InfoHub Logo

شەرزات پولاتتى ولتىرگەندەرگە قاتىستى سوت ۇكىمى شىقتى

بۇگىن تالدىقورعاندا 16 جاستاعى شەرزات پولاتتى ءولتىرۋ ىسىنە قاتىستى سوت ۇكىمى جاريالاندى. بۇل رەزونانستى قىلمىس 2024 جىلدىڭ 4 قازانىندا تالعار قالاسىندا ورىن العان بولاتىن.

سوت شەشىمىمەن باستى ايىپتالۋشى ابزال شىناسىل 23 جىلعا باس بوستاندىعىنان ايىرىلدى. ول ق ر قىلمىستىق كودەكسىنىڭ 99-بابى 2-بولىگى (ادام ءولتىرۋ)، 293-باپتىڭ 3-بولىگى (بۇزاقىلىق) جانە 24-باپتىڭ 3-بولىگى (قىلمىس جاساۋعا وقتالۋ) بويىنشا كىنالى دەپ تانىلدى.

قالعان ايىپتالۋشىلارعا مىناداي جازا تاعايىندالدى:

راۆيل ساكييەۆ — 20 جىل (بۇزاقىلىق جانە ادام ولتىرۋگە وقتالۋ)،

ازامات توقتاۋبايەۆ — 15 جىل (بۇزاقىلىق جانە ۇرلىق)،

شىڭعىس بەلعوجايەۆ، دارحان اسكەنتاي، نۇرقياس ءىلياسوۆ، نۇربول توقتاۋبايەۆ، ديدار قالياحمەت — ءارقايسىسى 7 جىل (بۇزاقىلىق)،

دۋمان ىسقاق — 1 جىل 6 اي (قىلمىس تۋرالى حابارلاماۋ).

2025 جىلدىڭ 10 ساۋىرىندە باستالعان سوت پروسەسى ەكى ايعا جۋىق ۋاقىتقا سوزىلدى. ءىس اياسىندا 40-تان استام سوت ساراپتاماسى جاسالىپ، 200-گە جۋىق كۋاگەردەن جاۋاپ الىنعان. تەرگەۋ بارىسىندا 8 بەينەماتەريال تالدانىپ، كۇدىكتىلەرمەن بەتتەستىرۋ مەن وقيعا ورنىنا تەكسەرۋ جۇرگىزىلگەن.

3 ماۋسىم كۇنى سوتتالۋشىلار سوڭعى ءسوزىن ايتتى. ايىپتالۋشى نۇربول توقتاۋبايەۆ توپتىڭ اراسىندا بولعانىن مويىنداپ، ەشكىمگە قول كوتەرمەگەنىن ايتتى. شىڭعىس بەلعوجايەۆ تەرگەۋدە اتى اتالعان قارجاۋبايدى كۇدىكتى رەتىندە تانۋدى سۇرادى. نۇرقياس ءىلياسوۆ عايىپبايەۆتى ۇرعانىن مويىنداپ، ءبىراق شەرزاتقا قول تيگىزبەگەنىن ايتتى. ديدار قالياحمەت ءوزىن كىناسىزبىن دەپ ەسەپتەسە، باستى ايىپتالۋشى ابزال شىناسىل دا ءوز كىناسىن جوققا شىعاردى. ول تەك عايىپبايەۆتى پىشاقتاعانىن، ال شەرزاتپەن بەتپە-بەت كەلمەگەنىن مالىمدەدى.

بۇل ءىس قوعامدا ۇلكەن رەزونانس تۋدىرعان بولاتىن. مەملەكەتتىك ايىپتاۋشى بارلىق ايىپتالۋشىلاردى كىنالى دەپ تانۋدى جانە ولارعا قاتاڭ جازا تاعايىنداۋدى سۇراعان.