InfoHub Logo

اڭداردىڭ پاتشاسى ارىستان بايگە جاريالاپتى. ءبىر قازان سۋدى قايناتتىرىپ قويىپ:

— وسى سۋدى كىم ءىشىپ قويسا، كوپ سىيلىق بەرەمىن، – دەگەن شارت قويىپتى.

اڭدار بىرىنەن سوڭ ءبىرى كەلىپ، قانشا وجەتتەنسە دە قايناپ تۇرعان سۋدى ىشۋگە باتىلدارى بارماپتى.

ەڭ سوڭىندا قويان كەلىپ، قىپ-قىزىل شوقتا تۇرعان قازاندى كوتەرىپ الادى دا:

— ىستىقتاي ءىشۋدى وتە جاقسى كورەمىن، – دەپ جان-جاعىنا قارايدى.

— ەندەشە، ىشە عوي، – دەيدى اڭدار اڭتارىلىپ.

قويان ۇزىننان-ۇزاق قاز-قاتار ءتىزىلىپ تۇرعان اڭداردى جاعالاي ءجۇرىپ:

— مىنەكي، دوستارىم، مىناۋ ىستىق سۋ. كوزدەرىڭمەن كورىڭدەر! – دەپ، باس-باسىنا كورسەتىپ شىعادى.

ءسويتىپ، قويان اڭداردى باسىنان اياعىنا دەيىن ارالاپ شىققانشا، قازانداعى سۋ سۋىپ قالادى. سول كەزدە قويان سۋدى باسىنا ءبىر-اق كوتەرىپ، ءسىمىرىپ سالادى. شوشىنعان اڭدار اۋىزدارىن اشىپ، كوزدەرىن جۇمىسادى.

ال الدانعان ارىستان پاتشا قويانعا كوپ-كوپ سىيلىقتار بەرگىزىپ:

— مىنە، ناعىز ەر! – دەپ ماقتاپتى.