InfoHub Logo

قاماۋدا وتىرعانىنا ءبىر جىلعا جۋىقتاعان جۋرناليست ءارى بەلسەندى دۋمان مۇحاممەدكارىمنىڭ دەنساۋلىعى كۇرت ناشارلاعانى بەلگىلى بولدى. بۇل تۋرالى ونىڭ ادۆوكاتى عالىم نۇرپەيىسوۆ مالىمدەدى.

ادۆوكاتتىڭ ايتۋىنشا، دۋمان سوڭعى رەت 19 ساۋىردە تۇرمە كيىمىن كيمەگەنى ءۇشىن قىزىلورداداعى №60 مەكەمەدە تارتىپتىك يزولياتورعا (كارسەرگە) 4 ايعا قامالعان. ءقازىر ونىڭ دەنساۋلىعى ەمدەلمەي قالاتىنداي جاعدايدا.

– جامباسىندا ەت قالماعان. ۋكول سالۋعا مۇمكىندىك جوق. ءدارى ىشە المايدى. ءوزى «شال بولدىم، وتىرسام تۇرا المايمىن، تۇرسام وتىرا المايمىن» دەيدى. تۇرمە اكىمشىلىگى 30 ماۋسىمدا اۋرۋحاناعا اپارامىز دەپ ۋادە بەردى، – دەيدى ادۆوكات عالىم نۇرپەيىسوۆ.

ءجۋرناليستتىڭ اناسى دا بالاسىنىڭ تاعدىرىنا الاڭداۋلى ەكەنىن ايتىپ، "كارسەردە ۇلىمنىڭ قۋ جانى قالدى ما، بىلمەيمىن" دەپ مالىمدەدى.

ەسكە سالايىق، دۋمان مۇحاممەدكارىم 2023 جىلى قاماۋعا الىنىپ، كەيىن قىزىلورداداعى قاتاڭ رەجيمدەگى مەكەمەگە اۋىستىرىلعان بولاتىن. قۇقىق قورعاۋشىلار ونىڭ ءىسىن ساياسي قۋدالاۋ دەپ باعالاپ وتىر.

ينفوحاب الداعى ۋاقىتتا بۇل ماسەلەنى نازاردا ۇستايدى.