InfoHub Logo

الماتىداعى ءال-فارابي داڭعىلىندا بولعان، ءۇش ادامنىڭ ءومىرىن قيعان جول اپاتىنا قاتىستى قىلمىستىق ءىس قوزعالدى. بۇل تۋرالى 24 ناۋرىزدا الماتى قالالىق پوليسيا دەپارتامەنتى باستىعىنىڭ ورىنباسارى، پوليسيا پولكوۆنيگى رۋستام شارىبايەۆ مالىمدەدى.

بۇل تۋرالى Infohub.kz اقپارات اگەنتتىگى حابارلايدى.

ءىستىڭ ءمان-جايى

ءىس قىلمىستىق كودەكستىڭ 345-بابىنىڭ 4-بولىگى بويىنشا قوزعالدى. بۇل باپ بويىنشا كىنالىگە 10 جىلعا دەيىن باس بوستاندىعىنان ايىرۋ جازاسى قاراستىرىلعان.

اپات 24 ناۋرىز كۇنى تاڭعى ساعات 03:30 شاماسىندا بولدى. باتىسقا قاراي باعىت العان Zeekr ەلەكتروموبيلى جوعارى جىلدامدىقپەن قارسى جولاققا شىعىپ، شىعىسقا قاراي كەلە جاتقان Mercedes اۆتوكولىگىمەن سوقتىعىسقان. Mercedesء-تىڭ جۇرگىزۋشىسى مەن ەكى جولاۋشىسى (ءبىرى 22، ەكىنشىسى 20 جاستاعى قىزدار) وقيعا ورنىندا كوز جۇمدى. Zeekr كولىگىنىڭ جۇرگىزۋشىسى امان قالىپ، جاراقات العاندىقتان مەديسينالىق مەكەمەگە جەتكىزىلدى.

پوليسيا تەرگەۋدە

الماتى قالالىق پوليسيا دەپارتامەنتى باستىعىنىڭ ورىنباسارىنىڭ ايتۋىنشا، قازىرگى ۋاقىتتا كۇدىكتى مەديسينالىق مەكەدەدە باقىلاۋدا. جاعدايى تۇراقتالعاننان كەيىن ۋاقىتشا ۇستاۋ يزولياتورىنا قامالاتىن بولادى.

«اپاتقا قاتىستى بارلىق تۇلعالار انىقتالدى. ولاردىڭ ءارقايسىسىنا قاتىستى اكىمشىلىك ءىس قوزعالىپ، ماتەريالدار سوتقا جىبەرىلدى، كولىكتەر ايىپپۇل تۇراعىنا قويىلدى. ەشكىم جاۋاپكەرشىلىكتەن قاشپايدى»، - دەدى شارىبايەۆ.

ونىڭ ايتۋىنشا، بارلىق بەينەباقىلاۋ كامەرالارىنىڭ جازبالارى، سونىڭ ىشىندە جەكەمەنشىك كامەرالاردىڭ جازبالارى دا الىنىپ، ءىس ماتەريالدارىنا قوسىلعان. قازىرگى ۋاقىتتا ولار مۇقيات زەرتتەلۋدە. سونىمەن قاتار، جۇرگىزۋشىگە الكوگولدى پايدالانۋ بويىنشا مەديسينالىق كۋالاندىرۋ تاعايىندالدى. ناتيجەلەرى كەيىن حابارلانادى.

پولكوۆنيك ازاماتتاردى جالعان اقپارات تاراتپاۋعا جانە تەك رەسمي دەرەككوزدەرگە سۇيەنۋگە شاقىردى. «زاڭ بويىنشا بارلىق كىنالىلەر جاۋاپقا تارتىلادى»، - دەپ اتاپ ءوتتى ول.

قوعامدىق پىكىر

جەلى قولدانۋشىلارى سوڭعى بىرنەشە كۇن بويى ءال-فارابي داڭعىلىنداعى جول اپاتىن بەلسەندى تالقىلاپ جاتىر. قازىرگى ۋاقىتتا بارلىق نازار Zeekr جۇرگىزۋشىسىنىڭ تۇلعاسىنا اۋدارىلعان. كەيبىر سۇراقتارعا ءالى كۇنگە دەيىن رەسمي ورگاندار جاۋاپ بەرگەن جوق.

جەلىدەگى كەيبىر پىكىرلەردە بۇل اپاتتى قۇقىق قورعاۋ جۇيەسى ءۇشىن سىناق دەپ اتاپ، قوعامنىڭ «زاڭ بارىنە بىردەي» دەگەن تالاپتى قويىپ وتىرعانى ايتىلادى. اشىق سوت پروسەسىن تالاپ ەتىپ، ءىستىڭ جابىق ەسىك ارتىندا شەشىلمەۋىن قالايتىندارىن بىلدىرۋدە.

تاۋەلسىز جۋرناليست ميحايل كوزاچكوۆتىڭ اقپاراتى بويىنشا، اپات كەزىندە رۋلدە 32 جاستاعى، الماتىنىڭ جوعارى جاعىندا تۇراتىن بيزنەسمەن بولعان. ونىڭ كولىك تاسىمالى سالاسىندا جۇمىس ىستەيتىن كومپانيالارى بار. ءبىر كومپانياسى 2024 جىلدىڭ كۇزىنەن بەرى قازىناعا 50 ميلليون تەڭگەدەن استام قارجى سالعان.

كۋاگەرلەردىڭ ايتۋىنشا، سول ءتۇنى Zeekr كولىگى باسقا كولىكپەن جارىسقا تۇسكەن.

جۋرناليست اپاتتىڭ كىنالىسى سوت الدىندا جاۋاپ بەرەتىنىنە جانە 10 جىلعا باس بوستاندىعىنان ايىرىلاتىنىنا سەنىم ءبىلدىردى.