InfoHub Logo

ساياساتتانۋشى ەرىك ءىلياسوۆ: "قوعامدا شىنايىلىق جوق، ال سوت پروسەسى – فورماليزم مەن جاساندىلىققا تولى"

تاۋەلسىز ساراپشى، ساياساتتانۋشى ەرىك ءىلياسوۆ ەلدەگى سوڭعى رەزونانستى وقيعالار مەن قوعامدىق ماسەلەلەرگە قاتىستى سىني پىكىر ءبىلدىردى. ونىڭ ايتۋىنشا، قازىرگى قازاقستان قوعامىندا شىنايىلىقتان الشاق، مازمۇنسىز ءارى ۇرانعا تولى ءۇردىس بەلەڭ العان.

— ەلدەگى جاڭالىقتاردى ءبىر سوزبەن سيپاتتا دەسە، “وتىرىك” دەر ەدىم. سوزگە ءىس، مازمۇنعا قيسىن سايكەس كەلمەيدى، — دەدى ول.

ساراپشى قوعامنىڭ قىزۋ تالقىسىنا تۇسكەن پەريزات قايرات ءىسى بويىنشا دا كوزقاراسىن اشىق ءبىلدىرىپ، بۇل پروسەسكە قاتىستى ءبىرقاتار كۇمان كەلتىردى. ونىڭ ايتۋىنشا، بۇل ءىس تەك سىرتقى اسەر ءۇشىن ۇيىمداستىرىلعان شوۋعا كوبىرەك ۇقسايدى.

— ۇيقاسسىزدىق كوپ. سول باياعى ىسكە اسپايتىن ارزان دالەلدەر مەن ليۋكس زاتتار تۋرالى قايتالاپ جازا بەرىپتى. سوت پروسەسىنىڭ دەڭگەيى دە تومەندەۋ. جاساندىلىق بىردەن بايقالادى. قىز دا، شەشەسى دە، اينالاسىنداعىلاردىڭ ءبارى قازاقى. تىلدەرىن كۇرمەلەپ، ورىسشا ارەڭ سويلەپ… — دەدى ءىلياسوۆ.

ساياساتتانۋشى جالعان ديپلوم ماسەلەسىنە دە نازار اۋداردى. ونىڭ ايتۋىنشا، ەلدەگى كادرلىق جۇيەنىڭ السىزدىگى مەن فورمالدى كريتەرييلەر سالدارىنان، رەزيۋمەلەر مەن لاۋازىمدار اراسىندا ۇلكەن الشاقتىق پايدا بولعان.

— ديپلوم تۋرالى. ارالارىڭىزدا وندايلار كوپ. مويىنداڭىزدار! نەبىر تۇيىندەمەلەر الدىمنان ءوتتى. ەكىنىڭ ءبىرى گارۆارد، جەنيەۆا ت.ب. قاشان وقىپ ۇلگەرگەندەرىن بايقامايسىڭ، — دەيدى ساراپشى.

ءىلياسوۆ بۇعان دەيىن دە كۇمان تۋدىرعان قوعامدىق قورلارعا قاتىستى پىكىرىن قايتالاپ، ولاردىڭ قىزمەتىن ءتيىستى باقىلاۋ بولماعانىن سىنادى.

— قوعامدىق قور جونىندە بىلتىر ناۋرىز ايىندا جازىپ ەدىم عوي. ويىنشىق ەمەس دەپ. ەگەر ايىپتاۋلاردىڭ ءبارى راس بولسا، بۇل ۇكىمەتكە، باسشىلارعا، جارناماسىن جاساعان بۇكىل تەلەارناعا سىن. “Clearance، monitoring” دەگەن نارسەلەر بار. قوعامدىق ۇيىم، گرانت، اقشا دەگەن ۇعىمداردىڭ قاسىندا بىرگە جۇرەدى. مىسالى، ءىرى بانك اقشا بەرىپ، ونلاين پلاتفورما جاساپ بەرىپ، قايدا قاراپ وتىرعان؟ — دەدى ول.

ونىڭ پىكىرىنشە، پەريزات قايرات ءىسى قوعام ءۇشىن ۇلكەن ساباق بولۋعا ءتيىس. ادامدار ەندى تەك باسشىلىققا عانا ەمەس، اينالاسىنداعى ادامدارعا دا سىني كوزبەن قاراي باستايدى.

— پەريزات قايرات ىسىنە راقمەت. ءبىراز ادامنىڭ كوزىن اشتى. ەندى اركىم باستىعىنا، اينالاسىنا، ال باستىقتار قاراماعىنداعىلارىنا ابايلاپ قاراپ جۇرەدى، — دەپ قورىتىندىلادى ءىلياسوۆ.

ساياساتتانۋشى وتكەن جىلدىڭ كەيبىر وقيعالارىن قايتا قاراپ شىققاندا، كوپتەگەن نارسەنىڭ بۇگىنگى كۇنى الدەقايدا اشىق ءارى انىق كورىنە باستاعانىن دا اتاپ ءوتتى.