InfoHub Logo

2024 jylǵa qaraı pedagogterdiń jalaqysy 2 esege artady. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty.

«Pedagog mártebesi týraly» Zańnyń aıasynda pedagogterdiń eńbek jaǵdaıy jaqsartylýda. Pedagogterge tán emes fýnksıalardy jáne kózdelmegen esepterge tartýdan bosatý sharalary qabyldandy. Pedagogter búginde tek 2 qujat toltyrýy kerek: elektrondyq jýrnal jáne oqý jospary. Sonymen qatar barlyq oblysta pedagogterdiń quqyqtaryn qorǵaý jónindegi keńester ashamyz. 2024 jylǵa qaraı pedagogterdiń jalaqysy 2 esege artady», - dedi ol.

Mınıstrdiń paıymynsha, osynyń barlyǵy mektepterdi kadrlarmen tolyq jabdyqtaýǵa múmkindik beredi.

«Taǵy bir mańyzdy másele, pedagogterdi jumysqa qabyldaý endi konkýrs arqyly, naqty biliktilik kórsetkishterge sáıkes júrgiziledi jáne elektrondyq formatqa aýystyrylady. Oǵan qosa 2021 jyldan bastap pedagogıkalyq mamandyq boıynsha jumysqa alǵash ret turý úshin endi úmitkerler kásibı sheberligi boıynsha sertıfıkattaýdan ótedi. Iaǵnı dıplomǵa qosa tıisti kvalıfıkasıa alý mindetti engiziledi. Sonymen qatar biz pedkadrlardy daıarlaý deńgeıin arttyrý maqsatynda joǵary oqý oryndaryna qabyldaý talaptaryn da kúsheıttik»,- dedi Ashat Aımaǵambetov.

Onyń aıtýynsha, pedagogıkalyq mamandyqqa myqty túlekterdi ǵana qabyldaý úshin UBT-nyń shekti baly 50-den 75 balǵa deıin kóterildi. Al, osy mamandyqqa túsýdi yntalandyrý úshin bolashaq pedagogterge stıpendıa mólsheri 42 myń teńgege deıin artty. Iaǵnı olar eń úlken stıpendıany alyp otyr.

«Bul Prezıdenttiń tikeleı tapsyrmasy. Osynyń bári oń nátıje berýde. Pedagog mamandyǵyn tańdaǵan «Altyn belgi» ıegerleriniń qatary eki esege jýyq ulǵaıýda, al osy mamandyqqa túskenderdiń ortasha baly 60 baldan 90 balǵa deıin jetken. Bul muǵalim mamandyǵyna myqty kadrlardyń kelýin qamtamasyz etý boıynsha jaqsy kórsetkish. Bul óz kezeginde bilim berý sapasyn arttyratyny sózsiz. Osy reformanyń oń nátıjesi qazirdiń ózinde anyq kórinedi dep tolyǵymen aıtýǵa bolady», - dedi mınıstr.

---