سارى وزەن (ءى نۇسقا)
ءبىر بايدىڭ قىزىن ۇزاتقاندا قىزدىڭ مال-مۇلىك جاساۋىنا قوسىپ ءبىر كەدەيدىڭ دومبىراشى جالعىز قىزىن كۇڭ رەتىندە شاڭىراققا مىنگىزىپ بەرەدى. باي بيلىگىنە قارسى تۇرار دارمەن جوق، اتا سالتىن بۇزارعا قاقىسى جوق، سورلى قىز جىلاي-جىلاي كۇڭدىككە كەتەدى. قىزدىڭ «قامقورىم، سۇيەنىشىم» دەيتىنى — جالعىز اعاسى ەكەن. كۇڭدىككە اتتانىپ بارا جاتقان قارىنداسىمەن جىلاپ قوشتاسىپ تۇرىپ:
— ءتاڭىر سالعان تاۋقىمەتتى كورمەسكە لاجىمىز جوق. ەكەۋىمىزدىڭ ءبىر جۇرگەنىمىزدى دە كوپ كورگەن ەكەن. ءبىراق «كەبەنەك كيگەن كەلەدى» دەگەندەي الدە دە ءۇمىتىم بار. بارعان ەلىڭنىڭ يگى جاقسىلارى باس قوسىپ وتىرعان ءبىر ءساتتى پايدالانىپ ۇيالماي، يمەنبەي رۇقسات سۇرا دا، «سارى وزەن» دەگەن كۇي شەرتىپ بەر. ءساتى بولسا وسىدان ىڭعاي بىلىنەر. كۇيدى تۋعان جەرىڭ «سارى وزەنگە» ارنا، زارىڭدى قوس. جان تەبىرەنتەر كۇي شىعارۋ قولىڭنان كەلەدى، — دەيدى اعاسى. قىز كۇڭ اتانادى دا جات ەل، جات جەرگە بارادى. كورگەنى مەحنات بولادى. بايدىڭ وتىمەن كىرىپ، كۇلىمەن
شىعادى. سارى ۋايىم، ءبىتىمى جوق كوپ كۇيبەڭ، جىگەرىن جەگىدەي جەپ، جۇرەگىن مۇڭعا تولتىرادى. ءوستىپ جۇرگەن قاپاستاعى كۇندەردىڭ بىرىندە، ول ەلدىڭ يگى جاقسىلارىنىڭ باسى قوسىلىپ، باي ۇيىنە جيىلادى. ءوزىنىڭ مۇڭ-زارىن، تۋعان جەرگە دەگەن ساعىنىشىن ەكى ىشەكتى دومبىرادا سويلەتىپ قويعان قىز، رۇقسات سۇراپ يگى جاقسىلار وتىرعان ۇيگە كىرەدى. سارى قىمىزدى سۋشا ساپىرىپ كۇنى بويى ىشسە دە، تويىمدىق تاپپاي ءبورتىپ وتىرعان يگى جاقسىلار قىزدىڭ جاڭا كۇيىمدى شەرتىپ بەرەيىن دەگەنىن ەستىپ ەلەڭ ەتىسەدى.
قىز كۇيىن شەرتە جونەلگەندە كۇڭنىڭ ونەرىنە تاڭدانعان يگى جاقسىلار باس شۇلعىسىپ، تۇس-تۇستان قولپاشتاپ داۋرىعىسىپ قالادى. كۇيدى تىڭداپ بولعاننان كەيىن قىزدان كىمنىڭ كۇيى ەكەندىگىن سۇرايدى. سوندا قىز: «تاعدىر ماعان تۋماي جاتىپ مەحنات سىيلادى. ەتەگىنە جارماسىپ اكە ارتىنا ەرگەم جوق، انا ءسۇتىن تويا ەمگەم جوق، قوس بايتەرەگىمنەن جاستاي ايىرىلىپ، جەتىم قالدىم. باي ەسىگىندە كۇن كەشتىم. ەندى كوزىمدى اشىپ، جان-جاعىما قاراپ وتىرعاندا كورىپ وتىرعانىم مىناۋ. شاڭىراققا ءمىنىپ كەپ كۇڭ اتاندىم. ارتىمدا كوز جاسىمەن ءوڭىرىن جۋىپ جالعىز اعام قالدى، بىرگە وسكەن مۇڭداس قۇربىلارىم قالدى، ءمولدىر سۋىن سىمىرە ءىشىپ، كىرىمدى جۋعان «سارى وزەن» قالدى. وسىلاردى ويلاسام، وزەگىم ورتەنىپ قايعى باسادى. وزەگىمدى سارى ۋايىم جايلادى، سولارعا دەگەن ساعىنىشىم ەدى. كۇي اتىن «سارى وزەن» اتادىم»، — دەيدى.
يگى جاقسىلار قىزدىڭ ونەرىنە رازى بولىپ كۇڭدىكتەن بوساتىپ ەلىنە قايتاردى.
You Might Also Like
-
ەرتەدە بىرەۋدىڭ قۇلا تۇلپارى بولىپتى. سول تۇلپاردىڭ تۇقىمىن كوبەيتەمىن دەپ، تۇلپاردىڭ قاسىنا بيە قوسىپ، ەكەۋىن تەڭىزدىڭ ورتاسىنداعى ادام جۇرمەيتىن ارالعا اپارىپ تاستاپتى. تۇلپار قاسقىرعا دا، ادامعا...
-
مال شارۋاشىلىعىمەن كۇن وتكىزگەن قازاق حالقىنىڭ ەرتىس بويىن مەكەندەيتىن ءبىر توبى قۇنارلى ولكەنى قۇتتى قونىسقا بالاپ، ۇزاق جىلدارىن سول ارادا وتكىزەدى. ەرتىس بويىنىڭ ءشوبى قۇنارلى، سۋاتى مول بولعاندىق...
