قاراماي ساقالىڭا، شالدىعىڭا،
جاراسىپ تۇرۋشى ەدى قالجىڭىم دا.
قارابايداي قاتايىپ الىپسىڭ عوي،
اتا،سەن، شىنىمەنەن الجىدىڭ با؟!
سۇرىڭ دا، ءسۇحباتىڭ دا سونداي بوتەن!
بۇيىمىم بار،
ۇيىڭە قونباي كەتەم.
...جىلاماعان سابيگە ەمشەك بەرمەس،
جىلاماسام الدىندا بولمايدى ەكەن.
مەن سەنى سىيلاماسام، تۇسىنبەسەم،
جۇرمەس ەڭ ءار جىرىمنىڭ ىشىندە سەن.
و، مەنىڭ پايعامبارىم!
سەن بولماساڭ،
ءتىرى پەندە الدىندا كىشىرمەس ەم.
ات باسى التىن بەرسە تابىلماعان،
ەنشىم بار مەنىڭ سەندە الىنباعان!
قوبىزىڭ ەمەس پە ەدىم قولىڭداعى،
ۇمىتتىڭ نەگە مەنى جانىم-بابام؟
قاتىباس ومىردەن مەن پايدا المادىم،
جانىممەن جازعان جىرىم - جايعان مالىم.
قىلىشىڭ ەمەس پە ەدىم قىناپتاعى،
جوعالتتىڭ نەگە مەنى پايعامبارىم؟!
ات باسى التىن بەرسە تابىلماعان،
سىباعام قايدا مەنىڭ الىنباعان؟
...ءبىر ءتۇيىر كارى كوزدىڭ جاسى ەمەس پە ەم،
ۇشىندا ساقالىڭنىڭ دامىلداعان؟!

---