InfoHub Logo

اقش پرەزيدەنتى دونالد ترامپتىڭ پارمەنىمەن باستالعان لوس-اندجەلەستەگى كوشى-قون رەيدتەرى ەلدە الەۋمەتتىك-ساياسي شيەلەنىستى كۇشەيتىپ وتىر. زاڭسىز ميگرانتتاردى ۇستاۋعا قارسى جاپپاي نارازىلىق اكسيالارى بىرنەشە كۇننەن بەرى جالعاسىپ كەلەدى.

ترامپ نارازىلىق بىلدىرۋشىلەردى «بۇلىكشىلەر مەن ءتارتىپ بۇزۋشىلار» دەپ اتاپ، ولاردىڭ ارەكەتتەرىن اقشا ءۇشىن جاسالعان ايلا دەپ مالىمدەدى. ول كاليفورنيا گۋبەرناتورى گيەۆين نيۋسوم مەن لوس-اندجەلەس مەرى كارەن باسستى «ءساتسىز باسقارۋ» ءۇشىن ايىپتاپ، ولار قالا تۇرعىندارىنان كەشىرىم سۇراۋى ءتيىس دەدى.

نارازىلىق بارىسىندا كەمىندە ەكى پوليسيا قىزمەتكەرى جارالانىپ، بەس كولىك ورتەنگەن. دەمونسترانتتار كوشەلەردى جاۋىپ، تارتىپسىزدىك تۋدىرعان. لوس-اندجەلەس پوليسياسى ترامپتىڭ تالابىنا قاراماستان، جاپپاي دەپورتاسياعا قاتىسپايتىنىن مالىمدەگەننەن كەيىن جاعداي ودان ءارى ۋشىعا ءتۇستى.

اق ءۇيدىڭ اپپارات باسشىسىنىڭ ورىنباسارى ستيۆەن ميللەر دە بۇل وقيعالاردى «بۇلىك» دەپ اتاپ، قاتاڭ شارالار قابىلداۋدى ۇسىندى. ال ترامپ ۇلتتىق گۆارديانىڭ 2000 ساربازىن لوس-اندجەلەسكە جىبەرىپ، كۇش قولدانۋ ارقىلى ءتارتىپ ورناتۋعا كىرىستى. قورعانىس ءمينيسترى پيت حەگسەت بۇل اقش جەرىندەگى سيرەك اسكەري وپەراسيا بولۋى مۇمكىن ەكەنىن ەسكەرتتى.

بۇل نارازىلىقتار ترامپتىڭ بيلىككە ەكىنشى رەت كەلۋىنەن كەيىنگى العاشقى ءىرى ىشكى ساياسي سىناقتاردىڭ ءبىرى بولىپ وتىر. اقش-تا جازعى شەرۋلەر مەن پوليسياعا قارسى قوزعالىستاردىڭ بۇرىننان ءداستۇرى بار. كاليفورنياداعى جاعداي – ءبىر رەتتىك وقيعا ما، الدە جاڭا كەزەڭنىڭ باستاماسى ما، ونى الداعى كۇندەر كورسەتەدى.