InfoHub Logo

قازاقستاننىڭ اۆياسيالىق اكىمشىلىگىنىڭ (ءقاا) جاڭا باس ديرەكتورى مايكل دەنيەل ەلىمىزدىڭ اۋەجايلارىنا جاساعان ساپارىنان العان اسەرلەرىمەن ءبولىستى. ول كەيبىر اۋەجايلاردى اقش-تاعىمەن سالىستىرىپ، قازاقستاننىڭ باسىمدىعىن اتاپ ءوتتى.

بۇل تۋرالى Infohub.kz اقپارات اگەنتتىگى حابارلايدى.

اۋەجايلاردىڭ جاي-كۇيى

ءقاا مالىمەتىنشە، قازاقستاندا 104 اۋە كەمەسىنىڭ ەكسپلۋاتانتى جۇمىس ىستەيدى. ەلدە 973 اۋە كەمەسى تىركەلگەن. سونداي-اق، 25 اۋەجاي، 28 اۋە كەمەسىنە تەحنيكالىق قىزمەت كورسەتۋ جانە جوندەۋ ۇيىمى، 21 اۆياسيالىق وقۋ ورتالىعى سەرتيفيكاتتالعان.

اقش-تان ارتىقشىلىعى

«جەكە تاجىريبەمدى بولىسكىم كەلەدى. تۇركىستان مەن شىمكەنت اۋەجايلارىنا بارعاندا جولاۋشىلارعا كورسەتىلەتىن قىزمەتتىڭ ساپاسى مەنى قاتتى تاڭ قالدىردى. مەنىڭ ويىمشا، بۇل ەكى اۋەجاي دا امەريكا قۇراما شتاتتارىنداعى وسىنداي كولەمدەگى اۋەجايلاردىڭ ستاندارتتارىنا ساي نەمەسە ولاردان اسىپ تۇسەدى»، - دەدى مايكل دەنيەل ۇكىمەت وتىرىسىندا.

اۋەجاي ماڭىنداعى پروبلەمالار

باس ديرەكتور قازاقستاندىق اۋەجايلاردا ءالى دە بار كەيبىر پروبلەمالاردى دا اتاپ ءوتتى. سونىڭ ءبىرى – اۋەجاي ماڭىنداعى قوقىس پوليگوندارى.

«اتىراۋ، سەمەي، وسكەمەن، كوكشەتاۋ، بالقاش جانە ءۇرجار اۋەجايلارىنىڭ ماڭىندا ورنالاسقان قوقىس پوليگوندارى اۋە كەمەلەرىنىڭ قۇستارمەن سوقتىعىسۋ ءقاۋپىن ارتتىرادى جانە اۆياكومپانيالار ءۇشىن پايدالانۋ شەكتەۋلەرىن تۋدىرادى. 2025 جىلى اۋە كەمەلەرىنىڭ قۇستارمەن 280 رەت سوقتىعىسۋى تىركەلسە، بيىلعى ءبىرىنشى توقساندا بۇل كورسەتكىش 33-كە جەتتى»، - دەدى ءقاا باسشىسى.

ونىڭ ايتۋىنشا، اتىراۋ اۋەجايى ماڭىنداعى قوقىس پوليگونى قۇستاردى تارتادى جانە ۇشۋ قاۋىپسىزدىگىنە قاتەر توندىرەدى.

«ەكىنشى ماسەلە – اۋەجايلار اۋدانىنداعى كەدەرگىلەردىڭ كوبەيۋى جانە جەردى ماقساتسىز پايدالانۋ. الماتى اۋەجايىنىڭ ماڭايىنداعى اۋماقتا 160-قا جۋىق كەدەرگى انىقتالسا، شىمكەنت اۋەجايى اۋدانىندا 150-دەن استام كەدەرگى بار»، - دەپ قوستى دەنيەل.

شەشىم جولدارى

بۇل پروبلەمالاردى شەشۋ ءۇشىن ءقاا اۋەجاي ماڭىنداعى اۋماقتاردى ايماقتاۋ جوسپارلارىن ازىرلەپ، اكىمدىكتەرگە جولداعان. الايدا، كوپ جاعدايدا بۇل جوسپارلار ەلدى مەكەندەردى دامىتۋدىڭ باس جوسپارلارىنا ەنگىزىلمەگەن، بۇل اۋەجايلار ماڭىندا جاڭا نىساندار مەن كەدەرگىلەردىڭ پايدا بولۋىنا سەبەپ بولىپ وتىر.

«اكىمدىكتەرمەن ءوزارا ءىس-قيمىلدى كۇشەيتۋ قاجەت، بۇل ءوز كەزەگىندە ۇشۋ قاۋىپسىزدىگىن جانە اۋەجايلاردىڭ تۇراقتى دامۋىن قامتاماسىز ەتۋدىڭ ماڭىزدى شارتى بولىپ قالا بەرەدى»، - دەپ مالىمدەدى مايكل دەنيەل.

تەكسەرۋلەر مەن شارالار

اۆياسيا اكىمشىلىگى باسشىسىنىڭ ايتۋىنشا، 2025 جىلى جانە 2026 جىلدىڭ ءبىرىنشى توقسانىندا ولار ازاماتتىق اۆياسيا سالاسى سۋبەكتىلەرىنە 1 202 تەكسەرۋ جۇرگىزگەن. 7 اۆياكومپانياعا قاتىستى ەكسپلۋاتانت سەرتيفيكاتتارىن توقتاتا تۇرۋ نەمەسە كەرى قايتارىپ الۋ شارالارى قولدانىلعان. سونداي-اق، 4 اۆياسيالىق وقۋ ورتالىعىنىڭ قىزمەتى مەن 2 اۋە كەمەسىنە تەحنيكالىق قىزمەت كورسەتۋ جانە جوندەۋ ۇيىمىنىڭ سەرتيفيكاتتارىنىڭ قولدانىسى توقتاتىلعان. بۇعان قوسا، 8 اەرودرومعا قاتىستى 15 شەكتەۋ ەنگىزىلگەن.

ەسكە سالا كەتەيىك، مايكل دەنيەلدى قازاقستاننىڭ اۆياسيالىق اكىمشىلىگىنىڭ باسشىسى قىلىپ بيىل 4 مامىردا تاعايىنداعان بولاتىن. ول اۆياسيا سالاسىندا ارنايى ءبىلىمى بار، ەمبري-ريددل اتىنداعى اەروعارىش ۋنيۆەرسيتەتىن (اقش) «اەروناۆتيكا» ماماندىعى بويىنشا بىتىرگەن. ونىڭ ازاماتتىق اۆياسيا سالاسىندا 40 جىلدان استام تاجىريبەسى بار. ازاماتتىق اۆياسيا كوميتەتى حابارلاعانداي، جاڭا باسشىنىڭ نەگىزگى مىندەتتەرىنىڭ ءبىرى قازاقستاننان اقش-قا تىكەلەي رەيستەر اشۋ بولماق.