سىرىم باتىر مەن اقليما
سىرىم باستاعان ءبىر توپ اتتىلى ادامدار تىكەلەي شاۋىپ كەلىپ نۇرالى حان وتىرعان كيىز ۇيگە كەلىپ، اتتارىن توقتاتا سالىپ، جانىنداعى قىلىشىن قىنابىنان سۋىرىپتى دا، اشۋلى ەكپىنمەن نۇرالى جاتقان ۇيگە سىرىم جەتىپ كەلگەندە، ونىڭ الدىنان نۇرالىنىڭ كوپ قاتىنىنىڭ ءبىرى بولعان سىرىمنىڭ تۋعان قارىنداسى اقليما شىعا كەلىپ، اعاسىنا مىناداي توقتاۋ ايتىپتى:
— سابىر، سابىر، كوكەشىم،
اشۋدى اقىل بيلەيتىن.
اشۋدى اقىل بيلەسە،
باتىر مىڭدى جەڭەتىن.
قاستەرىن تىككەن قالىڭ جاۋ
اقىلسىز ەكەن دەمەسىن.
حاننىڭ باسىن قارىنداسىڭا
ساۋداعا بەرىپ كەتەرسىڭ.
كورە الماعان قاي دۇشپان
بەرە الماي كەتتى دەمەسىن.
بەكارىستىڭ بالاسى—
قايراتىڭ مۇحيت ەر ەلسىڭ.
دەگەنىڭە جۇرمەسە،
ايتقانىڭا كونبەسە،
قولىڭا قىزىل تۋ الىپ،
قول الدىنا جەلەرسىڭ.
مەن دە داتتان باسقا بوپ،
تۋعان جوقپىن دەسەم، نە دەرسىڭ؟!
سىرىم اقليمانىڭ سوزىنە توقتاپ: «ءاي، شىراعىم-اي، ءيتتىڭ باسىن سۇراپ نە قىلعانىڭ؟» — دەپتى دە، قولىنداعى قىلىشىن قىنابىنا سالىپ، اتىنا ءمىنىپ ءجۇرىپ كەتىپتى دەسەدى.
You Might Also Like
-
ياساۋي دەگەن ءبىر بيلەۋشى بيلىك قۇرىپ تۇرعان. قىستا سامارقاندا تۇرىپ، جازدا تۇركىستان تاۋلارىندا ءومىر سۇرەتىن. بارلىق تۇركى بيلەۋشىلەرى سياقتى، اڭ دەسە، ىشكەن اسىن جەرگە قوياتىن بۇل پاديشاھ جازدى تۇرك...
