سىيلىق
راۋان تاڭەرتەڭگىلىك پاپاسى مەن اجەسىنىڭ كۇبىر-كۇبىر اڭگىمەسىن ەستىپ قالدى. ۇققانى: بۇگىن ماماسىنىڭ تۋعان كۇنى ەكەن. ايتپاقشى، اپكەسى مەرۋەرت پەن اعاسى ەركىن سوڭعى كەزدەرى جۇمىسباستى بولىپ كەتكەن ەدى. اپكەسى ساباقتان كەلىسىمەن كەستە تىگۋگە وتىرادى، ال اعاسى الدەقانداي راكەتانىڭ نوبايىن جاساپ اۋرە. ەندى ءتۇسىندى. ولار دا ماماسىنا سىيلىق دايىنداپ ءجۇر ەكەن عوي.
وسىدان كەيىن-اق راۋاننىڭ مازاسى كەتتى. اجەسى كۇيبەڭدەپ اس ۇيدە ءجۇر. بۇعان نازار دا اۋدارمايدى. اپكەسى سياقتى كەستە تىگۋ دە، اعاسى ءتارىزدى راكەتا قۇراستىرۋ دا قولىنان كەلمەيدى. ءبىرىنشى سىنىپقا بارعانى جاقىندا، ونى قايدان ءبىلسىن؟ ءبىراق ماماسىنىڭ تۋعان كۇنىنە سىيلىق ۇسىنبايتىنى جانىنا قاتتى باتىپ تۇر.
«جاز كۇندەرى بولسا عوي، — دەپ ويلادى راۋان، — وندا ۇيلەرىنىڭ تۇبىندەگى جاسىل باۋدان ءبىر بۋدا گۇل تەرىپ اكەلىپ، سۇيىكتى ماماسىنا سىيلار ەدى». راۋان شاراسىزدانا كۇرسىنىپ، اق قىراۋ ورنەك سالعان تەرەزەدەن دالاعا كوز تاستادى.
كەنەت شارباقتىڭ جوعارى بولىگىندەگى بەلدەۋدەن تومەن قاراي سورعالاپ تۇرعان مۇز سۇڭگىسىنە كوزى ءتۇستى. ءموپ-مولدىر، اينەكشە جىلتىرلايدى. الاقاي، تابىلدى! ماماسىنا ءمۇز سۇڭگىسىنىڭ بىرنەشەۋىن نەگە تارتۋ ەتپەسكە. اق ناۋاتتاي قىتىرلاق ءدامى قانداي شىركىننىڭ!
راۋان اجەسىنە بىلدىرمەي دالاعا شىقتى. بوي جەتەتىن جەردە ەمەس، مۇز ەداۋىر بيىكتە. ءسۇپ-سۇيىر وتكىر ۇشىنان ءمولدىر مونشاق تامشى سورعالايدى.
اپپاق ۇلپا قاردان جەنتەكتەپ الدى دا جىبەرىپ قالدى. مۇنداي ساتتىلىك بولا بەرمەس. نىساناعا ءدال تيگەن قار جەرگە ەكى-ۇش سۇڭگىنى ۇشىرىپ ءتۇسىردى.
كەشكىسىن قوناقتار مەرەكەلىك داستارقانعا جينالدى. كوزىلدىرىكتى اعاي ءسوز سويلەدى. سونان سوڭ ماماسىنا قوناقتار جانە پاپاسى سىيلىقتار ۇسىندى. ال اپكەسى مەن اعاسىنىڭ تارتۋىنا ماماسى عانا ەمەس، قوناق كىسىلەر دە ريزا بولدى.
— پاپا، ماماما مەنىڭ دە ازىرلەگەن سىيلىعىم بار.
مۇنى قوناقتار دا ەستىپ قويىپتى.
— وھو، جىگىت بولدى دەگەن وسى!
— جارايسىڭ، راۋان!
— كانە، كورسەتشى سىيلىعىڭدى.
ولار جەر-كوككە سىيعىزباي ماقتاسىپ جاتىر. راۋان بولمەسىنە جۇگىرە جونەلدى. ءماسساعان! تارەلكاعا سالىپ، تەرەزەنىڭ الدىنا قويعان كۇمىس سۇڭگىدەن تۇك تە قالماپتى. سىيلىعىنىڭ ەرىپ كەتكەنىن ەندى عانا بىلگەن ول وكىنىشتەن جىلاپ جىبەرە جازدادى. ۇلىنىڭ كەشىككەنىنە مازاسىزدانىپ، بولمەگە ەنگەن پاپاسى ءمان-جايدى ءتۇسىنىپ، ەرىكسىز قارقىلداپ كۇلىپ جىبەردى. سىيلىق تۋرالى اڭگىمەنى ەستىگەن قوناق اپايلار مەن اعايلار دا ماز-مەيرام. اسىرەسە اعاسى ءىشىن باسىپ كورشى بولمەدە دومالاپ جاتىر. راۋاننىڭ جانارىنا جاس مونشاقتارى ىركىلدى.
— اينالايىن، بالاپانىنان! — ماماسى راۋاندى قاپسىرا قۇشاقتاپ، كەۋدەسىنە قىستى. — كانە، بەتىمنەن ءسۇيشى.
بۇل اناسىنىڭ بەتىنەن ءشوپ وتكىزىپ ءسۇيىپ الدى.
— مىنە، ماعان وسىدان ارتىق سىيلىقتىڭ كەرەگى دە جوق، — دەدى ماماسى.
راۋاننىڭ ءجۇزى قۋانىشتان بال-بۇل جانىپ، اعاسىنا قوقيلانا قارادى.
You Might Also Like
-
پارلامەنت ءماجىلىسىنىڭ جالپى وتىرىسىندا «پەداگوگ مارتەبەسى تۋرالى» زاڭ جوباسى ەكىنشى وقىلىمدا ماقۇلداندى.
-
بريتاندىق گراففيتي-سۋرەتشى، ساياسي بەلسەندى، رەجيسسەر، الەمدەگى ەڭ تانىمال جانە جۇمباعى مول كوشە سۋرەتشىسى. ءار ءتۇرلى قوعامدىق ورىنداردا — لوندون، برايتون، بريستولدەگى عيمارات قابىرعالارىندا ج...
