InfoHub Logo

تۇركىستان قالاسىندا زەينەت جاسىنداعى ازاماتتاردىڭ ءومىر ساپاسىن جاقسارتۋعا باعىتتالعان ءۇش «بەلسەندى ۇزاق ءومىر» ورتالىعى جۇمىس ىستەپ تۇر. العاشقىسى وبلىس ورتالىعىندا اشىلسا، سۇرانىسقا بايلانىستى وتكەن جىلى «بەكزات» جانە «وتىرار» تۇرعىن الاپتارىندا №1 جانە №2 فيليالدارى ىسكە قوسىلدى.

اتالعان ورتالىقتارعا كەلۋشى اجەلەر بۇگىندە بوس ۋاقىتتارىن ءتيىمدى وتكىزىپ، بي مەن قولونەرگە دەن قويۋدا. ق ر مادەنيەت قايراتكەرى، تۇركىستان قالالىق ايەلدەر القاسىنىڭ ءتورايىمى ۇلجان مۇستافايەۆا ولاردىڭ بەلسەندىلىگىنە دەم بەرىپ، ديماش قۇدايبەرگەننىڭ «تاۋ ىشىندە» انىنە بي قويۋعا باستاماشى بولدى.

ورتالىقتىڭ ماقساتى – ارداگەرلەر مەن زەينەتكەرلەردىڭ الەۋمەتتىك بەلسەندىلىگىن ارتتىرۋ، دەنساۋلىعىنا وڭ اسەر ەتۋ جانە قوعاممەن بايلانىسىن نىعايتۋ. مۇندا زەينەتكەرلەرگە الەۋمەتتىك-مەديسينالىق، پسيحولوگيالىق، قۇقىقتىق جانە اعارتۋشىلىق كومەك كورسەتىلەدى.

بۇگىندە تۇركىستان قالاسىندا 16 مىڭنان استام زەينەتكەر تۇرادى. قاريالارعا قولايلى جاعداي جاسالعان ورتالىقتار ولاردىڭ ومىرگە دەگەن قۇلشىنىسىن ارتتىرىپ، بەلسەندى ءارى سالاۋاتتى ءومىر سالتىن ۇستانۋعا جول اشىپ وتىر.