىستى توقتاتۋدى تالاپ ەتكەن. ەگەر بۇل ورىندالماسا، ۆاشينگتون سانكسيالاردى ودان ءارى كۇشەيتۋدى كوزدەپ وتىر. ترامپ بۇعان قوسا، رەسەيدەن يمپورتتالاتىن تاۋارلارعا كەدەندىك باج سالىعىن كوتەرۋ جانە مۇناي سەكتورىنا قوسىمشا شەكتەۋ ەنگىزۋ جوسپارىن جاريا ەتتى.