InfoHub Logo

25 شىلدەدە قورعانىس مينيسترلىگى وتىرار اۋدانىندا جوسپارلى ۇشۋ بارىسىندا قارۋلى كۇشتەرى اۋە قورعانىسى كۇشتەرىنىڭ EC-145 تىكۇشاعى راداردان جوعالعانىن حابارلادى. سول ساتتەن باستاپ جەدەل ىزدەستىرۋ جۇمىستارى باستالىپ، بەرىلگەن باعىت بويىنشا اۋە تەكسەرىستەرى جۇرگىزىلدى. سوربۇلاق سۋ قويماسى ماڭىن قاراۋ كەزىندە قازعارىش سۋرەتتەرىنەن جانارماي ءىزى بايقالىپ، سۋ قويماسىنا جاقىن جەردەن تىكۇشاقتىڭ بىرنەشە بولشەگى تابىلدى. سۋ استىنداعى جۇمىستار بارىسىندا ق ر قارۋلى كۇشتەرىنىڭ اسكەري قىزمەتشىلەرى شامامەن 14 مەتر تەرەڭدىكتەن اۋە كەمەسىنىڭ ءىشىنارا سىنىقتارى مەن ءبىر ادامنىڭ ءمايىتىن انىقتادى. ارنايى شتاب قۇرىلىپ، ىزدەۋ شارالارى جالعاسقانىمەن، اپات ورنىن تولىق تازارتۋ بىرنەشە كۇنگە سوزىلدى.

اپاتتا قازا تاپقان كومانديردى تۋعان جەرىندە، تۇركىستان وبلىسى تولەبي اۋدانىنىڭ لەنگىر قالاسىندا سوڭعى ساپارعا شىعارىپ سالدى.

— جاستايىنان اسكەري بولۋدى ارماندادى عوي. كىشكەنتايىنان تارتىپكە باعىنىپ، ءبىزدى دە تارتىپپەن جۇرگىزەتىن. اسپاندا قالىقتاپ ءجۇرۋدى بالا كەزىنەن ارماندادى. بۇكىل ءومىرىن وسى اسكەري اۆياسياعا ارنادى. كۇندىز-تۇنى ۇشتى، مىڭداعان ساعاتتار جينادى. قاتارىنان قالماي ءبىلىم الدى، جاڭا شىققان وقۋ بولسا، بىرەۋىن دە جىبەرمەيتىن. تەحنيكاسىن جان-تانىمەن جاقسى كورەتىن. «اناشىم، اسپاندا ۇشسام، قۇستاي قالىقتايمىن» دەيتىن، – دەپ ەسكە الدى مارقۇمنىڭ اناسى.

2010 جىلى اقتوبەدەگى «اۋە قورعانىسى» وقۋ ورنىنا تۇسكەن ول 15 جىل بويى اۋەدە ءمىنسىز قالىقتاۋ ءۇشىن ءبىلىمىن جەتىلدىرىپ، مىڭداعان ساعاتتىق تاجىريبە جيناعان. تەحنيكاسىنا بەرىلگەن وفيسەر قاتارلاستارى اراسىندا ابىرويلى بولدى. تۋىستارى ونىڭ بەت-جۇزىنىڭ اپاتتان كەيىن دە ساقتالعانىن تاعدىردىڭ سوڭعى سىيى دەپ قابىلدادى.