InfoHub Logo

قازاقستانعا العاش رەت رەسمي ساپارمەن كەلگەن حالىقارالىق كينولوگيا فەدەراسياسىنىڭ (FCI) پرەزيدەنتى تاماش ياككەل اقورداداعى تازى ءمۇسىنى مەن اسەم باقشانى كورىپ، ريزاشىلىعىن ءبىلدىردى. ول سونداي-اق، قازاقستان پرەزيدەنتىنە ۇلتتىق ءيتىمىز – تازى تۇقىمىن ساقتاۋ مەن دامىتۋعا كورسەتكەن جەكە قامقورلىعى ءۇشىن العىس ايتتى.

بۇل تۋرالى Infohub.kz اقپارات اگەنتتىگى حابارلايدى.

تاماش ياككەلدىڭ ايتۋىنشا، FCI ەكى جىل بۇرىن تازى تۇقىمىن رەسمي تۇردە مويىنداعان. وتكەن جىلى حەلسينكيدە وتكەن الەمدىك كورمەدە تازى تۇقىمىنان شىققان يت «الەم چەمپيونى» اتاعىن يەلەنگەن. بۇل – قازاقستان كينولوگتارى وداعىنىڭ زور ەڭبەگىنىڭ ناتيجەسى.

تازى – ۇلتتىق ماقتانىش

«تازى – بۇل تەك يت ەمەس، ول قازاق حالقىنىڭ ۇلتتىق مادەني مۇراسىنىڭ ءبىر بولىگى. بۇل تۇقىمنىڭ الەمدىك كينولوگيادا لايىقتى ورنىن الۋىنا قۋانىشتىمىن»، – دەدى تاماش ياككەل.

ول سونداي-اق، پرەزيدەنتتىڭ جەكە ۇيىندە تازى ءيتى بارىن بىلگەنىن ايتىپ، اقورداداعى تازى ءمۇسىنى ورناتىلعان باقشانىڭ كوركەمدىگىنە ءتانتى بولعانىن جەتكىزدى.

كينولوگيانى دامىتۋداعى مەملەكەتتىك قولداۋ

FCI پرەزيدەنتى كينولوگيا سالاسىنداعى ماماندارعا مەملەكەت تاراپىنان كورسەتىلەتىن قولداۋدىڭ ماڭىزدى ەكەنىن اتاپ ءوتتى. ول قازاقستاننىڭ كينولوگيانى دامىتۋعا قوسقان ۇلەسىن جوعارى باعالاپ، فەدەراسيا جۇمىسىنىڭ حالىقارالىق دەڭگەيدەگى ماڭىزدىلىعىن ايتىپ ءوتتى. FCI بەرگەن قۇجاتتار مەن شەجىرەلەر الەمنىڭ 100 ەلىندە جارامدى.

«مەن ءسىزدىڭ ماماندارىڭىزعا قولداۋ كورسەتۋدى سۇرادىم. ساپاعا قولداۋ كورسەتكەن ساياساتكەر نەمەسە پرەزيدەنت – بۇل ەل ازاماتتارى ءۇشىن ۇلكەن باقىت. مەن سىزدەردىڭ تاماشا ەلىڭىزبەن جاقىنىراق تانىسىپ، كوبىرەك جاقسى ەستەلىكتەرمەن كەتۋگە ۇمىتتەنەمىن. وسى دەمالىس كۇندەرى مەن حالىقارالىق يت كورمەسىندە تورەشى بولامىن. بۇرىن-سوڭدى 60 تازىنى بىردەي كورگەن ەمەسپىن. سوندىقتان بۇل شارانى اسىعا كۇتىپ ءجۇرمىن»، – دەدى تاماش ياككەل.

ايتا كەتەيىك، 30 ساۋىردە مەملەكەت باسشىسى قاسىم-جومارت توقايەۆ FCI پرەزيدەنتى تاماش ياككەلدى اقوردادا قابىلدادى. كەزدەسۋدە وتاندىق يت ءوسىرۋدى دامىتۋ جانە تۇقىمدىق گەنوفوندتى ساقتاۋ ىسىندە حالىقارالىق فەدەراسيامەن ىنتىماقتاستىق پەرسپەكتيۆالارى تالقىلاندى.