InfoHub Logo

استانادا وتكەن رەسپۋبليكالىق جاستار فورۋمىنىڭ پلەنارلىق وتىرىسىندا جاستار ق ر پرەمەر-مينيسترىنىڭ ورىنباسارى يمانعالي تاسماعامبەتوۆتەن ەلىمىزدەگى ءۇش تۇعىرلى ءتىل ساياساتىنا قاتىستى پىكىرىن سۇرادى.

ۆيسە-پرەمەردىڭ ايتۋىنشا، ورىس ءتىلى - كەشەگى وتارشىلىق زاماننان باستاپ قانىمىزعا سىڭگەن ءتىل. ول حالقىمىزعا الەمنىڭ ءبىلىم ەسىگىن اشقان ءتىل. سوندىقتان، بۇل بارىمىزگە تۇسىنىكتى نارسە.

«ال، اعىلشىن ءتىلى - بۇل بولاشاقتىڭ ءتىلى. جالپى تەحنيكا، تەحنولوگيا، وركەنيەتتەن قالمايمىز دەسەك، مىندەتتى تۇردە اعىلشىن ءتىلىن ءبىلۋىمىز كەرەك. بۇل ءتىپتى شارتتى تۇردە ءبىلۋىمىز كەرەك. ونى بىرەۋ ءتۇسىنۋى مۇمكىن، بىرەۋ تۇسىنبەۋى مۇمكىن. ءبىراق جاستار، سىزدەر شەتتە وقىپ كەلگەن جاستار، باسقا مەملەكەتتەردە ءتىل ماسەلەسى قالاي دامىدى، زەرتتەۋ جۇمىستارى، تەحنولوگيالار، تاعى باسقامەن تانىسىپ كەلگەن جاستار ونى بىلەسىزدەر، تۇسىنەسىزدەر. سىزدەر قولدايسىزدار دەپ بىلەمىن»، - دەدى يمانعالي تاسماعامبەتوۆ ءۇشتۇعىرلى ءتىل ساياساتىنا قاتىستى جاۋابىندا.

ۆيسە-پرەمەر ءتىل ساياساتىنا كەلگەندە وزەكتى بولىپ وتىرعان ماسەلە - ول انا ءتىلىنىڭ دامۋى جونىندە ەكەنىن ايتتى. ول وسىناۋ 25 جىلدىڭ ىشىندە ەلباسىنىڭ تاپسىرماسى بويىنشا ۇكىمەت قازاق ءتىلىنىڭ قولدانۋ اياسىن كەڭەيتۋ ءۇشىن ءبىرشاما جۇمىستار اتقارعاندىعىن اتادى.

«بىرىنشىدەن، زاڭ قابىلدانىپ، قاجەتتى قاراجات ءبولىندى. ماماندار دايىندالدى. بۇگىنگى كۇنى قاراپ وتىرساڭىزدار، پارلامەنتتەگى جالپى جيىنداردىڭ بارلىعى قازاق تىلىندە وتەدى. ۇكىمەتتىڭ ءماجىلىسى قازاق تىلىندە وتەدى. ءبىراق، ءبىر نارسە تۇسىنىكسىز. ءبىز وسى كۇنگە دەيىن، قازاق ءتىلى وزگە ەمەس، وزىمىزگە كەرەك ەكەنىن تۇسىنبەي كەلەمىز. جالپى قازاق ءتىلى دەگەن حالىقتىڭ جانى. بۇدان ارتىق ايتا المايسىڭ»، - دەپ مالىمدەدى جاستار فورۋمىنىڭ پلەنارلىق وتىرىسىندا سويلەگەن ق ر پرەمەر-مينيسترىنىڭ ورىنباسارى يمانعالي تاسماعامبەتوۆ.

ي. تاسماعامبەتوۆ جينالعان جاستارعا ءتىل ماسەلەسى كوتەرىلگەندە ەلباسىنىڭ 25 جىل بويى ايتىپ جۇرگەنى - ول ەڭ الدىمەن «قازاقتىڭ قازاقپەن قازاقشا سويلەسۋى» ەكەنىن ايتتى.

«مىنە ماسەلە وسىندا. ءبىز ءوز ءتىلىمىزدى ءوزىمىز قۇرمەتتەسەك، ءبىز وعان شىن مانىندە جاناشىرلىق بىلدىرسەك عانا ءتىلدىڭ بولاشاعى بولادى. ءتىل بار جەردە قازاق بار. ءتىل جوق جەردە قازاق جوق. سوندىقتان ءتىل ماسەلەسىنە كەلگەندە بار سەنەتىنىمىز - جاستار، سىزدەر»، - دەپ قاداپ ايتتى يمانعالي تاسماعامبەتوۆ.