InfoHub Logo

قازاقستان ۇلتتىق بانكىنىڭ ءتوراعاسى تيمۋر سۇلەيمەنوۆ بيىلعى ينفلياسيانىڭ 9-12 پايىز ارالىعىندا بولاتىنىن مالىمدەدى. بۇل تۋرالى ول ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆتىڭ سۇراعىنا جاۋاپ بەرگەندە ايتتى.

بۇل تۋرالى Infohub.kz اقپارات اگەنتتىگى حابارلايدى.

ينفلياسيانىڭ بولجامدى ءدالىزى

سۇلەيمەنوۆتىڭ ايتۋىنشا، جاھاندىق بەلگىسىزدىك پەن ىشكى ەكونوميكالىق پروسەستەردى ەسكەرە وتىرىپ، بيىلعى ينفلياسيا 9-12 پايىز ارالىعىندا بولادى دەپ بولجانۋدا.

«ينفلياسياعا قاتىستى بيىلعى جىلعا بىزدە جالپى 9-12 پايىز ءدالىزى بولجانۋدا. بۇل جاھاندىق بەلگىسىزدىك پەن ىشكى پروسەستەرگە بايلانىستى. ۇلتتىق بانك رەتىندەگى باستى مىندەتىمىز – ۇكىمەتپەن تالقىلاعانىمىزداي، بيىل ينفلياسيانى 10 پايىزدان تومەن ۇستاۋ. جىل سوڭىنداعى ناتيجە بويىنشا 9 پايىز جانە ودان تومەن دەڭگەيگە شىعۋ – ءبىزدىڭ باستى ماقساتىمىز»، - دەدى ۇلتتىق بانك باسشىسى.

ەسكە سالا كەتەيىك، 23 قاڭتاردا قازاقستان ۇلتتىق بانكى بازالىق مولشەرلەمە بويىنشا شەشىم قابىلداعان بولاتىن. ول جىلدىق 18 پايىز دەڭگەيىندە، پليۋس-مينۋس 1 پايىزدىق تارماق دالىزىمەن وزگەرىسسىز قالدىرىلدى.