InfoHub Logo

وتاندىق مەديانارىقتاعى بەدەلدى باسىلىمداردىڭ ءبىرى – "Almaty aqshamy" گازەتى ايتۋلى جەڭىسكە قول جەتكىزدى. باسىلىم ۇجىمى "قازاقستانداعى جىل تاڭداۋى" ۇلتتىق جوباسىندا توپ جارىپ، "مەملەكەتتىك تىلدەگى رەسپۋبليكالىق قوعامدىق-ساياسي گازەت" اتالىمى بويىنشا ۇزدىك دەپ تانىلدى. بۇل تۋرالى infohub.kz باسىلمى جازدى.

بۇل ماراپات – تەك ءبىر كۇندىك جەڭىس ەمەس، جىل بويى اتقارىلعان اۋقىمدى جۇمىستىڭ ناتيجەسى. "Choice of the year in Kazakhstan" بايقاۋىنىڭ تالاپتارى قاتاڭ: مۇندا "قازاقستانداعى №1" اتاعىن حالىقتىڭ سەنىمىنە كىرگەن، ساپاسى مەن بەدەلى جوعارى برەندتەر عانا يەلەنە الادى.

37 جىلدىق تاريحى بار باسىلىم ءۇشىن بۇل – كاسىبي دەڭگەيدىڭ تاعى ءبىر كورسەتكىشى. گازەت ۇجىمىنىڭ ايتۋىنشا، بۇل جەڭىس الداعى ۋاقىتتا جاڭا بەلەستەردى باعىندىرۋعا زور سەرپىن بەرەدى.

بۇل ماراپات قازاق جۋرناليستيكاسى ءۇشىن نەگە ماڭىزدى؟

سالتاناتتى شارا بارىسىندا "Alatau aqparat" مەدياحولدينگىنىڭ باس ديرەكتورى ەرجان قالىمباي ۇلى بۇل جەڭىستىڭ ماڭىزىنا ەرەكشە توقتالدى. ونىڭ ايتۋىنشا، قازىرگى تاڭدا باسىلىم زامان تالابىنا ساي ۇلكەن ترانسفورماسيادان ءوتىپ جاتىر.

"گازەتىمىزدىڭ "مىڭ جاساعان شاھاردىڭ شامشىراعى" دەپ اتالۋى تەگىن ەمەس. بۇل قارا شاڭىراقتا قازاقتىڭ تالاي مارقاسقالارى قولتاڭباسىن قالدىردى. ەلىمىزدەگى ەڭ تاڭداۋلى بايقاۋدىڭ جۇلدەسى بىزگە بۇيىرعانى – ۇجىمنىڭ ىنتىماعى مەن قاجىرلى ەڭبەگىنىڭ جەمىسى"، – دەپ اتاپ ءوتتى مەدياحولدينگ باسشىسى.

بۇل تەك رەداكسيانىڭ عانا ەمەس، جالپى قازاق ءتىلدى كونتەنتتىڭ ساپالىق جاعىنان ءوسىپ كەلە جاتقانىن كورسەتەدى.

"Almaty aqshamy" گازەتىن قايدان وقۋعا بولادى؟

بۇگىندە "Almaty aqshamy" – تەك الماتىلىقتاردىڭ عانا ەمەس، بۇكىل رەسپۋبليكا جۇرتشىلىعىنىڭ سۇيىكتى باسىلىمىنا اينالدى. گازەتتىڭ تارالىمى مەن قولجەتىمدىلىگى ايتارلىقتاي كەڭەيگەن.

باسىلىمدى قازىرگى تاڭدا مىنا جەرلەردەن وقۋعا مۇمكىندىك بار:

• "Air Astana" اۋە كومپانياسىنىڭ بورتتارىندا؛

• "تالگو" جۇردەك پويىزدارىنىڭ بارلىق باعىتىندا؛

• ءىرى قوناق ۇيلەر، مەيرامحانالار مەن كوفەحانالاردا.

شەتەلدىك قوناقتار مەن ەل تۇرعىندارى ءۇشىن گازەت – اقپارات كوزى عانا ەمەس، قازاق رۋحانياتىنىڭ ايناسى ىسپەتتى.