InfoHub Logo

Úlken jetistikter tártip pen kúsh jigerdi talap etedi. Olarsyz bizdiń ár talpynysymyz emosıalar, jaǵdaılar men ózge adamdardyń yqpalyna urynady. Bul jaǵdaıdan jalyqtyńyz ba? Usynyp otyrǵan keńesterimiz óz-ózińizdi basqarýǵa kómektesedi.

Jalǵyz motıvasıamen alysqa bara almaıtynyń túsinikti. Birdeńeni bastaýǵa degen qulshynystan ózge, osy bastamany alyp ketý úshin tártip kerek. Tómende ózińdi 21 kúnniń ishinde tártipke keltirýdiń qarapaıym, ári tıimdi ádisteri usynylǵan.

Ózińizdi baqylańyz

21 kún boıy ózińizdi baqylańyz: ne isteısiz, qalaı turasyz, qalaı sóıleısiz, nege bógelesiz, qalaı júresiz jáne qalaı kıinesiz. Tolyqtaı ózińizdi baqylańyz. Eshteńeni shuqylamańyz, arqańyzdy tik ustańyz, qoldaryńyz ben aıaqtaryńyzdy qadaǵalańyz. Bosańsı bastaıtyn sátterińizdi baıqańyz. Jalǵyz bolǵan kúnniń ózinde jınaqy júrińiz.

Úıde, jumysta nemese jattyǵý zalynda júrseńiz de árdaıym ózińizdi senimdi ustap, pozıtıv shashyp júrýińiz kerek. Túr-álpetińiz de 100 paıyzǵa kútilgen bolǵany durys. Óz stılińizdi qalyptastyryp, sony ustanyńyz.

Óz súıkimdiligińiz jaıly oılaǵan saıyn, ol eselene túsedi. Kúndelikti kamera aldynda júrmin dep esepteńiz, sol sebepti erteńgi kúni kórermennen uıat bolmas úshin árdaıym jarqyrap júrýińiz kerek.

Ózińdi baqylaýdy úırenýge teńiz áskeriniń turysy degen kúndelikti jasalynatyn jattyǵý kómektesedi. Qabyrǵaǵa jaqyndańyz da, óksheńizdi, quıryǵyńyzdy, jaýyrynyńyzdy, jelkeńiz ben shyntaǵyńyzdy tıgizińiz. Osyndaı pozada kúndelikti kem degende 10 mınýt turý kerek. Birneshe kúnnen keıin arqańyz túzýlene bastaǵanyn baıqaısyz.

Bul kishigirim jıyntyq ózindi tártipke keltirýge úıretedi, osylaısha siz óz áreketterińizdi baqylaýdy úırenesiz. Esińizde bolsyn, muny siz ózińiz úshin jasaısyz, bireýler úshin emes.

Tańerteńgilik salt jora oılap tabyńyz

Bizdiń ónimdiligimiz ben jınaqylyǵymyz tańerteń qalaı turǵanymyzǵa baılanysty. Saǵat segizde oıatqyshtyń dybysynan keıin áreń turyp, kún sońynda tezirek tósekke oralýdy oılap turýǵa bolady. Dál úıden shyǵar aldynda turyp, apyl-ǵupyl jınalyp, býterbrodty sómkege tyǵa salyp, aınalada jáne basyńda ne bolyp jatqanyn túsinbeı dalaǵa atyp shyǵýǵa bolady. Biraq eń durysy ózińdi oıanýǵa aldyn ala daıyndaý, óz bıorıtmińdi sezip, jańa kúnniń demin seziný. Sizdi jańa kúnge beıimdeıtin tańerteńgilik salt jorańyz bolsyn.

Mine qarapaıym nusqa: oıatqyshtyń birinshi dybysynan oıaný, azdaǵan fızıkalyq jattyǵý, ystyq-salqyn dýsh, paıdaly tańǵy as, oqý. Munyń bárin siz shamamen bir saǵatta jasaısyz. Osyny ádetke aınaldyrý úshin sizge 21 kún jetkilikti.

Qandaı salt jora oılap tabatynyńyz mańyzdy emes. Eń bastysy, siz odan demalys jáne meıram kúnderi de bas tartpaýyńyz kerek.

Ýaqytyńyzdy tıimdirek jumsap, jınaqy, tártipti bola bastaǵanyńyzdy ózińiz baıqamaı qalasyz. Ýaqyt óte kele tańǵy jumystardy avtomatty túrde jasaısyz, olar ómirińizdiń bir bóligine aınalady.

Jáne de uıqy jaıly umytpańyz. Uıqyńyz qaný úshin 7-8 saǵat uıyqtaý kerek.

Taqýa bolyńyz

Eń aldymen 21 kúniń ishinde neden arylatynyńyzdy naqtylap alý kerek. Mysaly súıikti taǵamyńyzdy tym quryǵanda bir apta jemeńiz, eń durysy úsh apta boıy. Jaqsy jattyǵý — táttini kórinetin jerge qoıyp, kúni boıy oǵan qol tıgizbeý.

Sonymen qatar, fılmder, áleýmettik jeliler, temeki, áńgimeler men oıyndardy (t.b) da toqtatýǵa bolady. Eń bastysy — ózińe joq dep aıtýdy úırený.

Adam óz-ózin basqarýyn úırenýi kerek, keri jaǵdaıda ony qorshaǵan jaǵdaılar basqaratyn bolady. Emosıalarǵa berilmeı, alǵa qoıǵan maqsattan taımaý kerek.

Biraq eń qıyn synaq — úsh apta áleýmetten oqshaýlaný: adamdarmen jumys babymen ǵana sóılesý nemese otbasylyq ortada ǵana júrý. Qonaqqa, kınoǵa, sharalarǵa, dúkenderge barmaý. Úsh apta boıy ózińizben ózińiz bolyńyz, munyń ónimdiligińizge qalaı áser etetinin baıqaısyz.

Aldyńyzǵa qıyn tapsyrmalar qoıyńyz

Bir aptada óte qıyn degen tapsyrmany alyńyz da, sony qalaı da oryndaýǵa tyrysyńyz. Aýa raıy, túrli jaǵdaılar, kóńil kúı, eshteńe mańyzdy emes. Kúnine 50 ret keýdeni jerden kóterip jattyǵý jasaısyz ba? 80, 90 - ǵa ótińiz nemese tipti 100 - ge  — shekteý joq. Eki kúnde bir maqala jazasyz ba? Ekeý jazyńyz. Kóp aqsha jaratasyz ba? Birneshe kún boıy múlde aqsha qurtpańyz. Qolyńyzdan kele me?

Eger kúshińizdi esepke almaı, tapsyrma tańdaǵan bolsańyz, onda soǵystaǵy buıryqtaı qabyldańyz. Siz ony mindetti túrde oryndaýyńyz kerek, basqa jol joq. Bir kúnde úlgermeısiz be? Qajettiniń barlyǵyn istep bitpeıinshe, basqa isterdi qoıa turyńyz.

Bul tapsyrma óte qıyn, sebebi ózińdi satyp ketýge bolmaıdy. Osyny jasap bolǵan soń, kúsh qýatyńyz artyp, kóp nárseni isteı alatynyńyzdy bilip boıyńyzdy maqtanysh bıleıdi. Sebebi barlyq shekteýler tek ózińizdiń qıalyńyz ekenin ańǵarasyz.

Nátıjege den qoıyńyz

Bul jattyǵý aldyńǵy jattyǵýǵa uqsas, biraq munda siz maqsat tańdap, jospar qurasyz jáne oılaǵanyńyzdy iske asyrýǵa qansha ýaqyt pen resýrs kerek ekenin esepteısiz.

21 kúnniń ishinde birdeńege qol jetkizip kórińiz: temekini tastańyz, kitaptyń bir taraýyn jazyńyz, 3 keli salmaq tastańyz, úlken jobany aıaqtańyz... Sol kezde adamdar, jaǵdaılar, kóńil kúı, oıyn-saýyq, ınternet jáne taǵy basqalar merzimge saı aıaqtaýǵa qanshalyqty kedergi keltiretinin baıqaısyz. Biraq kóńilińiz túspesin.

Bar nazaryńyz alǵa qoıǵan maqsatyńyzda bolsyn, joldyń sońynda soǵan jetkenińizdi elestetińiz jáne sizdi alańdatatyn faktorlar jaıly oılamańyz.

Smartfon men kompúterińizdegi eskertýlerge nátıjege qol jetkizý úshin ne isteý kerek ekenin jazyp, jıi iske qosyńyz.

Qolda bar múmkindikterge ǵana súıenip áreket etýge bolmaıdy: olaı etseńiz, siz de aınaladaǵy myńdaǵan adamdar sıaqty jetistikke umtylýdy bastamaısyz jáne ózińizge degen senim de paıda bolmaıdy. Bolashaqqa qarańyz jáne ony ózińizge tartyńyz.

Ádetti qalyptastyrý ýaqyt pen jigerdi talap etetinin esten shyǵarmańyz, esesine keıin olar sizdi kez kelgen qıyndyqqa qaramastan armandaryńyzǵa jeteleıtin bolady.

---