InfoHub Logo

ساۋساقتار ارقىلى مىنەز انىقتاۋ (تەست)
مۇنداي تەستەردى كوبىنە پسيحولوگيالىق ترەنينگتەردە وقۋشىلار مەن ستۋدەنتتەرگە جاساتادى. كىشكەنتاي تەستتەن ادامنىڭ بولمىسىن سۋرەتتەپ شىعۋعا، ارينە، بولماس، الايدا ءوزىڭىز جايلى كىشكەنتاي ماعلۇمات الۋعا بولادى.

1. ساۋساقتارىڭىزدى ءبىر - بىرىمەن ايقاستىرىڭىز.
ەگەر وڭ قولىڭىزدىڭ باس بارماعى سول قولىڭىزدىڭ باس بارماعىنىڭ ۇستىندە جاتسا، پاراققا «2» دەپ جازىڭىز، ەگەر سول قولىڭىز ۇستىدە جاتسا - «1».
2. ءبىر كوزىڭىزدى جۇمىپ، كەز كەلگەن نىساناعا دالدەپ كوزدەڭىز.
ەگەر سول كوزىڭىز اشىق قالسا، «1» سانىن جازىڭىز، ەگەر وڭ كوزىڭىز اشىق قالسا - «2».
3. قولىڭىزدى كەۋدەڭىزگە ايقاستىرىڭىز، قاي قولىڭىز ۇستىدە جاتىر؟
ەگەر سول قولىڭىز ساۋساقتارى وڭ قولىڭىزدىڭ ۇستىندە جاتسا، «1» سانىن جازىڭىز، ەگەر وڭ قولىڭىز ۇستىدە جاتسا - «2».
4. كولدەنەڭ شاپالاقتاڭىز.
ەگەر سول قولىڭىز ۇستىدە بولسا - «1»، ەگەر وڭ قولىڭىز بولسا، وندا «2».
قورىتىندىسىن سانداردىڭ ورنالاسۋ ءتارتىبى بويىنشا انىقتاڭىز:
«2222» - (ءجۇز پايىز وڭاقاي) – مىنەزى تۇراقتى، كونسەرۆاتيزم، بىرەۋلەرمەن شيەلەنىسۋدەن، ۇرسىسۋدان قاشادى.
«2221» - ەڭ ۇلكەن كەمشىلىگى – باتىلسىزدىق، تارتىنشاقتىق.
«2212» - وتە اشىق، كەز كەلگەن اداممەن ءتىل تابىسىپ كەتەدى.
«2111» - تۇراقسىزدىق، جالتاقتاعىش، بىرەۋدىڭ قولداۋى مەن پىكىرىنە تاۋەلدى، وزىنە سەنىپ ۇيرەنۋ كەرەك.
«2211» - مۇنداي ۇيلەسىم كوپ كەزدەسە بەرمەيدى. اشىق ادامدار، جاقسى قارىم - قاتىناس جاسايدى، ءارى مىنەزدەرى جۇمساق.
«2122» - بۇنداي ادامداردا اناليتيكالىق اقىل - وي جۇيەسى قالىپتاسقان، مىنەزى جۇمساق. بارىنە ساقتىقپەن قارايدى، ادامدارمەن ءوزىن سالقىنقاندى ۇستايدى.
«2121» - بۇل تىركەس تە سيرەك كەزدەسەدى، قورعانسىزدىق، ادامداردىڭ ىقپالىنا ۇشىراپ تۇرادى.
«1112» - وتە اسەرشىل، قايراتتى ءارى باتىل ادامدار.
«1222» - ءجيى كەزدەسەتىن مىنەز. اسەرشىل، الايدا ومىرلىك سۇراقتاردى شەشۋدە جىگەرلىك پەن باتىلدىق جەتپەي جاتادى، باسقالاردىڭ ىقپالىنا كونىپ كەتەدى. وتە اشىق، ادامدار وزدەرى تارتىلادى.
«1221» - اسەرشىل، باتىلدىق جەتىسپەيدى، مىنەزى جۇمساق، اڭعال.
«1122» - دوس جاندى ادامدار، ءبىراق سونىمەن قاتار اڭعال جانە قاراپايىم. ىستەرىن سارالاپ، ءوز - ءوزىن قازبالاۋعا قۇمار. قىزىعۋشىلىعى كوپ، ءبىراق ۋاقىتى جەتە بەرمەيدى.
«1121» - ادامدارعا قاتتى سەنەدى جانە مىنەزى وتە جۇمساق. كوبىنە شىعارماشىلىققا بەيىم ادامدار.
«1111» - (ءجۇز پايىز سولاقاي) – كەرتارتپا ادامدار. شىعارماشىلىققا وتە بەيىم. كوپتەگەن زاتتارعا ەرەكشە كوزقاراسپەن قارايدى. وتە اسەرشىل، داراشىلدىق، ەگويزم باسىم. قىڭىر ءارى ءوزىمشىل، ءبىراق بۇل ولارعا ءومىر سۇرۋگە كەدەرگى ەمەس.
«1212» - رۋحى مىقتى ادامدار. بىربەتكەي دەسە دە بولادى، قويعان ماقساتتارىنا جەتەدى.
«1211» - ءوز - ءوزىن قازبالاۋعا قۇمار، تۇيىق ادامدار، كوپكە اشىلمايدى، ءبىراق رۋحى مىقتى، الدىنا ماقسات قويسا ەشتەڭەدەن تايسالمايدى.
«2112» - جايدارى، ەركىن مىنەزدى، دوستاردى تەز تابادى، تانىسۋى دا وڭاي جانە قىزىعۋشىلىقتارىن دا ءجيى اۋىستىرادى.

مىنەزدى انىقتاۋ: وتىرىس - تۇرىسقا بايلانىستى
«كىمنىڭ كىم ەكەنىن قالاي تۇردەن تۇراتىنىنان، قالاي وتىراتىنىنان - اق بىلۋگە بولادى»، - دەيدى مىنەز - قۇلىق تانۋشى پسيحولوگ ماماندار.
وتىرعاندا...
تىزەڭىزدى ءبىرىنىڭ ۇستىنە ءبىرىن قويۋعا «اۋەس» بولساڭىز:
وزىڭىزگە ءوزىڭىز وتە سەنىمدىسىز. قانداي قيىندىقتى دا جەڭە الامىن، ماعان الدىرمايتىن، مەنىڭ شامام جەتپەيتىن ەش نارسە جوق دەپ بىلەسىز. شىنىندا دا جۇمىستا دا، تۇرمىس - تىرشىلىكتە دە ءسىز نەندەي تىعىرىققا تىرەلسەڭىز دە قينالماي شەشەسىز، بۇزىپ - جارىپ قالايدا شىعاتىن، بالە - جالانىڭ ءبارىن ارتتا قالدىراتىن كۇش - قايرات، تەسكىندىك تاباسىز. ءسىزدىڭ تاعدىر - تالايىڭىزعا ماقسات - مۇراتىڭىزعا قول جەتكىزىپ، جانىڭىز جايلانىپ عۇمىر كەشۋ جازىلعان.
ەكى اياعىڭىزدى ءبىر - بىرىمەن وراپ، ماتاپ «تاستاۋعا» داعدىلانساڭىز:

وزىڭىزگە - ءوزىڭىزدىڭ سەنىمىڭىز جوق، نە نارسەنى دە قولىڭىزدان كەلمەيتىندەي، شاما - شارقىڭىز جەتپەيتىندەي كورىپ، تايساقتاپ، قورعانشاقتايسىز دا جۇرەسىز. بۇگىن شەشەتىن، بۇگىن ىسكە اسىراتىن شارۋانى ەرتەڭگە قالدىرۋدى «جان تىنىشتىقتىڭ» ءبىر جولى سياقتى كورەسىز. «اجالدان باسقانىڭ ءبارى تەزىرەك بولعانى جاقسى» دەگەن قاعيدا سىزگە جۇرمەيدى. بىردەڭەلەرگە قول جەتكىزگىڭىز كەلسە شيراڭىز، باتىلدانىڭىز، ايتپەسە بارىنەن قورقىپ - ۇركىپ، كەجەگەڭىز كەرى كەتە بەرسە، قامشىنىڭ سابىنداي كەلتە عۇمىر وتەدى دە شىعادى.
اياقتى ايقاستىرىپ، العا سوزىپ جىبەرۋدى ادەت قىلساڭىز:

مىنەز - قۇلقىڭىز وكتەم، ماڭايىڭىزدى ءوزىڭىزدىڭ ايتقانىڭىزبەن جۇرگىزىپ - تۇرعىزعىڭىز كەلەدى. قاشاندا، قاي جەر، قاي ورتادا دا ءوزىڭىز باسشى، وزگەلەر قوسشى بولعانىن قالايسىز. باسقالار دا بار - اۋ دەمەي، اياقتى جامباسىڭىز جەر يىسكەدى دەگەنشە ايقاستىرىپ، الدىعا «لاقتىرىپ تاستايتىنىڭىز» دا سول «مەنەن وتكىن كىم بار» دەگەن ىشكى وكتەم پيعىلىڭىزدىڭ كورىنىسى. «الدىمەن ءسىز، سودان كەيىن عانا ءبىز» دەپ ءوزىڭىزدى ءپىر تۇتاتىن ورتا بولسا، جۇرتپەن ءتىل تابىسىپ، تىرشىلىك ەتۋ ءسىز ءۇشىن قيىننىڭ قيىنى. ءقادىر - قاسيەتىڭىز اسىپ، مىسىڭىز باسىپ تۇرماسا، كىم «بۇل تۇرعاندا، مەن بىلاي تۇرايىن» دەيدى... «ادامنىڭ كۇنى – اداممەن» بولعاسىن «اياز بي، ءالىڭدى ءبىل» دەگەندى ءبىراۋىق ەسكە العان ءجون.

ەكى تىزەنىڭ اراسىن قوسىپ، تابانىڭىزدى جەرگە توسەپ وتىرساڭىز:
ماعان كىم نە ىستەر ەكەن دەپ ۇنەمى قورعانىستا جۇرەتىنىڭىز بولماسا، ءوز تاراپىڭىزدان باستاما كوتەرۋگە، ارا - تۇرا بولسا دا الدەبىر ءىستىڭ باسىندا، تىزگىن ۇستاپ وتىرۋعا جوق ادامسىز. جۇرت ءوزىڭىزدى سابىرلى كورەدى، ءبىراق سىزدە ودان گورى تۇيىقتىق، جاسقانشاقتىق باسىم. بىرەۋ بەتىڭىزگە جەل بولىپ ءتيدى دەگەنشە رەنجىپ، مەسەلىڭىز قايتىپ، جاسىپ قالاسىز. ەشكىمگە قوسىلماي ساياق، وزىڭىزبەن ءوزىڭىز جۇرەتىنىڭىز دە سودان.

تاباننىڭ ۇشىن قوسىپ، وكشەنى الشاقتاتىپ وتىرۋعا ادەتتەنسەڭىز:
كىنامشىل، شامشىل ءبىراق باتىلدىققا ءۇش قايناسا سورپاسى قوسىلمايتىن جانسىز. سىزگە قاي ىستە دە بولادى، نە بولمايدى، جاقسى، نە جامان دەپ كەسىمدى پىكىر ايتۋدان قيىن نارسە جوق. كوپتەن تانيتىن بىرەۋلەرىڭىز بولماسا، ەشقانداي ورتاعا ءسىڭىسىپ، بىرەۋلەرمەن ەمەن - جارقىن ارالاسىپ - قۇرالاسىپ كەتە المايسىز. ويىڭىزدى دا، بويىڭىزدى دا شيراق ۇستاڭىز، وزىڭىزگە جەتپەي تۇرعان سول.