InfoHub Logo

(قازالى اۋدانى، قوجاباقى اۋىلىنداعى №25 ورتا مەكتەبى جايىندا جازىلعان)

№25 مەكتەپ ءوزىنىڭ تاريحىنداعى تالاي-تالاي تاماشا ۇستازدارىمەن ماقتانا الادى. ولاردىڭ ەسىمدەرى الدىڭعى تولقىن شاكىرتتەردىڭ جادىندا كوبىرەك ساقتالىپ قالۋى - زاڭدىلىق. سەبەبى ولار سول ۇستازداردان ءدارىس الدى، ءتالىمىن كوردى. تولقىندى تولقىن قۋادى. الدىڭعى بۋىن ۇستازداردىڭ ءبىرشاماسىنىڭ ۇلگىسىن كورىپ، كۇنى كەشە عانا №25 مەكتەپتە اعا بۋىن مۇعالىمدەردىڭ قاتارىن قۇراپ جۇرگەن ءبىر توپ ۇستازداردىڭ وزدەرى دە بۇل كۇندە ارداگەر ۇستازداردىڭ ساپىن تولىقتىرعان ەدى. بۇل ۇستازداردىڭ قاتارىنان ەڭ العاشقى بولىپ سول كەزدە اعا بۋىن ۇستازداردىڭ الدىندا جۇرگەن ماتەماتيكا ءپانىنىڭ ءمۇعالىمى، ءبىر كەزدە ءوزى دە وسى مەكتەپكە باسشىلىق جاساعان امانگەلدى ەسەتوۆتىڭ ەسىمى اتالادى. وسى بۋىن ءارى قاراي مىنا ۇستازدارمەن جالعاسقان ەدى:

مەكتەپ باسشىسى بولىپ ىستەپ، قۇرمەتتى دەمالىسقا شىققان، تاريح ءپانىنىڭ ءمۇعالىمى تەمىربايەۆ الماس، مەكتەپتىڭ تاربيە جۇمىستارىنىڭ مەڭگەرۋشىسى بولعان، ماتەماتيكا ءپانىنىڭ ءمۇعالىمى باينازاروۆ دوسبول، بيولوگيا ءپانىنىڭ ءمۇعالىمى ماحاماشيەۆ تىلەك، ماتەماتيكا ءپانىنىڭ ءمۇعالىمى جۇماعامبەتوۆا رايحان، قازاق ءتىلى ءپانىنىڭ ءمۇعالىمى وتەشوۆا كۇلان، شەت ءتىلى ءپانىنىڭ ءمۇعالىمى كادىروۆا قۋانىش، ورىس ءتىلى ءپانىنىڭ ءمۇعالىمى ساحييەۆ قۋانتقان، دەنە تاربيەسى ءپانىنىڭ ءمۇعالىمى قۋاتبايەۆ مۇرات.

مەديسينا عىلىمدارىنىڭ دوكتورى بەگالى ايتپەمبەتوۆ، فيلولوگيا عىلىمدارىنىڭ دوكتورى توقبولات ەڭسەگەنوۆتەر وسى №25 مەكتەپتىڭ ءبىر كەزدەگى تۇلەپ ۇشقان تۇلەكتەرى ەدى. بۇدان وزگە دە عىلىم جولىنداعى ءبىر كەزگى مەكتەپ تۇلەكتەرى بولىپ ۇشقان ءبىر شوعىر ەر-ازاماتتار قاتارى از ەمەس. ەندى وسى ءبىر ەر-ازاماتتار قالىپتاستىرعان ءۇردىس نازىك جاندىلارمەن جالعاسىن تاپتى. تاعىلىمدى ەڭبەكتەرىمەن كورىنىپ جۇرگەن اۆتور، ۇلاعاتتى ۇستاز، ونەر يەسى، پەداگوگيكا عىلىمدارىنىڭ كاندايداتى ساراش ساحي قىزى قوڭىربايەۆا وسى مەكتەپتىڭ 32-تۇلەگى ەدى.

قازاقستان جازۋشىلار وداعىنىڭ مۇشەلەرى سەيىل بورانبايەۆ، انەس نارىمبەتوۆ، مەشىتباي قۇتتىقوۆ سەكىلدى تالانتتى اقىندار وسى مەكتەپتىڭ قابىرعاسىنان قانات قاقتى. بۇدان كەيىن دە قالامگەرلىك جولدى جالعاستىرعان ەسىمدەرى كوپكە تانىمال بولعان ەر-ازاماتتار قاتارى از ەمەس. وسى اعالار جولىن نازىك جاندى قىز بالالار جالعاستىرا باستادى. بىرنەشە جىر ءمۇشايرالارىنىڭ جەڭىمپازى، جۇلدەگەرى، جاس اقىن دينا بوكەباي وسى مەكتەپتىڭ بيىلعى 68-تۇلەكتەرىنىڭ قاتارىندا ارمان كوگىنە سامعاماق.

وسىدان 37 جىل بۇرىن مەكتەپتىڭ قوس بىردەي ۇلى قاتارىنان مەكتەپتى ۇزدىك ءتامامداپ، التىن مەدالمەن ءبىتىرىپ شىققان ەدى. بۇلار وزدەرىنەن بۇرىنعى تۇلەكتەر، مەكتەپتىڭ العاشقى مەدال يەگەرلەرى - مەكتەپتى كۇمىس مەدالمەن ءبىتىرىپ شىققان ءابي داۋلەتكەرىموۆ، مەكتەپتى التىن مەدالمەن ءبىتىرىپ شىققان الپىسباي قارامولدايەۆ باستاعان ءبىر شوعىر شاكىرت ۇلداردىڭ زاڭدى جالعاسى ەدى. ولاردىڭ اراسىندا ەكى بىردەي مەكتەپتى التىن مەدالمەن ءبىتىرىپ شىققان نازىك جاندى شاكىرت قىزدار بولدى. شاكىرت ۇلدار قالىپتاستىرعان وسى ءبىر ءۇردىس بۇدان كەيىنگى جىلداردا تەك قانا مەكتەپتى ۇزدىك ءبىتىرۋشى قىز بالالاردىڭ ۇلەسىنە عانا ءتيىپ كەلگەن بولسا، مەكتەپتى 2016 جىلى مەكتەپتىڭ 67-تۇلەگى ەلتاي ابىلايحان "التىن بەلگىگە" ءبىتىرىپ شىقتى.

ورتا مەكتەپ رەتىندە ىرگەتاسى قالانعانىنا 2017-2018 وقۋ جىلىندا 70 جىل تولعالى تۇرعان مەكتەپ 2019 جىلى ءوزىنىڭ 70-تۇلەكتەرىن قانات قاقتىرماق.

مەكتەپ جايلى ايتا الدىق پا ءبىز ۇعا،
شاكىرتىنە قارايتىن ەل قىزىعا.
"25-تەن ەدىم" دەيتىن ۇلى دا،
"25-تەن ەدىم" دەيتىن قىزى دا.

مەكتەبىنىڭ ءبىلىم اتتى گۇل باعى
دايىنداپ ەدى، بەردى ومىرگە تۇلعانى.
"25-تە وقىعام" دەيدى سوندىقتان
ءار شاكىرتى - قىزدارى مەن ۇلدارى.

ءار تۇلەكتىڭ ەڭبەگى ەتكەن باعالى
مەكتەبىنىڭ ەسىندە ءار كەز قالادى.
تالاي ءبىلىم سىناعىندا ەڭكەيمەي
25ء-تىڭ بيىك تۇرعان جالاۋى.

تالاي شاكىرت وتكەنىنە قاراعان
شىعارمايدى ءوز مەكتەبىن سانادان.
جيىرما بەس تە سپورتتا، ونەر، بىلىمدە
مىقتىلاردىڭ الدىن تالاي وراعان.

ۇستاز اتى، عاجاپ ەدىڭ سەن نەتكەن،
تابىس جولى الىنبايدى ەش ەرتەكتەن.
بۇل جەردە دە تالاي ۇستاز بالا ءۇشىن
ەڭبەك ەتكەن، تىنشىماستان تەر توككەن.

قوجاباقى - كيەلى ول دا ەل ەدى،
ارتقى تولقىن الدىڭعىعا ەرەدى.
سول داستۇرمەن بولاشاققا ۇمتىلىپ
XXIء-دىڭ جاس ۇرپاعى كەلەدى.

كۇتسىن دەيدى ەل جاس ۇرپاقتى تاڭ كۇلىپ،
جەتەلەيدى بولاشاق دەپ العا ءۇمىت.
الدا - اسۋلار، ال سانادا مەكتەپتىڭ
تاريحى دا تۇرا بەرەدى جاڭعىرىپ.

---