InfoHub Logo

تاربيەشىلەرگە ارنالعان پسيحولوگيالىق ترەنينگ:
«مەن كەرەمەتپىن»
ماقساتى: تاربيەشىلەردىڭ ەموسيونالدى كوڭىل - كۇيلەرىن كوتەرۋ، كاسىبي شەبەرلىكتەرىن ارتتىرۋ جانە توپتاسىپ جۇمىس ىستەۋدى دامىتۋ.
قاتىسۋشىلار: تاربيەشىلەر.
جۇمىس ءتۇرى: توپتىق جۇمىس.
كورنەكىلىگى: تاقتا، ءۇنتاسپا

بارىسى:
جۇرگىزۋشى: سالەمەتسىزدەر مە، قۇرمەتتى ارىپتەستەر! ءبىزدىڭ بارلىعىمىز دا ۇنەمى تابىس بيىگىنەن كورىنىپ كەرەمەت بولعىمىز كەلەدى. ال ەندى «كەرەمەت» دەگەنىمىز نە؟ ءبىزدىڭ بۇگىنگى كەزدەسۋىمىزدە وسى كەرەمەت ءسوزىن پەداگوگيكالىق تۇرعىدان تالداپ كورەيىك. ەندى بارلىعىمىز «كەرەمەت» سوزىنە ۇقساس ءبىر - ءبىر سوزدەن ايتىپ كورەيىك: يدەال، ۇلگىلى، وتە جاقسى، تاماشا ت. ب.

جۇرگىزۋشى: قازاق ءتىلىنىڭ تۇسىندىرمە سوزدىگىندە «كەرەمەت» سوزىنە انىقتاما بار: بۇل «ۇزدىك، وتە جاقسى، عاجايىپ، تاماشا» دەگەن ماعىنانى بەرەدى. ەندى وسى وتە جاقسى قاسيەتتەردى ءوز بويىمىزدان ىزدەپ كورەيىك، كەرەمەت بولماسا دا بويىمىزدا تاڭ قالارلىق، ەلدى ەلەڭ ەتكىزەرلىك مىنەز بولۋى مۇمكىن.
جۇمىسىمىزدى باستاماس بۇرىن تانىسىپ الايىق.

شاتتىق شەڭبەرى: «تانىس بولايىق»
تانىسۋ ەرەجەسى: قاتىسۋشىلار شەڭبەر بويىمەن تۇرادى. ساعات ءتىلى بويىمەن ءارقايسىسى ءوز ەسىمىن اتاپ، ەسىمى جايلى، ەسىمىنە سايكەس مىنەز - قۇلقى جايلى قىسقاشا ايتىپ وتەدى. اركىمنىڭ تانىسۋى ءبىر - بىرىنە ۇقساماۋى ءتيىس.(مىس. تانىس بولايىق: مەنىڭ ەسىمىم ايسۇلۋ (بولار - بولماس باسىمدى يەمىن (ەكىنشى ءبىرى – يىلەدى ) ت. ب.)

«كوڭىلدى مۋزىكا» ويىنى
ماقساتى: بويداعى شارشاۋدان، سترەسستەن ارىلۋ.
شارتى: شەڭبەر بويىمەن تۇرىپ، ءبىر - ءبىرىنىڭ يىقتارىنا قولدارىن قويادى. مۋزىكانىڭ ىرعاعىمەن شەڭبەردى اينالا وتىرىپ بيلەپ، يىققا اقىرىن ساۋساق قيمىلدارىمەن ماسساج جاسايدى. ويىن كەرى قايتالانىپ وتىرادى.

جۇرگىزۋشى: راحمەت، بۇل ءبىزدىڭ سەرگىتۋ جاتتىعۋىمىز بولاتىن. ترەنينگىمىزدىڭ كەلەسى بولىمىنە وتەمىز. ءبىرىنشى بولىمدە ءبىز «كەرەمەت» ءسوزىنىڭ ماعىناسىن ايقىنداۋعا تىرىستىق. تاقىرىبىمىزدى ودان ءارى اشۋ ءۇشىن كەرەمەت دەگەن ۇعىمدى بالالاردىڭ كوزىمەن (وقۋشىلاردىڭ) تۇسىنۋگە تىرىسىپ كورەمىز.
ول ءۇشىن ەكى توپقا بولىنەمىز: 1 - توپ: باستاۋىش سىنىپ وقۋشىلارى (بالدىرعان توبى)، 2 - توپ: جوعارى سىنىپ وقۋشىلارى (بالاۋسا توبى). جايلى، جاقسى وتىرىپ الىڭىزدار، ەكى قولدارىڭىزدى تىزەگە قويىپ، ورىندىققا ارقالارىڭىزدى تيگىزىپ جايلانىپ وتىرىپ، كوز الدارىڭىزعا باستاۋىش جانە جوعارى سىنىپتاعى كەرەمەت پەداگوگتارىڭىزدىڭ جاقسى قاسيەتتەرىن ەستەرىڭىزگە تۇسىرىڭىزدەر.

قورىتىندى: «بالدىرعان» توبىنىڭ پىكىرى: پەداگوگ مەيىرىمدى، ءادىل، ادەمى، كوڭىلدى بولۋى كەرەك.
«بالاۋسا» توبىنىڭ پىكىرى: پەداگوگ ءوز ماماندىعىنىڭ كاسىبي شەبەرى، قاتاڭ، قازىرگى تالاپقا ساي، جاڭاشىل بولۋى كەرەك.

جۇرگىزۋشى: ال ەندى سىزدەر قازىرگى كەيىپتەرىڭىزگە ەنىپ، تاجىريبەلى، كەرەمەت پەداگوگ بولۋعا تىرىسىڭىز. ەكى توپ بىرىگە وتىرىپ باستاۋىش سىنىپتاعى جانە جوعارى سىنىپتاعى ۇستازدارىڭىزدىڭ ەستەرىڭىزگە تۇسكەن جاقسى قاسيەتتەرىن
تالقىلاپ كورەلىك. تاقتاعا جازامىز. ءبىزدىڭ ەسىمىزگە تۇسكەن تاماشا پەداگوگقا ءتان جاقسى ساپالار: ءادىل، كاسىبي شەبەر، مەيىرىمدى، جاڭاشىل ت. ب. ءبىزدىڭ بويىمىزدان تابىلادى دەپ ويلايمىن، ياعني ءبىز – كەرەمەتپىز!

رەلاكساسيا: (باياۋ مۋزىكا اۋەنى وينالادى.) كوزىمىزدى جۇمامىز. دەنەمىزدى بوس ۇستايمىز. سىزدەر وزەن جاعاسىندا وتىرسىزدار، سۋدىڭ اۋەلگى شۋىلى قۇلاعىڭىزعا جاعىپ، كۇن شۋاعى دەنەڭىزدى جىلىتادى. جالاڭ اياق قۇمنىڭ ۇستىندە جۇرسىزدەر، قۇم اياقتارىڭىزدى كۇيدىرىپ بارادى. سۋ دەنەلەرىڭىزدى جەڭىلدەتىپ ءوزىڭىزدى جاقسى سەزىنۋدەسىز. وتە جاقسى دەم الدىق. قانداي عاجاپ تابيعات دەگەن، تازا اۋا، جۇمساق قۇم، جىلى سۋ، تابيعات دەگەن قانداي تاماشا! كەڭ دەم الامىز، اقىرىن دەمىمىزدى شىعارامىز. ءبىزدىڭ باسىمىز ارتىق ويلاردان تازاردى. ءبىز وزىمىزگە كۇنى بويعا جەتەر جىگەر، قۋات جينادىق، ءبىزدىڭ كوڭىلىمىز قۋانىشتى. ءبىز وسى ومىردەگى ەڭ باي، بايسالدى، ءبىلىمىمدى، كەرەمەت جاندارمىز!
ەندى اقىرىن - اقىرىن كوزىمىزدى اشامىز. ءبىر - بىرىمىزگە قۋانىشتى سەزىممەن قارايمىز. ءبىز قانداي باقىتتىمىز!، قانداي كەرەمەتپىز!
ءبىزدىڭ كەزدەسۋىمىز اياقتالىپ كەلە جاتقان سەكىلدى. بۇگىنگى جۇمىسىمىزدىڭ ناتيجەسىنە ورالا وتىرىپ، ناعىز «كەرەمەت» پەداگوگتاردىڭ مىقتى جاقتارىن ەسكە تۇسىرە وتىرىپ ءبىر - بىرىمىزگە كومپليمەنت ايتايىق.

«كومپليمەنت» ويىنى
ماقساتى: قاتىسۋشىلاردىڭ ءتىل تابىسا الۋىن، ءبىر - ءبىرىن تولىق تانۋىن دامىتۋ.
قاتىسۋشىلار شەڭبەر بويىمەن تۇرىپ كەزەكپەن كەز - كەلگەن جاعىمدى كومپليمەنت ايتادى (ءبىزدىڭ تاقىرىپتا مىس. «وتە جاڭاشىل»، «ناعىز كاسىبي پەداگوگ»ت. ب.)، ال قالعاندارى ول كومپليمەنتتىڭ كىمگە ارنالعانىن تابادى. كومپليمەنت يەسى ويىندى ارى قاراي جالعاستىرادى. بارلىعى جاعىمدى كومپليمەنت المايىنشا ويىن جالعاسا بەرەدى.

جۇرگىزۋشى: ءبىزدىڭ سىزدەرمەن كەزدەسۋىمىز اياقتالدى. ەگەر تاقىرىبىمىزعا كەلەتىن بولساق، «كەرەمەت» دەگەن تۇسىنىك ءبىر نارسەنىڭ بىتكەنىن، اياقتالعانىن بىلدىرەدى (مىس. كەرەمەت ءۇي ەكەن ت. ب.) ءبىراق ءبىزدىڭ جولىمىز بىتكەن جوق، ءبىز ءاردايىم قوزعالىستامىز. كوزدەگەن ماقساتىمىزعا جەتكەندە ءبىزدىڭ الدىمىزدان تاعى دا وزگە جاڭالىقتار اشىلادى، قازىرگى داۋىردە، ياعني 21 - عاسىردا جاڭالىقتىڭ شەگى جوق. ولاي بولسا جاڭاشىل 21 - عاسىردىڭ كەرەمەت پەداگوگتارى بولا بەرەيىك!
مەن سىزدەرگە شىعارماشىلىق تابىستار تىلەيمىن!