InfoHub Logo

قازاقستاندىق ەركىن كۇرەس شەبەرى ريزابەك ايتمۇحان اقش-تىڭ فيلادەلفيا قالاسىندا وتەتىن RAF 08 تۋرنيرىندە امەريكالىق كايل سنايدەرمەن تيتۋلدىق جەكپە-جەك الدىندا «كوز مولشەرىن» جاسادى.

بۇل تۋرالى Infohub.kz اقپارات اگەنتتىگى حابارلايدى.

ايقاس الدىنداعى شيەلەنىس

30 جاستاعى كايل سنايدەر 97 كەلىگە دەيىنگى سالماقتاعى چەمپيوندىق بەلدىگىن قورعايدى. ونىڭ 21 جاستاعى قارسىلاسى ريزابەك ايتمۇحان.

بۇل جەكپە-جەك ءتۋرنيردىڭ ماڭىزدى كەزدەسۋلەرىنىڭ ءبىرى بولادى. كەزدەسۋ قازاقستان ۋاقىتىمەن 19 ءساۋىر تاڭىندا وتەدى.

كەزدەسۋ الدىنداعى «كوز مولشەرىندە» قازاقستاندىق بالۋان جەڭىسكە جەتەتىنىنە جانە بەلدىكتى الاتىنىنا سەنىم ءبىلدىردى.

ريزابەك ايتمۇحان – تاريحي الەم چەمپيونى

ەستەرىڭىزگە سالا كەتەيىك، ريزابەك ايتمۇحان 2023 جىلى ەركىن كۇرەستەن الەم چەمپيونى اتاعىن جەڭىپ العان قازاقستاننىڭ تۇڭعىش وكىلى بولدى. سول كەزدە 18 جاستاعى بالۋان 92 كەلى سالماق دارەجەسىندە ونەر كورسەتكەن ەدى.

كەيىننەن ريزابەك سالماق دارەجەسىن اۋىستىردى، سەبەبى 97 كەلى – وليمپيادالىق سالماق. بۇل سالماقتا قازاقستاندىق بالۋان ازيا چەمپيوناتىنىڭ كۇمىس جۇلدەگەرى اتاندى.

امەريكالىق قارسىلاس تۋرالى

امەريكالىق كايل سنايدەر – توعىز دۇركىن الەم چەمپيوناتىنىڭ جۇلدەگەرى (ءتورت التىن، ەكى كۇمىس جانە ەكى قولا)، 2016 جىلعى ريو-دە-جانەيرو وليمپياداسىنىڭ چەمپيونى جانە 2020 جىلعى توكيو وليمپياداسىنىڭ كۇمىس جۇلدەگەرى.

ايتا كەتەيىك، 2025 جىلدىڭ اقپانىندا ايتمۇحان مەن سنايدەر الماتىدا وتكەن PWL 8 تۋرنيرىندە كەزدەسكەن بولاتىن. سول كەزدە كايل 8:0 ەسەبىمەن جەڭىسكە جەتكەن.