ۇستاز ءۇمىتى
قالداننىڭ قالاداعى اۋرۋحاناعا تۇسكەنىنە ونشا كوپ بولعان جوق. دەسە دە ول ازعانا ۋاقىت ىشىندە جالىعا باستاعانداي ما قالاي ءوزى؟ وتىز جىل ۇستازدىق ەتسە دە، بويىنا بىتكەن وسى ءبىر ەلگەزەكتىك سەزىمدەرىنەن ءالى كۇنگە ارىلا الماعان.
كوكتەمنىڭ كۇنى شۋاعىن توگىپ، سامالى ەسىپ، جادىراڭقى مىنەز تانىتادى. ءتۇس اۋا سىرقاتتاردى قاراۋعا كەلگەن مەدبيكە قىزعا ءوزى ءوتىنىش ەتىپ، جاڭا گازەتتەر الدىرعان.
اسىقپاي كوز جىبەرىپ قاراپ وتىر ەدى، كەنەتتەن ىركىلىپ، توقتاي قالدى. مۇدىرگەنى — «حابارلاندىرۋ» جارناماسى ەدى. ول جەدەل ءۇڭىلىپ وقىپ شىقتى دا، تەرەڭ ءبىر تولعانىس قۇشاعىندا ويلانىپ وتىرىپ قالدى. ون جىل بويىنا ءبىلىم بەرىپ تاربيەلەگەن شاكىرتى وسىندا كەلە جاتقان استانالىق ارتىستەر كونسەرتىندە ءان شىرقاماق...
اسانبەك بالاڭ كەزىنەن ءانشى بولاتىن. تامىلجىتا شىرقاي سالعانىندا داۋسىنىڭ اشىقتىعى مەن شالقار-كەڭدىگىنە قايران قالماۋ مۇمكىن دە ەمەس-تى. ونى انشىلىك الەمىنە باۋلىعان ءوزى-تۇعىن. كوركەمونەر ۇيىرمەسىنە قاتىسىپ جۇرگەنىندە ودان بىردەڭە شىعارىنا ىشتەي تولىق سەنىمدى بولعان. ويلاعانى بولدى، ونجىلدىقتى ءتامامداعان سوڭ اسانبەك ۇلتتىق كونسەرۆاتورياعا وقۋعا ءتۇستى. وندا دا وعان قالداننىڭ قولداۋ-كومەگى، سەپتىگى از تيمەگەن. شاكىرتى جوعارى وقۋ ورنىن بىتىرگەسىن استانادا قالىپ قويعانىن قالدان سىرت قۇلاقتان ەستىسە دە، ىشتەي ءسۇيسىنىپ جۇرەتۇعىن. ەندى،مىنە، ءبىرازدان بەرى كورمەگەن جاقسى كورەر شاكىرتى وسىندا كەلىپتى.
قالداننىڭ جاسى ەلۋدىڭ ورتاسىنان اۋسا دا، قۇددى جاس ادامداي كورىنەدى. شاشىنا ءالى كۇنگە اق قىلاۋ كىرمەگەن. ول كونسەرت بولاتىن كۇنى ءوزىن قويارعا جەر تابا المادى. قالاي بولسا دا، ءوز وقۋشىسىمەن ديدارلاسۋدى ويلادى. بۇل جونىندە ەمدەۋشى دارىگەرگە دە تۇسىندىرۋگە تىرىسىپ باققان. ءبىراق، بۇل سەكىلدى جۇرەك-قان تامىرلارى اۋرۋىمەن اۋىرىپ، توسەك تارتىپ جاتقان ايرىقشا كۇتىمدەگى سىرقاتتارعا ادام جانىن تولقىتار اسەرلى ساتتەردەن اۋلاقتاۋ ءجۇرۋ ءجونى كۇنبە-كۇن دەرلىك ەسكەرتىلەتىن. سوعان قاراماستان كەشقۇرىم اۋرۋحانادان سىتىلىپ شىققان قالدان داۋلەت ۇلى قالالىق ءزاۋلىم مادەنيەت ۇيىنە قاراي بەتتەدى. وكىنىشكە قاراي، ول كونسەرتتى تاماشالاي المادى، الدەقاشان باستالىپ كەتىپتى. ءبىراز كۇتە تۇرۋىنا تۋرا كەلدى.
ءبىر مەزگىلدەردە، ول الدەبىر ويلارعا بەرىلىپ تۇرعانىندا، كونسەرتتىڭ اياقتالعان سىڭايى بايقالدى. ادامدار توپ-توبىمەن جوڭكىلىپ شىعىپ جاتىر. بۇل ولاردىڭ اڭگىمەلەرىنە ەرىكسىز قۇلاق ءتۇرىپ ەدى: جالپى كونسەرت تۋرالى ءتاۋىر پىكىر ەستىلەدى. ارينە، جۇرەككە جاعىمدى. اسانبەكتىڭ اتىنا داتىم جاقسى لەبىزدەر ايتىلىپ، ۇستاز كوڭىلى ءبىر ءتۇرلى ريزا، تولقىعان كەيىپتە.
ءبىر مەزگىل ادامدار اياعى دا سيرەي باستاعان. ءبىر ۋاقىتتا سىرتقى ەسىك سەرپي اشىلعاندا جالت قاراسا، ارتىستەردىڭ وزدەرى ەكەن. بويلى-سويلى كەلگەن ءۇش جىگىت پەن ءبىر اپ-اسەم قىز. جۇزدەرى جايناپ، كۇلىپ-ويناپ، ءماز قالىپتا كەلەدى. قالدان ولاردىڭ شەتكىسى، ادەمىشە كەلگەن اسانبەك شاكىرتىن انادايدان تانىدى.
ولار بىر-بىرىنە تۇپ-تۋرا، تاقاپ كەلىپ قالدى. قارسى الدىنان بەتتەسىپ قالعان كىسىگە جالت قاراعان اسانبەك ءبىر ءسات قالشيىپ تۇردى دا قالدى. ءوز كوزىنە ءوزى سەنبەگەندەي تاعى دا ءبىر قارادى دا: «قالەكە، سالاۋماعالەيكۋم، قايدان ءجۇرسىز؟» دەپ ءبىرتۇرلى قۋىستانعانداي سىڭاي تانىتتى. قۇشاقتاي العان جوق. قالدان بولسا:
— ءوزىڭنىڭ جاعدايىڭ قالاي؟ كەلىپ قالدىڭدار ما؟ — دەدى كىبىرتىكتەپ.
— اۋىل-ەل امان با؟ ءبىز دەگەن... كونسەرت قويىپ شىعىپ، ەندى ءبىر شاقىرعان جەرگە اسىعىپ كەتىپ بارا جاتىر ەدىك...
تۇككە تۇسىنە الماعان وزگەلەرى بۇل ەكەۋىنە تاڭدانا قارايدى. وسى مەزەت جاڭبىر دا ءجايلاپ سەبەزدەي باستادى.
— قاشان كەرى قايتاسىڭدار؟ — دەدى قالدان.
— مۇنداعى كونسەرتتەر اياقتالدى. ەرتەڭ، ءسىرا، ورالعا باعىت ۇستارمىز.
جاڭبىر ەسەلەي قۇيىپ، ەكپىندەي ءتۇستى. اپ-ساتتە مالمانداي سۋ قىلار سىڭايى بار.
— قالدەكە، ايىپ ەتپەڭىز. تاعى دا ءساتى تۇسسە كەزدەسەرمىز، — دەپ اسانبەك ىلگەرى قاراي وزىپ كەتكەن جولداستارىنا قاراي اياڭداي جونەلدى.
— ساۋ تۇر، — دەدى قالدان داۋسى ەستىلەر-ەستىلمەس شىعىپ.
ءتۇن. اسپان سۇستى، كوكجيەكتى تەگىس قارا بۇلت كومكەرگەن.
ۇزاپ كەتكەن شاكىرتىنىڭ سوڭىنان ۇزاق ويلانا قاراپ تۇرعان اقكوڭىل ۇستاز ءۇستى باسى سۋ-سۋ قالپىندا اۋرۋحاناعا قاراي بەتتەپ بارادى. وي شىركىنىڭ سان-ساققا جۇگىرەدى. ءبىر كەزدەگى سۇيىكتى شاكىرتىم دەپ جۇگىرىپ جەتكەنىندە الىپ ۇشقان كوڭىلىن كۇپتى ەتىپ، ەش ەلەمەگەندەي سىرت اينالعانىنا ناليدى. الدە، استانا كولەمىندە ازدى-كوپتى كورىنىپ، تانىلىپ، اتى شىعا باستاعانىنا ماردامسي باستاعانى ما بۇل اسانبەكتىڭ؟
ءيا، مىناۋ ومىردە الدەنەگە ءسال قولى جەتكەندەي بولسا، اينالاسىن ەلەمەي، ءتىپتى قاسيەتتى ۇستازعا دا نەمكەتتى قارايتىن، ءوزدى-وزى «جۇلدىز اۋرۋىنىڭ» بۋىنا پىسكەندەي بولاتىن بوس كەۋدە، ارزان داقپىرتتىڭ ادامدارى دا از ەمەس-اۋ. قالدان اعانى قاپا ەتكەن دە ناق وسىنداي جاعداي ەدى.
You Might Also Like
-
تورايعىر مەن شوڭ — ارقاداعى سۇيىندىك ەلىنىڭ ازۋلى بيلەرى، ايتۋلى شەشەنى بولعان، حح عاسىردا ءومىر كەشكەن اعايىندى ادامدار. تۇيەنىڭ ەكى وركەشىندەي اعايىندىلاردىڭ شەشەندىك داڭقى، شونجار، شى...
