تىرتىقتىڭ سىرى
دىردان ەڭ سوڭعى پارتادا وتىرادى. بىلتىرعى مەكەنى دە وسى ەدى، كلاستا قالىپ قويعان سوڭ بيىل دا ءوزىنىڭ سۇيىكتى ورنىنا قايتا يە بولدى. بيىلعى وقۋ جىلىنىڭ العاشقى قوڭىراۋى سوعىلماستان بۇرىن ءدال وسى ورىندا ساپار دەيتىن بالا وتىر ەدى، دىردان:
— ءاي، بالا، جالپيماي، جوعالت كوزىڭدى بۇل جەردەن، — دەپ قوڭق ەتتى.
— نەگە؟ — دەدى ساپار جۇلىپ العانداي.
— نەگە-نەگەدە شارۋاڭ بولماسىن. بۇل ورىن مىنا اعاڭدىكى، كوتەر وكشەڭدى.
ساپار ورىندى بوساتقاندا، دىردان قايىس باۋلى قارا سومكەنى پارتانىڭ ۇستىنە بىلش ەتكىزىپ ءبىر ۇردى دا، وتىرا كەتتى.
بۇل قارا سومكەنىڭ كورمەگەن قورلىعى جوق. مويىنعا اسىپ جۇرۋگە ىڭعايلى دەپ، دىردان ۇيىندەگى تۋلاقتان ءتىلىپ الىپ، باۋ تاققان. كىلتىن جوعالتىپ، قۇلپىسىن بۇزعان.
ال ءبىر نارسە الاردا، سالاردا تىرسيىپ تۇرعان سومكە زورعا اشىلادى. ساباق بىتكەندە دىردان بالالاردىڭ ەڭ سوڭىنان قالادى، ويتكەنى سومكەنى جابۋ ءبىر قيامەت. ءبىر شەگەمەن ارى-بەرى ءتۇرتىپ، ارەڭ دەگەندە جابادى.
دىردان ەشقانداي وزگەرمەگەن. سول قارا سومكە، سول دورەكى مىنەز، پىشىلداعان تاڭقى مۇرىن. ايتپاقشى، ءبىر جاڭالىعى — شەكەسىنە جاڭا تۋعان ايداي بوپ تۇسكەن تىرتىق.
بيىلعى جاڭا جولداستارى بۇل تىرتىقتىڭ ءمانىسىن سۇراعاندا، ول:
— ءبىزدىڭ باس نە كورمەدى دەيسىڭ، باۋىرىم. سەن مەنىڭ كورگەنىمنىڭ ءبىرىن دە كورگەن جوقسىڭ... بۇل تىرتىقتىڭ تاريحىن ايتسام، سەندەر تالىپ قالاسىڭدار. ءتۇن شىرتتاي قاراڭعى ەدى، كولحوزدىڭ قاۋىنىنا كەپ كىردىم. دورباعا ءۇش قاۋىندى سالعانىم سول ەكەن، مىلتىق تارس ەتە ءتۇستى. «ءولدى دەگەن وسى» دەپ، تۇرا كەپ قاشتىم. سويتسەم، الگى قاراۋىل شال مەنى سەزىپ قالىپتى. زىتىپ كەلەم، ول قۋىپ كەلەدى. ءبىر كەزدە وڭقا-شوڭقامنان ءتۇستىم. قاراۋىل شال «ءا، ءباتشاعار، ءباتشاعار» دەپ، جانىمنان زۋ ەتىپ وتە شىقتى. ۇيگە كەلىپ قاراسام، ءدال شەكەمدى شوگىر جىرىپ كەتىپتى.
— ءوزىڭ ءتىپتى ۇرى ەكەنسىڭ عوي، — دەدى ساپار كەكەتە سويلەپ.
— بۇل ۇرلىق ەمەس، سيىر ۇرلاعاندى ۇرلىق دەيدى. قاۋىن ۇرلاۋ ۇرلىققا جاتپايدى، — دەپ دالباسالادى دىردان، بەكەر ايتتىم-اۋ دەگەن كەيىپپەن. قوڭىراۋ سوعىلىپ، ءمۇعالىم كەلگەندە دىردان تاپىراقتاپ بارىپ ورنىنا وتىردى. اپىل-عۇپىل، تىرسيعان قارا سومكەنى الا سالىپ، بۇيىردەن ءبىر پەرگەندە، مۇقاباسى سيا-سيا، مۇجىلعان كىتاپ ۇشىپ ءتۇستى.
— ءاي، دىردان، دىردان، بيىل قالاي وقىر ەكەنسىڭ؟..
You Might Also Like
-
ءتىل تاعدىرىنا قامقورلىق – ءار ادامنىڭ مىندەتى. «انا ءتىلى حالىق بولىپ جاسالعاننان بەرى جان دۇنيەسىنىڭ ايناسى، ءوسىپ-ونىپ، تۇرلەنە بەرەتىن ماڭگى قۇلامايتىن بايتەرەگى» دەيدى ج. ايماۋىت...
-
ازات — مۇحتاردىڭ اعاسى، باقانداي ءۇش جاس ۇلكەندىگى بار. ۇلكەنى مومىن دا، كىشكەنتايى تەنتەك. ەكىنشى كلاسس دەگەندى قومسىنىپ، «ەكىنشى كۋرستا وقيمىن» دەيدى مۇحتار. ونداعىسى وزىمەن بىرگ...
