InfoHub Logo

ەرتەدە قالىڭ توعاي ىشىندەگى ۇلكەن ءبىر ۇڭگىردە ءۇش ايۋ تۇرىپتى. ولار تۇنىمەن توعايدى ارالاپ، كۇن ىسىعان كەزدە ۇڭگىرگە كىرىپ جاتادى ەكەن. ەڭ ءىرىسى جانە مىقتىسى اق ءتوس ايۋ بولىپتى. قازانداي تاستى دوپشا دومالاتىپ وينايدى ەكەن. كۇشتىلىگىنە ماقتانىپ، كىشكەنە اڭدارعا مازا بەرمەپتى.

ءبىر كۇنى تۇلكىنى قۇيرىعىنان ۇستاپ جۇلقىلايدى. ەكى ايۋ:

— تۇلكى بىزگە تيىسكەن جوق قوي، قويا بەر، — دەپتى.

— بۇل تۇلكى مەنى سىيلاپ جۇرەم دەسە، جىبەرەم! — دەپ، قۇيرىعىن بۇراي تۇسەدى ايۋ. قۇيرىعى اۋىرعان تۇلكى قىڭسىلاپ:

— ايۋ اعا، بوساتشى مەنى، سىيلاپ جۇرەيىن، — دەپ جالىنىپتى. ايۋ ەسىرىپ:

— ەندى تۇلكى مەنى سىيلاپ جۇرەدى! — دەپ ماقتانىپتى.

تاعى بىردە قاسقىردى ۇستاپ الىپ، اياعىن مىتىپ، قۇلاعىنان جۇلقىلاپ، بوساتپاي، ەسىن شىعارادى. ەكى ايۋ تۇرىپ:

— قاسقىر بىزگە تيىسكەن جوق قوي، — دەپتى.

— ەگەر مەنى سىيلاپ جۇرەمىن دەسە، بوساتامىن! — دەپ، گۇر-گۇر ەتىپتى اق ءتوس ايۋ. جانى قينالعان قاسقىر قىرىلداپ:

— ايۋ اعا، سىيلاپ جۇرەيىن، — دەپ جالبارىنادى.

اق ءتوس ايۋ ەكى سەرىگىنە:

— ەندى مەنى قاسقىر دا سىيلاپ جۇرەتىن بولدى! — دەپ قوقيلانىپتى.

ەكى ايۋ:

— سەنى بۇدان بىلاي تۇلكى مەن قاسقىر جەك كورەدى جانە ەشقاشان سىيلامايدى. ويتكەنى سەن ولارعا كۇش كورسەتىپ، جابىرلەدىڭ، — دەپتى.

— جوق، سىيلايدى، — دەپ، ەكىلەنىپتى اق ءتوس ايۋ.

اقىرى ەكى سەرىگىنەن ءبولىنىپ كەتىپتى. توعايدى ارالاپ ۇزاق جۇرەدى. ءبىر ۋاقىتتا الگى ءوزى جابىرلەگەن قاسقىر ءبىر توپ ۇيالاستارىمەن اق ءتوس ايۋدىڭ الدىنان شىعىپتى.

— سەن ماعان جازىقسىز ازاپ كورسەتىپ ەدىڭ عوي، ەندى ءبارىمىز جابىلىپ، سەنى تالايمىز، — دەپتى قاسقىر.

كوپ قاسقىردان زارەسى ۇشقان اق ءتوس جۋان ءبىر اعاشتىڭ باسىنا ورمەلەپ شىعىپ الىپ، امان قالىپتى. قاسقىرلار ءبىراز تۇرىپ-تۇرىپ كەتىپ قالىپتى.

سونان سوڭ جەرگە ءتۇسىپ، جان-جاعىنا قاراپ، سەسكەنىپ كەلە جاتسا، ءوزى جابىرلەگەن تۇلكى كەزدەسىپتى. تۇلكى سىزىلىپ:

— ايۋ اعا، نەدەن قورقىپ كەلەسىڭ؟ — دەپ، جايىن سۇراپتى.

— كوپ قاسقىردان قاشىپ كەلەمىن، — دەپتى، اق ءتوس ايۋ ەنتىگىپ.

— وندا جىلدام بەرى قاراي ءجۇر، جاڭا مىنا جاقتان قاسقىرلار كورىنىپ ەدى، — دەيدى، تۇلكى جول كورسەتىپ.

تۇلكى نۇسقاعان جاققا تۇرا قاشقان ايۋ كۇمپ بەرىپ باتپاققا ءتۇسىپ كەتەدى. تۇلكى ايۋدىڭ قاسىنا كەلىپ، سىقىلىقتاپ كۇلەدى دە:

 — سەن انا جولى ماعان جازىقسىز ءجابىر كورسەتىپ ەدىڭ، سول ءۇشىن سازايىڭدى تارتقىزعىم كەلدى، — دەپ كەتىپ قالادى.

مي باتپاققا باتقان اق ءتوس ايۋ اۋرەگە ءتۇسىپ، ءولىپ-تالىپ ارەڭ شىعادى. شارشاپ-شالدىعىپ، سۇمىرەيىپ ۇڭگىرگە ورالادى.

— ساعان نە بولدى؟ — دەيدى ەكى سەرىگى.

— مەنى قاسقىرلار قورشاپ الىپ، تالاپ تاستاي جازدادى. سودان اعاشتىڭ باسىنا شىعىپ قۇتىلىپ ەم، قايتىپ كەلە جاتقانىمدا تۇلكى كەزدەستى. ول مەنى الداپ، باتپاققا باتىرىپ كەتتى، — دەيدى اق ءتوس ايۋ مۇڭايىپ.

— كۇشىڭە سەنىپ، السىزدەردى كۇشپەن سىيلاتام دەگەن ويىڭ دۇرىس ەمەس ەكەندىگىنە ەندى كوزىڭ جەتكەن شىعار، — دەپتى ەكى سەرىگى.

---