سەربيا

نوۆي-سادتاعى تراگەديادان كەيىن باستالعان جاپپاي نارازىلىق تولقىنى بەلگراد كوشەلەرىن ءدۇر سىلكىندىردى،دەپ حابارلايدى Infohub.kz.

سەربيا استاناسى بەلگرادتا 100 مىڭنان استام ادام كوشەگە شىعىپ، پرەزيدەنت الەكساندر ءۆۋچيچتىڭ وتستاۆكاسىن تالاپ ەتتى. بۇل ەل تاريحىنداعى ەڭ اۋقىمدى نارازىلىق اكسيالارىنىڭ ءبىرى رەتىندە باعالانىپ وتىر.

جاپپاي نارازىلىقتىڭ باستالۋىنا نوۆي-ساد قالاسىنداعى تەمىرجول ۆوكزالىنىڭ بەتون شاتىرىنىڭ قۇلاۋى سەبەپ بولدى. 15 ادامنىڭ ءومىرىن جالماعان بۇل اپات سەرب قوعامىندا تەرەڭ رەزونانس تۋدىردى. نارازى حالىق مۇنى بيلىكتەگى سىبايلاس جەمقورلىقتىڭ جانە نەمقۇرايلىلىقتىڭ سالدارى دەپ ەسەپتەيدى.

باستاپقىدا كوشەگە ستۋدەنتتەر شىقسا، كەيىن ولارعا فەرمەرلەر، مۇعالىمدەر، بايكەرلەر، قاراپايىم قالا تۇرعىندارى قوسىلدى. تراكتور ايداعان شارۋالار دا شەرۋگە قاتىسىپ، نارازىلىقتىڭ قانشالىقتى اۋقىمدى ەكەنىن كورسەتتى.

سەربيا پوليسياسىنىڭ مالىمەتىنشە، نارازىلىق اكسياسىنا كەمىندە 107 مىڭ ادام قاتىسقان. ەلدەگى وپپوزيسيالىق پارتيالار بۇل كورسەتكىشتىڭ بۇدان دا جوعارى ەكەنىن ايتادى.

پرەزيدەنت الەكساندر ۆۋچيچ بۇل شەرۋلەردى «سىرتقى كۇشتەردىڭ ايتاقتاۋى» دەپ اتاپ، قىزمەتىنەن كەتپەيتىنىن مالىمدەدى. الايدا، ۇكىمەتتەگى وزگەرىستەر باستالىپ ۇلگەردى—پرەمەر-مينيستر ميلوش ۆۋچيەۆيچ قىزمەتىنەن كەتتى.

شەرۋشىلەردىڭ باستى تالابى—ءۆۋچيچتىڭ بيلىكتەن كەتۋى، سىبايلاس جەمقورلىققا قارسى ناقتى رەفورمالار جۇرگىزۋ جانە ەلدەگى ادىلەتسىزدىككە توقتاۋ سالۋ. كوپشىلىك مۇنى سەربياداعى دەموكراتيالىق وزگەرىستەر ءۇشىن ماڭىزدى كەزەڭ دەپ باعالاپ وتىر.

بەلگرادتاعى نارازىلىقتار ءالى دە جالعاسۋدا. بۇل وقيعالار سەربيانىڭ ساياسي ساحناسىندا ۇلكەن وزگەرىستەر اكەلۋى مۇمكىن. حالىق بيلىككە ءوز داۋسىن ەستىرتە الا ما؟ بۇل الداعى كۇندەردىڭ ەنشىسىندە.