InfoHub Logo

باعانا باسىندا سويلەپ تۇرعان ۇلكەن راديو "قازالىدان سويلەپ تۇرمىز. جەرگىلىكتى ۋاقىت..." دەي بەرگەن كەزدە، ويناپ جاتقان كىشكەنتاي بالالاردىڭ شۋىلى سول ءسات تىنا قالىپ، بىر-بىرىنە: "تۇرا تۇرىڭدار! تۇرا تۇرىڭدارشى! قازالىدان سويلەپ جاتىر!" دەپ توقتاۋ سالا باستايتىن ەدى. الگى راديونىڭ ىشىندە سويلەپ تۇرعان ديكتوردىڭ داۋسى كاسىبي ديكتورلاردىڭ داۋسىنان بىردە-بىر كەم ەمەس ەدى. بۇل داۋىستى ەستىگەن جاندار مۇنى مويىنداعان.

اشەيىندە اپالارى شاقىرعاندا، ويىننان ەستىمەي قالىپ جاتاتىن بالالاردىڭ وسىلاي تىنا قالۋىنا ديكتوردىڭ داۋسىنىڭ كاسىبي ديكتورلاردىڭ داۋسىنا ۇقسايتىندىعى نەمەسە راديونىڭ قازالىدان سويلەپ تۇرعاندىعى دا سەبەپشى ەمەس، ولار ءقازىر تۋرا ءبىر مايدان حابارىن تىڭداعالى جاتقانداي، ءوز اۋىلدارىنىڭ ەگىن جيناۋدان نەشىنشى ورىندا كەلە جاتقاندىعىن بىلگىسى كەلىپ تۇر. ويتكەنى وسىعان بايلانىستى مالىمەتتى ءدال ءقازىر انا راديودا سويلەپ تۇرعان داۋىس وقيتىندىعىن ولار جاقسى بىلەدى. ەندى راديودان ءبىر ءسات لەكىتىپ بارىپ، ەكپىنگە تولى كۇيدىڭ داۋسى توگىلىپ شىعادى دا، ول بىرتە-بىرتە باسەڭ تارتىپ، ديكتوردىڭ داۋسى قايتادان ەستىلەدى. ديكتور وسى كەزدە الگى بالالار كۇتكەن مالىمەتتى وقي باستايدى. "كوش باستاپ كەلە جاتقان - ەنگەلس اتىنداعى سوۆحوز" دەگەن ءسوزدى ەستي سالا، بۇكىل بالا "الاقايلاپ" تۇرىپ قۋانىپ، اسپانعا سەكىرەدى. ولار ءوز اۋىلدارىنىڭ ەگىن جيناۋدان ءبىرىنشى ورىندا كەلە جاتقاندىعىنا قۋانادى. "ءبىزدىڭ اۋىل بۇل جولى دا ءبىرىنشى ورىندا كەلە جاتىر ەكەن! وتكەندە دە ءبىرىنشى ورىندا كەلە جاتقان! سول ورنىن ۇستاپ قالىپتى!" دەپ بالالار ماز-مەيرام بولادى. ءالسىن-السىن، قايتالاپ وقىلىپ تۇراتىن وسى ءبىر مالىمەتتە ولار ءوز اۋىلدارىنىڭ، ديكتور وقىعانداي، كوشباسىندا تۇرا بەرگەندىگىن قالايدى.

بالالاردىڭ بۇلاي قۋانۋىنىڭ تاعى دا ءبىر سەبەبى - ولار ەگىن جيناۋعا اتتانىپ بارا جاتقان تەحنيكالاردى ءوز كوزدەرىمەن ۇزاتىپ سالعان. ناق وسى راديو سويلەپ تۇرعان باعاناعا قاراما-قارسى، كوشەنىڭ ەكىنشى بەتىندەگى الاڭقايعا الگى تەحنيكالار كەلىپ تۇرعان. ولار تازالانعان، مايلانعان، جوندەلگەن، ءبىر سوزبەن ايتقاندا، ەگىن جيناۋعا ساقاداي ساي ازىرلەنگەن. تەحنيكالاردى باسقاراتىن جاندارعا باسشىلار مەن حالىق وسى ساتتە ءسات ساپار تىلەگەن. ەندى سول تەحنيكالار ءدال ءقازىر ەگىن جيناۋ ناۋقانىندا ءجۇر. ەگىن ورىلىپ جاتىر، استىق باستىرىلىپ جاتىر، ول قىرمانعا تاسىلىپ جاتىر، قالادان كومەككە كەلگەن تىركەمەلى كولىكتەر ونى اسفالت جولدىڭ ۇستىمەن تاسىپ الىپ كەتىپ جاتىر. ونىڭ ەسەبى شىعارىلىپ، وسى مالىمەتتەر ءجۋرناليستىڭ قالامىندا تۇرلەنۋدە. وسى راديوحاباردا وقىلىپ جاتاتىن مالىمەتتەردى دە اۋداندىق گازەتتىڭ ءجۋرناليسى دايىنداپ وتىر. ەگەر وسى جۋرناليست جازعان وچەركتى مىنا داۋىس وقىپ شىعار بولسا، ول اۋداندىق گازەتتىڭ بەتىنەن ءوزىڭ وقىپ شىققانداعىدان دا الدەقايدا اسەرلى ەستىلەر ەدى.

ەگىن جيناۋ ناۋقانى بىتىسىمەن، الگى تەحنيكالار قايتىپ كەلە جاتادى. ولار ەندى كەتكەندەگىدەي سان-سالتاناتپەن قايتپايدى. ۇزدىك-سوزدىق بولىپ قايتادى. ءارى كەتكەندەگىدەي تاپ-تازا كۇيىندە ەمەس، شىنجىرتاباندارعا باتپاق جۇققان. سەبەبى كۇرىش دەگەن داقىل الا جازداي سۋدا باستىرىلىپ تۇرعاندى كەرەك ەتەدى. ءبىراق تەحنيكالار وسى قالپىندا-اق سالتاناتتى. سەبەبى ولار ەڭبەكتەن قايتىپ كەلە جاتىر. ۇيدەي بولىپ، تانك سەكىلدى ارىلداپ-دارىلداپ، دالانى باسىنا كوتەرىپ كەلە جاتقان شىنجىرتاباندى تەحنيكا وتە بەرگەندە، بالالار: ايعاي سالادى:

"بۋنكەرگە قاراڭدار! بۋنكەردە جۇلدىزشالار سالىنعان! ال شتۋرۆالدا جالاۋشا قاداۋلى تۇر!"

دەمەك، جۇلدىزشالار مەن جالاۋشا تەگىننەن-تەگىن تۇرمايدى. ول ءوزى سەكىلدى تەحنيكالاردىڭ الدىنا شىققان دەگەن ءسوز. ۇيدەي تەحنيكالار ۇزدىك-سوزدىق ءوزىنىڭ شەبەرحاناسىنا قايتىپ بارا جاتادى. ولار ەندى كەلەسى ەگىسكە ءازىر تۇرۋى ءتيىس.

وسى بالالاردىڭ ىشىنەن دە كەيىن وسى تەحنيكالاردىڭ ءتىلىن مەڭگەرگەن ۇل-قىزدار ءوسىپ شىعادى. ويتكەنى ولاردىڭ مەكتەبىنىڭ ءبىر بولمەسىندە دە "سەلودا تۇرادى ەكەنسىڭ - تەحنيكانىڭ ءتىلىن ءبىل" دەگەن جازۋ ۇلكەن ارىپتەرمەن جازىلىپ، ءىلىنىپ قويىلعان. ولار ءقازىر تومەنگى سىنىپتاردا عانا وقيدى. ال الگى كابينەتكە ولار جوعارى سىنىپتا بارىپ وقي باستايدى. سونان سوڭ ولارعا تەحنيكانىڭ ماماندىعىنا ساي قۇجات بەرىلەدى. ونىڭ ەمتيحانىن ينجەنەر جىگىتتەردىڭ وزدەرى كەلىپ قابىلدايدى.

الگى بالالاردى ەلەڭ ەتكىزەتىن راديوحاباردىڭ سوڭعى جاعى ءاماندا بىلاي اياقتالۋشى ەدى:

"حاباردى دايىنداعان - راۋشانبەك سەيتەنوۆ. حاباردى وقىعان - ورداباي اياپبەرگەنوۆ".

---