ءمۇعالىم تۋرالى ولەڭدەر
ۇستاز دەگەن ۇلى ءسوز ۇلاعاتتى،
ول بولماسا، كىم بەرەدى پاراساتتى.
اسىلىن بەرىپ شاكىرت بويلارىنا،
اعارتقان سول ءۇشىن دە قارا شاشتى.
ۇستازعا اركىم باسىن يۋ كەرەك،
كەمەڭگەر، اقىلشىم دەپ ءبىلۋ كەرەك.
سەن بۇگىن كەرەمەت بوپ كەتسەڭ داعى،
جەتكىزگەن سول ۇستاز دەپ ءبىلۋ كەرەك.
جاقسىلار ۇمىتپايدى ۇستازدارىن،
ويلايدى، ولار سونىمەن ۇشتالعانىن.
ماڭگىلىككە ماقتانىپ وتەدى ۇستاز،
شاكىرتىنىڭ بيىككە شىققاندارىن.
*** *** *** ***
تۇلا بويىڭ تۇنعان سابىر،
كەشىرىم،
ايقارا اشتىڭ بىزگە ءبىلىم ەسىگىن.
ءور تۇلعاڭدى بالاپ شىڭعا،
ۇستازىم،
مەن وزىڭە ءتانتى بولسام، نەسى ءمىن؟!
بالا ەلدىڭ بولاشاعى بولعاندا،
زور پايدانى تيگىزەسىڭ قوعامعا.
ماماندىعىڭ - كاسىپتەردىڭ ابزالى،
ادامدىعىڭ قىمبات بىزگە ودان دا.
اشىق بولسىن نۇرعا تولى كوگىمىز،
امان بولسىن ەلىمىز بەن جەرىمىز.
اماناتتاپ تاپسىرامىز تاعدىردى -
انامىز دەپ قابىلدادىق سەنى ءبىز!
ءار تاڭ سايىن جاڭا ارمان قۇشامىز،
ۇستازىمىز - ۇلگى بىزگە ءىسى اڭىز.
جاقسىلىقتى، ءتاتتى ءۇمىتتى تانىتقان
ءوزىڭىزدى ماڭگى ۇلگى تۇتامىز
*** *** *** ***
زاۆودتا بولساڭ، كۇنبە-كۇن
كورىنەر ەدى تابىسىڭ.
دارىگەر بولساڭ، ءتۇرلى ەمىڭ –
سىرقاۋلى جاننىڭ باعى شىن.
ال سەنىڭ ەڭبەك جەمىسىڭ
وزگەشە ءتىپتى باسقادان:
ول - ءوزىن ارناپ ەل ءۇشىن
وسىناۋ جۇرگەن جاقسى ادام.
جاقسى ادام – ەلدىڭ تىرەگى،
بايلىعى تۋعان حالىقتىڭ،
شاپاعىن شاشار ۇنەمى
كوگىندە تۇرعان جارىق كۇن.
سان جاستىڭ قامىن شەرتەسىڭ،
تاعدىرىن ويلاپ تولعانىپ.
ءار ءۇيدىڭ ءبىر-بىر ەركەسىن
ۇيرەتتىڭ ءوزىڭ قولعا الىپ.
ۇستازسىز جاندا سونبەك كۇن،
شاكىرتسىز ءومىر – سۋسىز جەر.
كورىنبەس عاجاپ ەڭبەكتىڭ
بەينەتىن كەشىپ جۇرسىزدەر.
جۇرەكتە تۇرار جالقى ءۇنىڭ،
جانىمنان جالىن جىگەر كۇت.
ۇستازىم، سەنىڭ ءار كۇنىڭ،
ءار ءساتىڭ تۇرعان ءبىر ەرلىك!
فاريزا وڭعارسىنوۆا
*** *** *** ***
نۇر قۇيدى ما ءسابي – گۇل - ءالدي ەلى،
جۇرەگىڭدە قاسيەت بار كيەلى...
شاكىرتتەرگە ۇستازدار ءدارىس بەرسە،
ءسىز ۇستازعا ۇيرەتتىڭ تاربيەنى.
ۇزاق جىلدار مەكتەپتىڭ باسشىسى بوپ،
تاربيەنى ۇيرەتتىڭ باسقىشى كوپ...
ونەگەلى ەلىنە ەڭبەك ەتتىڭ،
سالەم بەرەر سوندىقتان دوس كىسى كوپ.
ازاماتقا جۇرەتىن بالاپ ەلىم،
سونداي جۇرتقا ءقادىرلى ادام ەدىڭ!
ۇل-قىزدارىڭ قوندىرعان ۇياسىنا،
مەن دە ءسىزدى ءبىر تاۋعا ساناپ ەدىم.
*** *** *** ***
«تالپىنعان باقىتىنا بولادى كەز،
ارنالى دارىنداردان قالادى ءسوز» -
دەپ قۇيعان قۇلاعىنا شاكىرتتەردىڭ،
ادامسىز –
دانا ويلى،
بال مىنەز!
*** *** *** ***
ۇستازدار – تىنشىمايتىن ەڭبەككەرلەر،
جەمىستى جەرگە ەكپەگەن، ەلگە ەككەندەر،
ادامزات ۇرپاقتارىن تاربيەلەپ،
زەردەسىن بولاشاقتىڭ زەرلى ەتكەندەر.
*** *** *** ***
قۇتتى بولسىن مەرەيتوي، ۇستازىمىز،
ورىندالسىن ويعا العان ارمانىڭىز.
بولاشاققا ءبىلىم مەن جول سىلتەگەن
ەڭبەگىڭە ءبىز ماڭگى قارىزدارمىز.
باسىڭىزعا ب ا ق ۇيالاپ، باقىت قونسىن،
بەرەكە-ىنتىماقپەن ورتا تولسىن.
*** *** *** ***
You Might Also Like
-
ءبىلىم بەرۋ ۇيىمدارىندا سانيتاريالىق نورمالاردىڭ ساقتالۋىن ەرەكشە باقىلاۋدا ۇستاۋ قاجەت. بۇل تۋرالى ۇكىمەت وتىرىسىندا ق ر پرەمەر-مينيسترى اسقار مامين ايتتى.
