InfoHub Logo

شىمكەنت قالاسىندا كوشە تازالاۋعا ارنالعان ارنايى تەحنيكا جۇرگىزۋشىلەرى جۇمىسقا شىعۋدان باس تارتتى. بۇل جاعداي قالانى شاڭ-توپىراققا كومدى. جۇرگىزۋشىلەردىڭ ايتۋىنشا، ولارعا قولايسىز جۇمىس جاعدايلارى مەن ەڭبەكاقىنىڭ ازدىعى ۇنامايدى.

بۇل تۋرالى Infohub.kz اقپارات اگەنتتىگى حابارلايدى.

جۇرگىزۋشىلەردىڭ ءبىرى، باقىتجان تولەيەۆتىڭ ايتۋىنشا، جۇمىس كەستەسى ساعات 9-دان 6-عا دەيىن دەپ بەلگىلەنگەنىمەن، كەيدە جۇمىستى كەشكى ساعات 9-دا، 10-دا، ءتىپتى ءتۇن ورتاسىندا اياقتايدى ەكەن. كەيبىرى تاڭعى ساعات 4-كە دەيىن جۇمىس ىستەگەن. الايدا، قوسىمشا جۇمىس ءۇشىن قوسىمشا اقى تولەنبەيدى، ءتىپتى دەمالىس كۇندەرى دە جۇمىسقا شىعۋعا ماجبۇرلەيدى.

«ەگەر باس تارتساڭ، بىردەن «بوسسىڭ» دەيدى»، - دەيدى ول.

سونداي-اق، جۇرگىزۋشىلەر ارنايى تەحنيكانىڭ مايىن اۋىستىرۋ، بولشەكتەرىن ساتىپ الۋ سياقتى جوندەۋ جۇمىستارىن ءوز قالتالارىنان جاساۋعا ءماجبۇر ەكەندەرىن ايتادى. باسشىلىققا شاعىمدانعاندا، ولارعا جۇمىستان كەتۋ تۋرالى ايتىلادى ەكەن.

«ول كىسىمەن ادامشا سويلەسە المايدى. بۇل ادامگەرشىلىككە جاتپايدى! پرەزيدەنتتىڭ جارلىعى، مۇگەدەكتەردىڭ قۇقىعى مۇلدەم قورعالمايدى! ول كىسىنى بۇل ويلامايدى. ق ر زاڭدارى وعان ەشتەڭە ەمەس!» - دەپ اشۋلاندى قارلىعاش دەربەسوۆا ەسىمدى جۇمىسشى.

كاسىپورىن ديرەكتورى نۇرجان تولەبەكوۆ بۇل ايىپتاردى جوققا شىعارىپ، مۇنى تەك «تۇسىنبەۋشىلىك» دەپ اتادى. ونىڭ ايتۋىنشا، جۇمىسشىلار ءوز ەسەبىنەن ەشتەڭە ساتىپ المايدى جانە التى كۇندىك جۇمىس اپتاسىنا كوشۋ تۋرالى تەك ءبولىم باسشىسىنىڭ دۇرىس تۇسىندىرمەۋىنەن تۋىنداعان.

جۇمىسشىلاردىڭ تالاپتارىن قالا اكىمىنىڭ ورىنباسارى تىڭدادى. ناتيجەسىندە، جۇمىستان شىعارۋ قاۋپىمەن جۇمىسشىلاردىڭ ءبىر بولىگى جۇمىسىنا ورالدى. الايدا، 180 ادام كاسىپورىنعا پروكۋراتۋرا مەن ەڭبەك ينسپەكسياسىنىڭ تەكسەرۋ جۇرگىزۋىن تالاپ ەتتى.