InfoHub Logo

تاكسي جۇرگىزۋشىلەرىنىڭ ەندى تاكسوپارككە تىركەلمەي-اق، ءوز بەتىنشە جۇمىس ىستەۋىنە زاڭ اياسىندا مۇمكىندىك بەرىلۋى مۇمكىن. بۇل تۋرالى ءماجىلىس دەپۋتاتتارىنىڭ ساۋالىنا جاۋاپ بەرگەن پرەمەر-مينيستردىڭ ورىنباسارى رومان سكليار مالىمدەدى.

سكلياردىڭ ايتۋىنشا، قازىرگى تاڭدا Yandex Go، Uber، Glovo، InDrive سياقتى سيفرلىق پلاتفورمالار ازاماتتارعا يكەمدى جۇمىسپەن قامتىلۋ مۇمكىندىگىن ۇسىنىپ وتىر. بۇل سەرۆيستەر نارىقتاعى باسەكەلەستىك پەن جەكە كاسىپكەرلىكتىڭ دامۋىنا سەرپىن بەرگەن. ماسەلەن، «ياندەكس.تاكسي كورپ» ج ش س – تاكسي قىزمەتىنە ارنالعان اقپاراتتىق-ديسپەچەرلىك جۇيەلەر نارىعىندا تۇراقتى ورىنعا يە ءىرى وپەراتورلاردىڭ ءبىرى.

كومپانيا جولاۋشى تاسىمالىنا بايلانىستى كوميسسيانى تاريف تۇرىنە (ەكونوم، كومفورت، بيزنەس، قالاارالىق جانە ت.ب.) جانە قىزمەت كورسەتىلەتىن ەلدى مەكەندەگى سۇرانىس دەڭگەيىنە قاراي ۇستايدى. الايدا جۇرگىزۋشىلەردىڭ تابىسىنا تۇسەتىن سالماقتى ازايتۋ ماقساتىندا، انتيمونوپوليالىق اگەنتتىك پەن «ياندەكس» كومپانياسى اراسىندا كومپلاەنس كەلىسىم جاسالعان.

سكليار نە دەيدى:

— بازالىق تاريفتەن ەكى ەسە جوعارى بولسا، كومپانيا ارتىق سومادان كوميسسيا ۇستامايدى. ياعني بۇل اقشا تولىق جۇرگىزۋشىنىڭ تابىسى رەتىندە قالادى. بۇل – جۇرگىزۋشىلەردىڭ تابىسىن ادىلەتتى ەتۋگە باعىتتالعان ماڭىزدى قادام، – دەلىنگەن ۆيسە-پرەمەردىڭ جاۋابىندا.

ءقازىر بۇل سالادا جاڭا زاڭنامالىق وزگەرىستەر ازىرلەنىپ جاتىر. ەگەر وزگەرىس قابىلدانسا، تاكسي جۇرگىزۋشىلەرى تاكسوپارككە تاۋەلدى بولماي، تىكەلەي پلاتفورمالارمەن جۇمىس ىستەي الادى. بۇل كولەڭكەلى ەكونوميكامەن كۇرەسىپ، سالىقتىق اشىقتىقتى ارتتىرۋعا ىقپال ەتپەك.