InfoHub Logo

اقش پرەزيدەنتى دونالد ترامپ بارلىق مەملەكەتتەردى يادرولىق قارۋدان تولىقتاي باس تارتۋعا شاقىردى. ونىڭ ايتۋىنشا، قازىرگى قارۋ-جاراق كولەمى اقىلعا سىيمايتىن دەڭگەيگە جەتكەن.

ترامپ بۇل مالىمدەمەنى فرانسيا باسشىسى ەممانۋەل ماكروننىڭ ەۋروپا ەلدەرىنە يادرولىق قورعانىس ۇسىنۋعا دايىن ەكەندىگى تۋرالى سوزىنە جاۋاپ رەتىندە جاسادى.

"ەگەر بارلىق ەلدەر يادرولىق قارۋدان باس تارتسا، بۇل الەم ءۇشىن كەرەمەت شەشىم بولار ەدى. بىزدە جانە رەسەيدە ونىڭ سانى وتە كوپ، ال تورت-بەس جىل ىشىندە جۇڭگو دا وسى دەڭگەيگە جەتۋى مۇمكىن. يادرولىق قارۋدىڭ كۇشى شەكتەن تىس، ونى باقىلاۋ قاجەت"، – دەدى ول.

ترامپ العاشقى پرەزيدەنتتىك مەرزىمىندە يادرولىق قارۋدى ازايتۋعا باعىتتالعان دەنۋكلەاريزاسيا باعدارلاماسىن جۇزەگە اسىرۋعا تىرىسقانىن اتاپ ءوتتى. ونىڭ ايتۋىنشا، رەسەيمەن كەلىسسوزدەر بارىسىندا بەلگىلى ءبىر جەتىستىكتەرگە قول جەتكىزىلگەن، سونداي-اق بۇل ماسەلەنى جۇڭگو باسشىسى سي سزينپينمەن دە تالقىلاعان.

الايدا، 2020 جىلى پرەزيدەنتتىك سايلاۋدا دجو بايدەن جەڭىسكە جەتكەننەن كەيىن بۇل پروسەسس توقتاپ قالدى. "ەندى ءبىز بۇل ماسەلەگە قايتا ورالۋىمىز كەرەك. مەن كەلىسسوزدەردى جاڭعىرتۋدى قالايمىن"، – دەپ مالىمدەدى ترامپ.

قازىرگى تاڭدا اقش، رەسەي، جۇڭگو، ۇلىبريتانيا، فرانسيا، ءۇندىستان، پاكىستان، سولتۇستىك كورەيا جانە يزرايل يادرولىق قارۋعا يە ەلدەر قاتارىندا.