InfoHub Logo

قازاقستان تاريحىنان قىسقا مەرزىمدى جوسپار /اشىق ساباق/

ساباقتىڭ تاقىرىبى: ساقتاردىڭ الەۋمەتتىك - قوعامدىق قۇرىلىسى، يدەولوگياسى
ماقساتى: بىرلەسە وقي وتىرىپ تاقىرىپتىڭ ءمانىن ۇعىنۋ، ساقتاردىڭ يدەولوگيالىق تۇسىنىكتەرىن زەرتتەۋ، تالداۋ، تاريحي قۇندىلىقتارىمىزدى قۇرمەتتەۋگە تاربيەلەۋ
مىندەتتەر:- سىني ويلاۋ داعدىلارىن، شىعارماشىلىق قابىلەتتەرىن جەتىلدىرۋ
- تالانتتى، دارىندى وقۋشىلاردى انىقتاۋ
- ءوز ويلارىن جۇيەلەۋگە ۇيرەتۋ، اقپاراتتى تالداي ءبىلۋ
كۇتىلەتىن ناتيجە: ۇسىنىلعان تاقىرىپتى تۇسىنەدى، دەڭگەيلىك سۇراقتاردى تالداي الادى، جەكە ەرەكشەلىكتەرى انىقتالادى، اقپاراتتى سىني تۇرعىدا
ءتۇيىندى يدەيا: ساقتار - ءبىزدىڭ جەرىمىزدەگى وزىندىك ويلارى مەن قوعامدىق سانالارى قالىپتاسقان العاشقى تايپالىق بىرلەستىك
رەسۋرستار: وقۋلىق، ينتەربەلسەندى تاقتا، ءتۇرلى - ءتۇستى ماركەرلەر، ۇلەستىرمە قاعازدار، فوتو سۋرەتتەر

كىرىسپە: وقۋشىلارمەن امانداسۋ، "قالايسىز...؟" ترەنينگى. ساباقتىڭ ءادىسى: بلۋم تاكسونومياسى
ءبىلۋ:"تازا تاقتا" ءادىسى بويىنشا وتىلگەن تاقىرىپتى پىسىقتاۋ. تەرميندەر ارقىلى توپقا ءبولۋ
جاڭا ماتەريالدىڭ تانىستىرىلىمى:
ءتۇسىنۋ: جاڭا ساباقتىڭ نە تۋرالى بولاتىنىن ايقىنداۋ ءۇشىن سوزجۇمباقپەن جۇمىس.
1. ساقتارعا گرەكتەردىڭ بەرگەن اتاۋى؟ /سكيف/
2. تەڭىزدىڭ ارعى جاعىنداعى ساقتار؟ /پاراداراييا/
3. ساقتار تۋرالى كوپ ەڭبەك قالدىرعان گرەك تاريحشىسى؟ گەرادوت/
4. ءامۋداريا مەن مۇعراب وزەندەرى جاعالاۋىن قونىستانعان ساقتار؟ /حاوماۆارگا/
5. التايداعى پاتشا قورعاندارى؟ شىلىكتى/
6. “ كۇرەكپەن قارۋلانعان” عىلىم؟ /ارحەولوگيا/
7. “سكيف ۇشتىگىنىڭ “ ءبىرى؟ /جۇگەن/
8. "ساق ايەلدەرى ەرجۇرەك كەلەدى، سوعىس ءقاۋپى تونگەندە ەرلەرىنە كومەكتەسەدى“ – دەپ باياندايتىن گرەك اۆتورى؟ /كتەسيي/
9. گرەك جازبا دەرەكتەرىندە حاوماۆارگا ساقتاردى تاعى قالاي اتاعان؟ /اميۋرگيا/

قولدانۋ: تاقىرىپتى بىرلەسە وقيدى، ءوز توپتارىندا تالقىلايدى. سۇراق: تاقىرىپتا نە تۋرالى ايتىلعان، مازمۇنى نەدە؟

تالداۋ: ءار توپقا كونۆەرت تاڭداۋ ارقىلى جاڭا ساباق بويىنشا تالداۋ سۇراقتارى بەرىلەدى
1. ساقتاردىڭ الەۋمەتتىك - قوعامدىق قۇرىلىسى تۋرالى
2. ساق قوعامىنداعى مولا - وبالاردىڭ الەۋمەتتىك جىكتەلىسى
3. ساقتاردىڭ يدەولوگياسى
4. ساقتار دۇنيەتانىمىنداعى ۇشتىك دەگەندى قالاي تۇسىنەسىزدەر؟ /ءار توپ وزدەرىنە تۇسكەن سۇراقتى تالدايدى، قارسى توپتار ءبىر - بىرىنە سۇراق بەرەدى/
قوسىمشا دەڭگەيلىك تاپسىرمالار: "سۋرەتتى سويلەت" زەرتتەۋ ءادىسى. كونۆەرت ارقىلى جاسىرىلعان سۋرەتتى تاڭدايدى، توپ بولىپ بەرىلگەن سۋرەتتى سويلەت

توپتىق تاپسىرما: جۇمباق شەشەيىك: قادام باس العا سۇرىنبەي،
بولاشاق كىلتى – بىلىمدە.
قانداي ماعىنا بەرەدى
“ساق” ءسوزى پارسى تىلىندە؟ («قۇدىرەتتى ەركەكتەر»)
2 - ۇياشىق: ارايلاپ تاڭى اتادى،
ماۋجىراپ كۇنى باتادى.
تۇيە ءسۇتىن بالمەن تەڭ،
ساقتار قالاي اتادى؟ (شۇبات)

3 - ۇياشىق: باسىنان كەشكەن شاقتاردى
تاريحشى ءتىزىپ اقتاردى
كىمدەر دەپ تاعى اتادى
گرەك گەرودوت ساقتاردى؟ (“ماسساگەتتەر”)
4 - ۇياشىق: ءبىلىمدى التىنعا تەڭەدىك،
دوستارعا اشىق، كەڭ ەدىك.
ايگىلى سۋسىن جاساۋشى،
ساقتاردى كىمدەر دەپ ەدىك؟ («حاۋماۆارگا»)
5 - ۇياشىق: اعاعا تىنىس ءىنى ەدى،
تاريح وتكەننىڭ ءۇنى ەدى.
ساق ايەلىنىڭ ەرلىگىن
سيپاتتاپ بەرگەن كىم ەدى؟ («كتەسيي»)
6 - ۇياشىق: كوگەنگە قۇلىن بايلادى،
بەس قارۋدى دا سايلادى.
ايتىپ بەرشى، قاي ساقتار،
ارال مەن سىردى جايلادى؟ («پارادارايا»)

جيناقتاۋ: "بەس ساۋساق" ءادىسى بويىنشا تاقىرىپتى، العان بىلىمدەرىن پىسىقتايدى. 1. كوڭىل كۇيىڭ، 2. ساباقتاعى ەسىڭدە قالعان مالىمەت، 3. سەن ءۇشىن جاڭالىق بولعان اقپارات، 4. ساباق تۋرالى پىكىرىڭ، 5. وزىڭە باعا قويۋ
باعالاۋ: " تەڭگەمدى سىيلايمىن" ءادىسى بويىنشا ءفورماتيۆتى باعالاۋ/اقشا بانكنوتتارى ارقىلى ءار توپ ءبىر - ءبىرىن باعالايدى/

ساباقتى تالقىلاۋ /رەفلەكسيا/

نە ءساتتى ءوتتى؟ وقۋشىلار كۇننەن - كۇنگە بىرلەسە جۇمىس جاساۋعا قالىپتاسىپ كەلەدى. تاقىرىپتىڭ نەگىزگى ءتۇيىنىن ءوز بەتتەرىنشە اشا الدى. توپتا ەركىن جۇمىستاندى، سىني سۇراقتارعا تولىق جاۋاپ بەرە الدى.

نە ءساتسىز ءوتتى؟ بلۋم ءادىسى جاقسى، دەگەنمەن ۋاقىت تاپشى بولىپ قالدى.

نەنى دامىتا الاسىز؟ نەنى وزگەرتكىڭىز كەلەدى؟ ويلاۋعا، پىكىرلەرىن ەركىن جەتكىزۋگە ماشىقتاندىرۋدى جەتىلدىرە ءتۇسۋ كەرەك.
رەفلەكسيا:
10 كلاستا ساقتاردىڭ يدەولوگياسى تاقىرىبىندا اشىق ساباق وتكىزدىم. ساباقتى بلۋم جۇيەسىنە قۇرىپ، دايىندادىم. وقۋشىلارعا ءتۇرلى دەڭگەيدەگى تاپسىرمالار بەرۋ ارقىلى ساباق مازمۇنىن وزدەرى اشۋعا باعىتتالدى. ساباق قىسقاشا امانداسۋ، توپقا بولىنۋمەن باستالدى. "تازا تاقتا" ويىنى ارقىلى وتىلگەن تاقىرىپتى پىسىقتادىق، سودان سوڭ جاڭا ساباق تاقىرىبىن اشۋ ءۇشىن ءسوزجۇمباق شەشۋدەن باستالدى. بۇل كەزەڭدە توپتار بىرلەسە جۇمىلا سوزدەردى شەشۋگە اتسالىستى. سودان سوڭ بەرىلگەن سۇراقتار بويىنشا توپتار وقۋلىقپەن جۇمىستاندى، تالقىلادى. دەڭگەيلىك سۇراقتار بارىسىندا توپتاعى تالانتتى، دارىندى وقۋشىلار انىق ايقىندالدى. جانە ول وقۋشىلاردىڭ كوشباسشىلىق قابىلەتتەرى دە اڭعارىلدى. ويتكەنى كۇردەلى سۇراقتار بەرىلگەن بولاتىن. وقۋشىلار ساقتار تۋرالى بىلىمدەرىن ەستەرىنە تۇسىرە وتىرىپ، قويىلعان سۇراقتار بويىنشا بىلىمدەرىن جاقسى كورسەتتى. وقۋلىقتان تىس تا تاپسىرمالار بەردىم: "سۋرەتتى سويلەت" تاپسىرماسىندا ءار توپ وزدەرىنە بەرىلگەن سۋرەتتى ساق قوعامى، يدەولوگياسىنا بايلانىستىرا ايتىپ جەتكىزدى. جالپى العاندا ساباق ءوز كوڭىلىمنەن شىقتى، سەبەبى وقۋشىلار تاقىرىپتى تولىق مەڭگەردى، بەرىلگەن تاپسىرمالاردى ورىنداي وتىرىپ بىرلەسە جۇمىس جاسادى. "بەس ساۋساق " ءادىسى ارقىلى ساباق قورىتىندىلاندى، وزدەرىن - وزدەرى باعالادى. بلۋم تاسىلىمەن ساباقتى جوسپارلاۋ، وتكىزۋ جاقسى، تەك كەيدە ۋاقىت تاپشى بولىپ قالادى.