InfoHub Logo

اتىراۋ وبلىسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتىندا مۇقانعالييەۆتەر وتباسىنىڭ بىرنەشە مۇشەسىن ءولتىردى دەپ ايىپتالعان سۇلتان سارسەمالييەۆكە قاتىستى سوت پروسەسىندە تىڭ دەرەكتەر ايتىلدى.

بۇل تۋرالى Infohub.kz اقپارات اگەنتتىگى حابارلايدى.

تەرگەۋ ماتەريالدارىنا سايكەس، كۇدىكتى قىلمىستان كەيىن مارقۇمداردىڭ مۇلكىن يەمدەنىپ، سول قارجىعا شەتەلگە قاشقان. ءىس قۇجاتتارىندا جوعالعان وتباسى مۇشەلەرىنىڭ بالالارى ءبىراز ۋاقىت سۇلتان سارسەمالييەۆتىڭ اناسىنىڭ قاراۋىندا بولعانى دا كورسەتىلگەن.

شەتەلگە قاشۋ جوسپارى

قۇقىق قورعاۋ ورگاندارى ىزدەستىرۋ جۇمىستارىن باستاعانىن تۇسىنگەن كۇدىكتى اتىراۋدان شۇعىل كەتۋگە شەشىم قابىلداعان. تەرگەۋ مالىمەتىنشە، ونىمەن بىرگە اقبايان مۇقانعالييەۆا دا ەلدەن كەتكەن. ايىپتاۋ اكتىسىندە سارسەمالييەۆتىڭ ونى قازاقستاندا قالدىرۋ ءقاۋىپتى دەپ ساناعانى ايتىلعان.

قىلمىستىق ءىس ماتەريالدارىنا سايكەس، 2025 جىلدىڭ 9 جەلتوقسانىندا سارسەمالييەۆ پەن مۇقانعالييەۆا «قاپلانبەك» وتكىزۋ بەكەتى ارقىلى وزبەكستانعا وتكەن. ودان ءارى تاشكەنت – كۋالا-لۋمپۋر – بالي باعىتىمەن ۇشىپ، يندونەزيانىڭ بالي ارالىنا جەتكەن.

باليدەگى ۇستالۋ

ولار يندونەزيادا ەكى ايدان استام ۋاقىت بويى جاسىرىنىپ جۇرگەن. الايدا 2026 جىلدىڭ 24 اقپانىندا يندونەزيانىڭ كوشى-قون قىزمەتى ۆيزالىق رەجيمدى بۇزعانى ءۇشىن ەكەۋىن دە ۇستاعان. كەيىن كۇدىكتىلەر قازاقستانعا دەپورتاسيالانعان.

تەرگەۋ بارىسىندا 2026 جىلدىڭ 9 ناۋرىزىندا سۇلتان سارسەمالييەۆتىڭ قاتىسۋىمەن جۇرگىزىلگەن تەكسەرۋ كەزىندە مۇنايشى ىقشاماۋدانىنداعى ءۇي اۋلاسىنان مۇقانعالييەۆا مەن ءقاراباليننىڭ جەرلەنگەن مايىتتەرى تابىلعان.

ايتا كەتەيىك، ءتورت ادامدى ءولتىردى دەپ ايىپتالعان سۇلتان سارسەمالييەۆكە قاتىستى الدىن الا سوت تىڭداۋى 18 مامىردا باستالدى. سوت بارىسىندا ول ءوز كىناسىن مويىنداپ، ءولىم جازاسىنا دا دايىن ەكەنىن مالىمدەگەن.