InfoHub Logo

قازاقستان رەسپۋبليكاسىنىڭ ۇلتتىق بانكى ماكروەكونوميكالىق ساراپشىلار اراسىندا جۇرگىزىلگەن كەزەكتى ساۋالنامانىڭ قورىتىندىسىن جاريالادى. بۇل ساۋالناما Brent ماركالى مۇنايدىڭ باعاسى، قازاقستان ەكونوميكاسىنىڭ ءوسىمى، ينفلياسيا، بازالىق مولشەرلەمە، تاۋارلار مەن قىزمەتتەردىڭ ەكسپورتى مەن يمپورتى، سونداي-اق تەڭگە باعامى سياقتى ماڭىزدى كورسەتكىشتەرگە قاتىستى بولجامداردى قامتيدى.

بۇل تۋرالى Infohub.kz اقپارات اگەنتتىگى حابارلايدى.

مۇناي باعاسى مەن ەكونوميكالىق ءوسىم

بولجام گوريزونتى بويىنشا Brent ماركالى مۇناي باعاسىنىڭ بولجامى جوعارى قاراي قايتا قارالدى. 2026 جىلى مۇناي باعاسى باررەلىنە ورتا ەسەپپەن 86،1 دوللارعا (بۇرىن – 80 دوللار) جەتەدى دەپ كۇتىلۋدە. 2027 جىلى بۇل كورسەتكىش 75 دوللارعا (70 دوللار)، ال 2028 جىلى 70،5 دوللارعا (70 دوللار) باعالانادى.

قازاقستان ەكونوميكاسىنىڭ وسىمىنە قاتىستى بولجامدار ايتارلىقتاي وزگەرگەن جوق. ورتا مەرزىمدى پەرسپەكتيۆادا ءجىو ءوسىمى الەۋەتتى دەڭگەيگە بىرتىندەپ جاقىندايدى دەپ كۇتىلۋدە: 2026 جىلى – 4،9%، 2027 جىلى – 4،7%، 2028 جىلى – 4،3%.

دوللار باعامى

تەڭگەگە قاتىستى دوللار باعامىنىڭ بولجامى الداعى ەكى جىلعا تومەن قاراي قايتا قارالدى. 2026 جىلعا ارنالعان بولجام – 498،8 تەڭگە (بۇرىن – 515 تەڭگە)، 2027 جىلعا – 531،5 تەڭگە (532،5 تەڭگە)، 2028 جىلعا – 562،5 تەڭگە (550 تەڭگە) بولادى دەپ جوسپارلانۋدا.

ينفلياسيا جانە بازالىق مولشەرلەمە

رەسپوندەنتتەردىڭ ينفلياسيالىق كۇتۋلەرى ورتا مەرزىمدى كەزەڭدە ءبىرشاما جاقساردى. 2026 جىلعا ارنالعان ينفلياسيا بولجامىنىڭ مەدياناسى 10% دەڭگەيىندە ساقتالدى. ال 2027 جانە 2028 جىلدارعا ارنالعان بولجامدار تيىسىنشە 8% جانە 6،8%-عا دەيىن تومەندەتىلدى (بۇرىن – 8،6% جانە 7%).

بازالىق مولشەرلەمەگە قاتىستى كۇتۋلەر دە تۇزەتىلدى. 2026 جىلى بولجام مەدياناسى 16% قۇرادى (بۇرىن – 15،9%). 2027 جانە 2028 جىلدارى ينفلياسيالىق كۇتۋلەردىڭ جاقسارۋىنا بايلانىستى بۇل كورسەتكىشتەر تيىسىنشە 12،8% جانە 10،6%-عا دەيىن تومەندەتىلدى (بۇرىن – 13،3% جانە 11،3%).

ساۋالناماعا قاتىسۋشىلار

ساۋالناماعا قازاقستاننىڭ ماكروەكونوميكالىق كورسەتكىشتەرىن تالداۋمەن جانە بولجاۋمەن اينالىساتىن 16 ۇيىم قاتىستى. رەسپوندەنتتەر قاتارىندا كاسىبي نارىق قاتىسۋشىلارى، زەرتتەۋ ينستيتۋتتارى، حالىقارالىق ۇيىمدار جانە رەيتينگتىك اگەنتتىكتەر بار.

بۇل ماكروەكونوميكالىق ساۋالناما ۇلتتىق بانكتىڭ رەسمي بولجامدارىن قامتىمايدى. ول كاسىبي نارىق قاتىسۋشىلارىنىڭ قازاقستاندىق جانە الەمدىك نارىقتارداعى جاعدايدىڭ دامۋىنا قاتىستى تاۋەلسىز پىكىرلەرى مەن باعالاۋلارىنىڭ شولۋىن ۇسىنادى.