InfoHub Logo

شۋ قالاسىندا ادام سەنگىسىز جاعداي ورىن الدى. جەرگىلىكتى اۋرۋحانانىڭ دارىگەرلەرى جۇكتى ايەلدىڭ ءولىمىن جاسىرماق بولعان، دەپ حابارلايدى Infohub.kz اقپارات اگەنتتىگى Todayinfo.kz ينستاگرام اككاۋنتىنا سىلتەمە جاساپ.

5 ناۋرىز كۇنى جۇكتىلىكتىڭ 34ء-شى اپتاسىندا بولعان كەلىنشەك تۇسىك قاۋپىمەن شۋ قالاسىنداعى كوپسالالى اۋرۋحاناعا تۇسكەن. 9 ناۋرىز كۇنى كەشكە ونىڭ جاعدايى كۇرت ناشارلاپ، كوماعا تۇسەدى. دارىگەرلەر 10 ناۋرىزدا شۇعىل وتا جاساپ، ىشتە شەتىنەگەن نارەستەنى العان. الايدا كەلىنشەك ەسىن جيماستان، ەكى كۇننەن كەيىن جان تاپسىرعان.

قايتىس بولعانى تۋرالى ەشقانداي رەسمي مالىمدەمە جاسالماعان. پوليسياعا دا، وبلىستىق دەنساۋلىق ساقتاۋ باسقارماسىنا دا حابار بەرىلمەگەن.

مارقۇمنىڭ كۇيەۋى ايەلىن جانساقتاۋ بولىمىنەن تاپپاي، اۋرۋحانانىڭ تۇكپىر-تۇكپىرىن ارالاپ ىزدەگەن. اقىرى، كۇدىكتى ءيىس شىققان باعىتقا بارا جاتىپ، ايەلىنىڭ ءىسىپ كەتكەن دەنەسىن اۋرۋحانانىڭ تەحنيكالىق جەرتولەسىنەن تاۋىپ العان.

بۇل وقيعانىڭ ەڭ سوراقى تۇسى – دارىگەرلەر ءمايىتتى ارنايى ءمايىتحاناعا تاپسىرۋدى دا ويلاماعان.

اتالعان وقيعا قوعامدا ۇلكەن شۋ تۋعىزدى. دەنساۋلىق ساقتاۋ سالاسىنا دەگەن سەنىمگە سەلكەۋ ءتۇسىرىپ، مەديسينا قىزمەتكەرلەرىنىڭ جاۋاپكەرشىلىگىنە قاتىستى كوپ سۇراق تۋىندادى. قۇقىق قورعاۋ ورگاندارى مەن دەنساۋلىق ساقتاۋ باسقارماسى بۇل جاعدايعا قاتىستى قانداي شارا قولداناتىنى ازىرگە بەلگىسىز.