InfoHub Logo

سەمەي قالاسىندا قارجى پيراميداسىنىڭ قۇربانى بولعان جۇزدەگەن ادام ءادىل سوت شەشىمىن كۇتىپ وتىر. جالپى كەلتىرىلگەن شىعىن كولەمى ميلليارد تەڭگەدەن اسىپ جىعىلادى. قازىرگى تاڭدا 100-دەن استام ادامدى جابىرلەنۋشى رەتىندە تانىلىپ، التى كۇدىكتىگە ايىپ تاعىلدى.

بۇل تۋرالى Infohub.kz اقپارات اگەنتتىگى حابارلايدى.

قارجى پيراميداسىنىڭ قۇرباندارى

قالا تۇرعىندارىنىڭ ءبىرى الداۋعا سەنىپ، ءوز ءۇيىنىڭ ورنىنا جارتى جىلدان بەرى جالدامالى پاتەردە تۇرىپ جاتقانىن ايتادى. ونىڭ سوزىنشە، بىرنەشە جىل بۇرىن وتباسى قارجى پيراميداسىن ۇيىمداستىرۋشىلارعا 15 ميلليون تەڭگە بەرگەن. تانىسىنىڭ سەندىرۋىمەن اقشا سالعان ايەل، بالالارىمەن بىرگە كەڭ ءۇيلى بولامىز دەپ ۇمىتتەنگەن. الايدا، ءقازىر بەس بالاسىمەن تۋىستارىنىڭ ءۇيىن پانالاپ ءجۇر.

«شىنىمدى ايتسام، ءبىزدىڭ جاعدايىمىزدى بىلەتىن، بەس بالام بار ەكەنىن، ەرەكشە قاجەتتىلىگى بار بالامىز بار ەكەنىن بىلە تۇرا ادامنىڭ وسىلاي ىستەيتىنىن ويلامادىم. سوت ءىسى ازىرگە العا باسپاي جاتىر. ءادىل شەشىم بولادى دەپ ۇمىتتەنەمىز»، - دەيدى جابىرلەنۋشى ايەل.

200 ميلليون تەڭگە جوعالتقان وتباسى

ءىرى سوماداعى اقشاسىن سالعانداردىڭ قاتارىندا كوپ بالالى اكە دە بار. ول ءوزىنىڭ 200 ميلليون تەڭگەگە جۋىق قارجىسىنان ايىرىلعانىن ايتادى.

«مەن «راحات» جشس-نا ەكى ءجۇز ميلليون تەڭگەگە جۋىق اقشا سالدىم. باستاپقىدا از-ازدان سالعانمەن، كەيىن سەنىم ارتتىرىپ، كوبىرەك سالدىق. ءبىراق ءبىزدىڭ سەنىمىمىزدى پايدالاندى. ەندى اقشامىزدى قايتارىپ الا الماي وتىرمىز»، - دەيدى ەر ادام.

زارداپ شەككەندەردىڭ ايتۋىنشا، كەيبىر ادامدار اقشاسىنان ايىرىلعان سوڭ، ونى كوتەرە الماي قينالعان. كوبىسى كولىك، باسپانا ساتىپ الىپ، بالالارىنا جارقىن بولاشاق سىيلاۋدى ارمانداعان. ءبىراق ۇمىتتەرى اقتالمادى. سەمەيدە رەسمي تۇردە 141 ادام قارجى پيراميداسىنان زارداپ شەككەنىن راستاعان.

تەرگەۋ دەرەكتەرى

تەرگەۋ مالىمەتتەرىنە سۇيەنسەك، اقشا تولەۋ جۇمىستارى قارجى پيراميدالارىنا ءتان ادىسپەن جۇرگىزىلگەن: ياعني، ءبىر سالىمشىنىڭ اقشاسى ەكىنشىسىنە اۋدارىلعان.

«جالپى كەلتىرىلگەن شىعىن ميلليارد تەڭگەدەن اسادى. بۇل سومانىڭ 200 ميلليون تەڭگەدەن استامى ءىشىنارا وتەلدى. قازىرگى ۋاقىتتا ءىس سوتتا قارالۋدا»، - دەپ مالىمدەدى اباي وبلىسى بويىنشا ەكونوميكالىق تەرگەۋ دەپارتامەنتى باستىعىنىڭ ورىنباسارى ساكەن قوندىبايەۆ.

قۇقىق قورعاۋ ورگاندارى ازاماتتاردى مۇنداي ۇسىنىستارعا اباي بولۋعا جانە ولاردى مۇقيات تەكسەرۋگە شاقىردى.