InfoHub Logo

ناۋرىز مەرەكەسى كەزىندە شىعىس قازاقستان وبلىسىنىڭ دومبىراشىلارى گيننەسس رەكوردتار كىتابىنا ەندى دەگەن حابار تارادى. الايدا، كەيبىر وقىرماندار بۇل اقپاراتتىڭ شىندىعىنا كۇمان كەلتىردى.

بۇل تۋرالى Infohub.kz اقپارات اگەنتتىگى حابارلايدى.

رەكورد ورناتۋ تۋرالى نە بەلگىلى بولدى؟

بۇعان دەيىن شىعىس قازاقستان وبلىسى اكىمدىگىنىڭ حابارلاۋىنشا، وسكەمەندەگى رەسپۋبليكا الاڭىندا 5201 دومبىراشى ءبىر مەزگىلدە «اقبۇلاق» ءانىن ورىنداعان. شارا ناۋرىزدى تويلاۋعا ارنالعان. جەرگىلىكتى بيلىك مالىمەتى بويىنشا، وسى ءىس-شارا بارىسىندا الەمدىك رەكورد ورناتىلعان.

وبلىس اكىمى نۇرىمبەت ساقتاعانوۆقا رەكوردتى گيننەسس رەكوردتار كىتابىنا ەنگىزۋ تۋرالى سەرتيفيكات سالتاناتتى تۇردە تابىستالعان. بۇل جاڭالىقتى قازاقستاندىق باق-تار كەڭىنەن تاراتتى.

سەرتيفيكات پەن ۇيىم اراسىنداعى ايىرماشىلىق

الايدا، بەرىلگەن سەرتيفيكات Guinness World Records حالىقارالىق ۇيىمىنىڭ رەسمي قۇجاتتارىنان وزگەشەلەنىپ شىقتى. ونىڭ ۇستىنە، سەرتيفيكاتتى «كينەس قازاقستان» اتتى جەكە قۇرىلىم بەرگەن.

بۇل جايتقا جۋرناليست اباي سەيفۋللاۋلى دا نازار اۋدارىپ، الەۋمەتتىك جەلىدە كۇمان ءبىلدىردى. ونىڭ پىكىرىنشە، ناۋرىز مەرەكەسىندە وتكەن اۋقىمدى فلەشموب قاتەلىكپەن گيننەسس رەكوردى رەتىندە جاريالانعان بولۋى مۇمكىن.

«كينەس» پەن «گيننەس»: ايىرماشىلىعى نەدە؟

اشىق دەرەككوزدەرىنە سۇيەنسەك، «كينەس قازاقستان» جوباسى Guinness World Records حالىقارالىق ۇيىمىمەن ەشقانداي بايلانىسى جوق. بۇل – قازاقستاندىقتاردىڭ ءتۇرلى جەتىستىكتەرىن تىركەيتىن جانە ۇلتتىق رەكوردتار كىتابى رەتىندە جۇمىس ىستەيتىن جەكە باستاما.

ال Guinness World Records – الەمدىك رەكوردتاردى تىركەيتىن حالىقارالىق ۇيىم بولىپ سانالادى.