ۇستاز بەن شاكىرتتىڭ ايتىسى
ۇستاز بەن شاكىرتتىڭ ايتىسى /"ايقىن" گازەتىنىڭ بەتتەرىنەن/
بۇرىندارى اقىندار ايتىسۋ ءۇشىن ءار تۇستان كەلىپ، ءبىر جەرگە جينالىپ، ونەر كورسەتەتىن. كەيىن ويلارىن قاعاز بەتىنە ءتۇسىرىپ، قاراپايىم حات ارقىلى ءسوز الماساتىن. گازەت بەتىندە دە ايتىستىڭ كورىگى قىزعان ساتتەر از بولمادى. ەندى ەلەكتروندى اقپاراتتىق تەحنولوگيالار دامىعان تۇستا عالامتوردىڭ كومەگىمەن ەلەكتروندى پوشتا ارقىلى ايتىسۋ جانە ۇيالى تەلەفوندى پايدالانا وتىرىپ sms-ايتىس جۇرگىزۋ داستۇرگە ەنە باستادى. ءبىز بۇگىن بەلگىلى ايتىسكەر اقىندار سەرىكزات دۇيسەنعازين مەن جانداربەك بۇلعاقوۆتىڭ ۇستاز بەن شاكىرت رەتىندە وي جارىستىرىپ، ءسوز قاعىستىرعان sms-ايتىسىن وقىرمان نازارىنا ۇسىنىپ وتىرمىز.
سەرىكزات:
جانداربەك، تۇرا الماۋشى ەڭ تاعات تاۋىپ،
بيىككە جۇرگەن ۇلسىڭ تالاپتانىپ.
كوزدى اشىپ-جۇمعانشا ءتورت جىل ءوتتى،
ۇشايىن دەپ جاتىرسىڭ قانات قاعىپ.
جانداربەك:
بۇل جەردە ءبىلىم دەيتىن كوك تەڭىز بار،
بابالار بىزگە سالىپ كەتكەن ءىز بار.
ءتورت جىلدا ءۇمىتىڭىز اقتالدى عوي،
ايتىڭىز، ماعان قانداي وكپەڭىز بار؟
سەرىكزات:
ءبىرى ەدىڭ ايتىس قۋعان سەرىنىڭ سەن،
ساباققا كوپ كەلۋگە ەرىنۋشى ەڭ.
تاڭدا عانا تۋاتىن شولپان قۇساپ،
سەسسيانىڭ كەزىندە كورىنۋشى ەڭ.
جانداربەك:
وسىلاي قيىن ەندى سوگەتىنىڭ،
قاي جەردە بولدى سىزگە بوگەت ءىنىڭ؟
سەسسيانىڭ كەزىندە كورىنسەم دە،
ساباقتى كىمنەن، اعا، كەم وقىدىم؟
سەرىكزات:
شاكىرتىم، استامسۋ عوي بۇل دەگەنىڭ،
مىنانى ەستە ساقتا، جۇلدەگەرىم:
سەن تۇگىل، دانالار دا سولاي ايتقان،
ءالى دە بىلگەننەن كوپ بىلمەگەنىڭ.
جانداربەك:
ارينە، بىلگەننەن كوپ بىلمەگەنىم،
ماقساتىم – ءبىلىم ىزدەۋ كۇندە مەنىڭ.
تەك قانا قازاعىمنىڭ وزىنە ءتان
ونەرى ولمەسىن دەپ جۇرگەن ەدىم.
سەرىكزات:
جۇرە بەر ونەر ءۇشىن امان بولىپ،
وقىساڭ، قالمايسىڭ عوي جامان بولىپ.
مەن ءۇشىن شىقساڭ بولدى وتان ءۇشىن
قىزمەت ەتەر بىلىكتى مامان بولىپ.
جانداربەك:
ۇستازىم، راقمەت تىلەگىڭە،
بۇيىرسا، قىزمەت ەتەم ۇلى ەلىمە.
امان بولسام، ەشقاشان داق سالماسپىن
جۇمىر جەر سىياتىنداي جۇرەگىڭە!
You Might Also Like
-
بارشا شاكىرتتەرىڭىزدىڭ اتىنان ءسىزدى 63 جاسقا تولعان مەرەيتويىڭىزبەن شىن جۇرەكتەن قۇتتىقتايمىن! ءسىزدىڭ ەڭبەك جولىڭىز سان قىرلى. ەڭبەككە ەرتە ارالاسىپ، ۇلاعاتتى ءومىر مەكتەبىنەن ءوتتىڭىز. شاكىرت تاربيە...
-
ۇستاز دەگەن ۇلى ءسوز ۇلاعاتتى، ول بولماسا، كىم بەرەدى پاراساتتى. اسىلىن بەرىپ شاكىرت بويلارىنا، اعارتقان سول ءۇشىن دە قارا شاشتى. ۇستازعا اركىم باسىن يۋ كەرەك، كەمەڭگەر، اقىلشىم دەپ ءبىلۋ...
