InfoHub Logo

ەرتەدە سامۇرىق اتتى قۇس بولىپتى. ونىڭ جان-جانۋار بىتكەنگە قاستىعى جوق ەكەن. بۇل وڭىرگە جازدا كەلىپ بالاپانداپ، بالاپانىن ۇشىرعاننان كەيىن، باسقا ءبىر وڭىرگە قىستاپ كەلۋگە كەتىپ قالادى ەكەن. ءزاۋلىم اعاش باسىنا نەمەسە جاقپار تاسقا ۇيالاپ، ءار جىلى ەكى جۇمىرتقا تابادى ەكەن. ول ءبىر جىلى شىڭىراۋ قۇزدىڭ باسىنا ۇيا سالىپ ەكى جۇمىرتقا باسىپ، ونىسى بالاپان بولادى. ءبىر كۇنى ۇرعاشىسى دا، ەركەگى دە جەم ىزدەپ شىعىپ كەتىپ قايتىپ كەلسە، جىرتقىش قۇستىڭ ءبىر بالاپانىن ءولتىرىپ شوقىپ جەپ وتىرعانىن كورەدى. «اتتەگەن-اي، ۋاعىندا جەم اكەلىپ بەرە الماعانىمىزدان بولدى-اۋ!» — دەپ قايعىلانعان سامۇرىق ەندى جالعىزىنىڭ تىلەۋىن تىلەپ، ونى باعىپ-قاعىپ ۇشاتىن كۇيگە جەتكىزەدى. ءبىر كۇنى بالاپانىن ۇيادان ۇشىرىپ شىقسا، بالاپانى شىڭىراۋ قۇزعا ءتۇسىپ كەتەدى. «ەندى جالعىزىم دا قاراماي كەتتى-اۋ!» — دەپ زارلاپ، نالىپ مەكەنىنە كەتىپ قالادى. كەلەسى جىلى جانە كەلىپ ۇيالاپ، ەكى جۇمىرتقا تابادى. ءبىر كۇنى ۇرعاشىسى جۇمىرتقانى شايناپ ۇيادان ۇشىپ شىعىپ، قاسىنداعى اعاشتىڭ ساياسىنا قوناقتاپ، ۇياعا قاراپ وتىرسا، اسپاننان ءبىر قارا قۇس ەكى اياعىن سالبىراتىپ ۇشىپ كەلىپ ۇياعا تۇسەدى دە، قايتا تىك ۇشىپ شىعىپ كەتەدى. سامۇرىق قۇس بۇعان تاڭ قالىپ، «بۇل تەگىن ەمەس، مۇندا ءبىر سىر بار»، دەپ تۇيەدى. سويتسە، ايتقانداي، اسپاننان ۇشىپ تۇسكەن قۇس جىرتقىش، قاسىكوي قۇس ەكەن. ءوزىنىڭ ءبىر جۇمىرتقاسىن اكەلىپ، سامۇرىقتىڭ ءبىر جۇمىرتقاسىن الىپ كەتەدى ەكەن. مۇنى بىلگەن سامۇرىق بالاپانىنا زار جىلاپ قىسقى مەكەنىنە قايتادى ەكەن. سول مومىن قۇستىڭ زارىنا زار قوسىپ، «سامۇرىقتىڭ زارى» دەپ شەرتكەن كۇي ەدى.

 

---