InfoHub Logo

Qazaqstan mektepteriniń  5 myń oqýshysy mátindi oqý jáne túsiný qabiletine tekseriledi. Bul týraly «Aqparattyq-taldaý ortalyǵy» AQ-dan habarlandy.

«Qazaqstannan halyqaralyq irikteýmen 5008 tórtinshi synyp oqýshylary oqý saýattylyǵy zertteýine qatysý úshin tańdaldy. Atalmysh zertteýge álemniń 250 000 bastaýysh synyp oqýshylary qatysady. Barlyq elder úshin biryńǵaı testileý ýaqyty belgilengen, ıaǵnı,  testileý 80 mınýt 10 mınýttyq úzilispen júrgiziledi. Árbir qatysýshyǵa eki túrli mátin usynylady. Ádebı mátin - bul qyzyqty oqıǵa nemese ertegi retinde usynylady, al ekinshisi  - ǵylymı-aqparattyq baǵyttaǵy mátinder bolady. Onda janýarlar týraly áńgimeler qamtylmaq», - delingen habarlamada.

Oqý saýattylyǵy nátıjesi eki pozısıa boıynsha baǵalanady - ádebı oqý tájirıbesi jáne aqparatty ıgerýi men paıdalana bilýi. Sondaı-aq saýalnamaǵa tórtinshi synyp oqýshylarynyń ata-analary, synyp jetekshileri jáne mektep dırektorlary qatysady.

PIRLS zertteýiniń úılestirýshisi bolyp tabylatyn Oqý jetistikterin baǵalaý jónindegi halyqaralyq qaýymdastyq (IEA) bastaýysh synyp oqýshylarynyń oqý saýattylyǵy deńgeıine áser etetin syrtqy faktorlardyń dárejesi boıynsha taldaýyn usynady. Zertteý 2016 jylǵy 4-30 sáýir aralyǵynda ótedi. Zertteý nátıjesi 2017 jylǵy jeltoqsanda jarıalanady.

Zertteý bes jylda bir ret ótkiziledi. Joba alǵash ret álemniń 35 eliniń qatysýymen 2001 jyly iske asyryldy. PIRLS zertteýiniń 3 kezeńi boıynsha (2001, 2006, 2011) kóshbasshy elder qatarynda Gonkong, Reseı Federasıasy, Fınlándıa jáne Sıngapýr tur.

Avtor: Rýslan Ǵabbasov