ساكەن سارسەنوۆ: قازپوشتانىڭ مىندەتى — كليەنتتەردىڭ قاجەتتىلىكتەرىن بارىنشا قاناعاتتاندىرۋ
«قازپوشتا» اق باسقارما ءتوراعاسى ساكەن سارسەنوۆ ءوزىنىڭ Facebook پاراقشاسىندا كومپانيانىڭ باستى مىندەتى نە ەكەندىگىن جازدى. ونىڭ سوزىنشە، قازپوشتانىڭ ءبىرىنشى كەزەكتەگى مىندەتى — كليەنتتەردىڭ قاجەتتىلىكتەرىن بارىنشا قاناعاتتاندىرۋ.
باسقارما ءتوراعاسى اتالعان جازباسىن اتىراۋ وبلىسىنا ساپارى كەزىندە حابارلادى. ءىس-ساپار بارىسىندا سيفرلاندىرۋعا قاتىستى ءبىرقاتار جوبالار تالقىلانعان.
«بۇگىن اتىراۋعا ءىس-ساپار بارىسىندا وبلىس اكىمى نۇرلان نوعايەۆ مىرزامەن كەزدەسىپ، ە-كسك، ءبىرىنعاي تولەۋ قۇجاتى، الەۋمەتتىك كارتا، تۇرعىن ءۇي يندەكستەرى، جانە باسقا دا سيفرلىق جوبالاردى ەنگىزۋ ماسەلەلەرىن تالقىلادىق»، — دەدى س. سارسەنوۆ.
سونداي-اق، جۋىردا عانا اشىلعان وڭىردەگى سالەمدەمەلەر سۋپەرماركەتىنىڭ ەرەكشەلىكتەرىن اتاپ ءوتتى.
«قوعامدىق كەڭەس وتىرىسىنا قاتىسىپ، پوشتا بولىمشەلەرىنىڭ جاڭا عيماراتتارىن ارالاپ، جاڭا سالەمدەمەلەر سۋپەرماركەتىن اشتىق. جالپى اۋماعى 600 شارشى مەتر قۇرايتىن جاڭا سالەمدەمەلەر سۋپەرماركەتى ەلەكتروندىق تابلومەن، ۇرلىققا قارسى جۇيەمەن، وزىنە-وزى قىزمەت كورسەتۋ ايماعىمەن جابدىقتالعان»، — دەپ جازدى باسقارما ءتوراعاسى.
ونىڭ ايتۋىنشا، 7 پوشتا بولىمشەسى رەلوكاسيا جوباسىنىڭ ارقاسىندا جاڭارتىلعان عيماراتتارعا كوشىرىلدى. مۇندا كليەنت ايماقتارى كەڭەيتىلگەن، سالەمدەمەلەردى سۇرىپتاۋ ءۇشىن جەكە ءۇي-جاي بولىنگەن، ەلەكتروندىق كەزەك ىسكە قوسىلعان.
ال قوعامدىق كەڭەس وتىرىسىندا پوشتا بولىمشەلەرىن جاڭارتۋ، قىزمەتكەرلەردىڭ ەڭبەك جاعدايىن جاقسارتۋ، تۇرعىندارعا كورسەتىلەتىن قىزمەتتەر ساپاسىن ارتتىرۋ، فرانچايزينگ جەلىسىن جانە ەلەكتروندىق كوممەرسيانى دامىتۋ سىندى ماسەلەلەر ءسوز بولىپتى.
«كەڭەس مۇشەلەرىنىڭ بارلىق ەسكەرتۋلەرى مەن ۇسىنىستارىن جۇمىس بارىسىندا ەسكەرەمىز جانە اتىراۋداعى فيليالىمىزدىڭ قىزمەتىن دامىتۋ بويىنشا ءىس-شارالاردى جالعاستىرا بەرەمىز. قوعامدىق كەڭەستەردىڭ جۇمىسىن ءوز باسىم قولدايمىن. وسىنداي تاجىريبەنى باسقا دا اۋماقتارعا تاراتىپ، اتقارىلىپ جاتقان جۇمىستاردى قاداعالاپ، ونىڭ ناتيجەسىمەن ءبولىسۋ پايدالى دەپ ويلايمىن»، — دەپ تۇيىندەدى ساكەن سەيتجاپپار ۇلى.
You Might Also Like
-
بريتاندىق كاسىپكەر روب مۋر ءومىردى جۇمىس پەن دەمالىس كۇندەرى، ەڭبەك پەن بوس ۋاقىت، جۇمىس پەن زەينەتاقى دەپ ءبولۋدىڭ ەندى ءمانى جوق ەكەنىن ايتادى.
