InfoHub Logo

ءبىزدىڭ اقىلىمىز بۇلشىقەت سياقتى: ونى دامىتۋ ءۇشىن، ۇنەمى جاتتىقتىرۋ كەرەك. ال ونى قالاي ىستەۋ كەرەگىن كاسىپكەر ءارى بلوگەر توماس وپپونگ ايتىپ بەرەدى.

1. اۋەسقوي بولىڭىز

مەنىڭ ەرەكشە دارىنىم جوق. مەن تەك وتە اۋەسقوي اداممىن.
البەرت ەينشتەين

ءسىز اۋەسقويسىز با؟ بارىنە بىردەي سەنە بەرەسىز بە الدە ماسەلەنىڭ اقيقاتىنا جەتۋگە تىرىساسىز با؟ اۋەسقوي بولىڭىز، الەمنىڭ قانداي ەكەنىن ءبىلىڭىز.

ونى كۇندەلىكتى زاتتار مەن قۇبىلىستاردان باستاۋعا بولادى. مىسالى، نانعا قانداي قوسپالار قوسىلاتىنىن، كومپيۋتەردىڭ قانداي قۇراۋشىلاردان تۇراتىنىن، جەردىڭ كولەمى مەن اۋدانىن، اتموسفەرانىڭ نەدەن تۇراتىنىن انىقتاۋعا تىرىسىڭىز. بۇل ويلانۋعا بولاتىن سۇراقتاردىڭ ءبىر قاتار مىسالدارى عانا.  

اۋەسقويلىق بارلىق دانىشپانداردىڭ ەرەكشە سيپاتى بولعان. اۋەسقوي اقىلدان جاڭا ويلار جاقسىراق شىعادى. ساناڭىزدى اشىق ۇستاڭىز جانە ۇنەمى جاڭا نارسەنى بىلۋگە دايىن ءجۇرىڭىز.  

2. قىزمەت سالاڭىزعا قاتىسى جوق كىتاپتار مەن ماقالالاردى وقىڭىز

ءبىلىم كوكجيەگىن كەڭەيتۋگە تىرىسىڭىز: عارىشتىق ساياحاتتار تۋرالى وقىڭىز، قازىرگى قىزمەتىڭىزگە ەش قاتىسى جوق انتروپولوگيا مەن گەنەتيكانى وقۋدى قولعا الىڭىز. 

ايگىلى ونەرتاپقىشتاردىڭ ءومىرباياندارىن وقىڭىز. جايلى ورتاڭىزدان شىعىپ، الەم جايلى تانىمىڭىزدى كەڭەيتىڭىز. سول كەزدە ءسىزدىڭ اقىلىڭىز تولىسىپ قانا قويماي، اڭگىمەڭىز دە تارتىمدى بولا تۇسەدى.

3. ميىڭىزدى جاتتىقتىرىڭىز

ميعا ارنالعان دۇرىس جاتتىعۋلار اقىل-وي قابىلەتىن جاقسارتادى. دەنە جاتتىعۋلارى سياقتى، ميدى جاتتىقتىرۋ دا زەردەنىڭ دامۋى ءۇشىن وتە ماڭىزدى. قاراپايىم جاتتىعۋلاردان باستاپ، اقىرىنداپ كۇردەلى جاتتىعۋلارعا كوشىڭىز.

4. سپورتپەن اينالىسىڭىز

ميعا عانا ارنالعان جاتتىعۋلار جەتكىلىكسىز. «دەنى ساۋدىڭ – جانى ساۋ» دەپ بەكەر ايتپاعان عوي. بۇل ماتەلدى «دەنى ساۋدىڭ – ميى ساۋ» دەپ ازداپ وزگەرتۋگە دە بولادى. دەنە جاتتىعۋلارى ءسىزدىڭ دەنەڭىز ءۇشىن عانا پايدالى ەمەس. عىلىمي كوزقاراس بويىنشا، ول قاننىڭ ميعا كوبىرەك بارۋىن جانە جاڭا نەيروندىق بايلانىستاردى ىنتالاندىراتىن اقۋىزداردىڭ شىعۋىن ارتتىرادى.

5. جاڭا بىرنارسە ۇيرەنىڭىز

جاڭا نارسە ۇيرەنۋ – ميدى جاقسى ىنتالاندىرادى. ستيۆ دجوبستىڭ ستۋدەنتتىك جىلدارى كالليگرافيامەن اينالىسقانىن ەسىڭىزگە ءتۇسىرىڭىز. ول ستەندفورد تۇلەكتەرىنىڭ الدىندا سويلەگەن ايگىلى سوزىندە: «ەگەر مەن كالليگرافيا كۋرسىنا جازىلماعانىمدا، Macintosh-تىڭ مۇنداي كەرەمەت قارىپتەر گارنيتۋراسى بولماس ەدى» دەگەن بولاتىن.

ءسىز قاي ءبىلىمىڭىزدىڭ پايدالى بولارىن ەشقاشان بىلمەيسىز. سوندىقتان جاڭا نارسە ۇيرەنىپ ءجۇرىڭىز.

6. شىنىمەن پايدالى بولاتىن بلوگتاردى وقىڭىز

ەگەر ءسىز وسى ماقالانى وقىپ وتىرعان بولساڭىز، وندا ماقساتىڭىزدىڭ جارتىسىن ەڭسەرىپ قالعانىڭىز. ءبىراق مۇنىمەن توقتاپ قالماڭىز. جەلىدە ءجيى-جيى وقىپ تۇرۋعا بولاتىن باسقا دا پايدالى مالىمەتتەر بار.

ماقالالاردى ساقتاپ جانە وقىپ ءجۇرۋ ءۇشىن Pocketء-تى نەمەسە وسىعان ۇقساس قىزمەتتەردى پايدالانىڭىز. Evernote-دە وزىڭىزگە قىزىقتى ماتەريالداردىڭ جەكە كىتاپحاناسىن جاساپ قويىڭىز..

7. جەكە بلوگ جۇرگىزىپ جانە وقىعان نارسەلەرىڭىز جايلى اسەرىڭىزبەن ءبولىسىڭىز

جەكە بلوگ جۇرگىزۋ شىعارماشىلىققا دەم بەرەدى. بۇل ءوزىڭىز تۋرالى ايتۋدىڭ مۇمكىندىگى عانا ەمەس، ءوز ويلارىڭىزدى ۇيىمداستىرۋعا كومەك بولادى. ەگەر بىرنارسەمەن بولىسسەڭىز، بۇل ءسىزدىڭ قارىم-قاتىناس داعدىڭىزدى جاقسارتادى. بلوگ ميىڭىزدى تونۋستا ۇستاۋعا كومەكتەسىپ، ءسىزدى جاسامپاز ەتەدى.

بىرنارسە تۋرالى جازعان كەزدە، ونى جاقسىراق تۇسىنە باستايسىز.

اپتا سايىن نەمەسە اي سايىن سول ۋاقىتقا دەيىنگى وقىعان ەڭ قىزىقتى اقپاراتتارىڭىزدان دايدجەست (ءارتۇرلى اقپاراتتاردىڭ قىسقاشا مازمۇنى) جاساڭىز.

---