InfoHub Logo

Taǵam ázirlegendi unatpaıtyn nemese únemi ýaqyty bolmaıtyndar úshin bilim-all.kz qarapaıym, biraq óte dámdi taǵam túrleriniń toptamasyn daıyndady.

Tańǵy as

Tańerteń taǵam ázirleýge únemi ýaqyt bolmaı jatady. Alaıda, tańǵy asty ishpeýge de bolmaıdy. Mine, kúnniń alǵashqy bóligine qajetti kúshti tez jınaý úshin kerekti birneshe oımen bólispekshimiz.

1. Keptirilgen jemis qosylǵan suly jarmasy

Ortasha kólemdegi kástrólde ½ lıtr sútti jylytý kerek. Ústine 6 as qasyq suly jarmasyn salyp, ortasha otta qatty qaınaǵanǵa deıin qaınatyńyz. Bir shym-shym tuz, bir shaı qasyq qant salyp, otty azaıtyp, taǵy da birneshe mınýt qaınatyńyz.

Sol ýaqyt aralyǵynda birneshe qara órik pen keptirilgen órikti jáne azdaǵan jańǵaqty maıdalap qoıyńyz. Maıdalaǵan soń, daıyn botqaǵa sary maımen birge salyńyz.

2. Nanmen qýyrylǵan jumyrtqa

Rómkeniń nemese metal qalypty saqınanyń kómegimen bir tilim aq nannyń ortasyna dóńgelek sańylaý jasańyz. Tabany sary maımen maılap, nandy qýyryńyz (eki jaǵyn kezekpen 30 sekýndtan).

Sosyn nannyń ortasyna jumyrtqany jaryńyz. Tuzdap, burysh salyp, kókónisten sebińiz de, aqýyzy piskenshe qýyryńyz. Tárelkege salyp, erekshe qýyrylǵan jumyrtqany súısine jeńiz.

3. Qyzanaq qosylǵan omlet

Eki úlken qyzanaqtyń bas jaǵyn kesip alyp, qasyqtyń kómegimen ózegin alyp tastańyz. Jumyrtqany úgitilgen irimshikpen, maıdalanǵan aqjelken men askókpen aralastyryńyz. Tuzdap, burysh salyp, qyzanaqtardyń ishine quıyńyz. Kesip alǵan qyzanaqtyń basyn jaýyp, qysqatolqyndy peshke 3–4 mınýtqa salyp alyńyz.

4. Tostaǵandaǵy omlet

Tostaǵandy sary maımen maılap, ishine eki jumyrtqa jaryńyz. Tuz salyp, shanyshqynyń kómegimen aralastyryńyz. Pisken shujyqtyń nemese ystalǵan taýyqtyń bir bóligin tórtburyshty etip týrap, ony da salyp, aralastyryńyz.

Úgitilgen irimshik seýip, qysqatolqyndy peshke bir mınýtqa qoıyńyz. Sosyn alyp, taǵy aralastyryp, qysqatolqyndy peshke qaıtadan bir mınýtqa salamyz.

5. Avokado qosylǵan sendvıch

Qarabıdaı nanyn tabada nemese tosterde keptirińiz. Sol ýaqyt aralyǵynda qyzanaq pen shaǵyn avokadony maıdalańyz. Kókónisterge eki as qasyq hýmýs pen bir shym-shym oregan qosyńyz. Nanǵa jaǵyp, súısinip jeı berińiz.

6. Suly quımaqtary

Blenderdiń ydysyna ½ stakan suly qaýyzyn, 150 g grek ıogýrtyn, jumyrtqa jáne pisken banannyń jartysyn salyńyz. Ústine ½ shaı qasyq naýbaıhana untaǵyn men vanılın qosyp, aralastyryńyz. Eger suıyqtaý bolsa, 1–2 as qasyq suly qosyp, taǵy aralastyryńyz.

Quımaqtardy maılanǵan, jaqsylap qyzdyrylǵan tabada pisirińiz. Daıyn quımaqtardy jańa pisken nemese muzdatylǵan jemistermen usynyńyz.

7. İrimshik botqasy

300 g maıly qaımaqty túbi qalyń kástrólge quıyp, otqa qaınaǵansha qoıyńyz. Qaımaq qaınaǵansha, 200 g jaqsy osetın irimshigin shanyshqymen ezip, qaınap turǵan qaımaqqa qosyńyz. Úzdiksiz aralastyryp turyp, tuz ben bir stakan júgeri unyn qosyńyz. Aralastyryp turyp, krem tústes bolǵansha qaınatyńyz. İrimshik botqasy jabysqaq ári sozylmaly bolý kerek.

8. «Krok-mese» fransýz býterbrody

Tosttarǵa arnalǵan nanǵa (nemese kádimgi nan) dıjon qyshasyn jaǵyńyz da, záıtún maıy jaǵylǵan qańyltyr tabaǵa salyńyz. Ár tilik nannyń ústine úlken úkkishten ótkizilgen irimshikten (durysy — grúıer) jáne bir tilim shujyqtan qoıyńyz. Taǵy da irimshik seýip, ústine taǵy bir nan qoıyńyz.  

Býterbrodtardyń betine záıtún maıyn jaǵyp, jaqsy qyzdyrylǵan peshke salyp, altyn tústes bolǵansha ustaımyz. Taǵamdy usynar aldynda beshamel tuzdyǵyn quısa bolady.  

9. Banan men qysha qosylǵan tost

Tostqa arnalǵan nanǵa nemese batonǵa jumsartylǵan sary maı jaǵyńyz. Ár tilikke eki banan túıirinen qoıyńyz. Qoıytylǵan sútten quıyp, quraq qant pen qysha sebińiz.  Maıy betine shyǵatyndaı etip taǵy bir nan tiligin qabattańyz. Qysqatolqyndy peshke 30 sekýndqa salyńyz nemese tosttardy vaflı pisirgishke salyp qyzartyp alyńyz.  

10. Jerjańǵaq pastasy men jemis-jıdekti tosttar

Aq nandy nemese batondy tosterde keptirip alyńyz. Betki qabaty kútirlek bolýy tıis. Ár tilikke jerjańǵaq pastasyn jaǵyp, ústine ózińizge unaıtyn kez kelgen jemis–jıdekti qoıyńyz.  Mysaly, banan, kıvı nemese qulpynaı. Tosttardy kofemen birge ystyq kúıinde usynyńyz.   

11. Jemis-jıdekti súzbeli krem

Maılylyǵy 9% 200–300 g súzbeni 3–4 as qasyq maıly qaımaqpen birge blender salyp, aralastyrý kerek. Ústine 2–3 as qasyq qoıytylǵan sútten quıyp, taǵy da aralastyrý qajet. Maýsymdyq nemese konservilengen jemistermen jáne tosttarmen birge usynyńyz.

12. Banan-jıdekti smýzı

Eki tal pisken banandy, ½ stakan jańa pisken nemese muzdatylǵan jıdekti (mysaly, tańqýraı men qarajıdek), bir stakan jıdekti morsty jáne maısyzdandyrylǵan ishetin ıogýrtty bir ydysqa salyńyz.  Bárin bir qalypqa kelgenshe blendermen aralastyramyz. Bokaldarǵa quıyp, birden dastarhanǵa usynyńyz.  

Túski as

Birinshi taǵam túrin bir aptaǵa aldyn ala jasap qoıýǵa bolady. Borsh pen shı tońazytqyshta bir apta tura beredi. Uzaq turǵan saıyn dámi kire túsedi. Al ekinshi taǵam túrinde únemi ýaqyt ta, kúsh te jetpeı jatady. Biraq jyldamdatyp birnárse jasaýǵa da bolady.

13. Tostaǵandaǵy irimshik qosylǵan makarondar

Úlken ydysta ½ stakan sútti jylytyńyz (qysqatolqyndy peshke bir mınýtqa qoısa jetkilikti). Jińishke makaronnan 2–3 as qasyq salyp, qysqa tolqyndy peshke taǵy da 3 mınýtqa salyp alyńyz. Sosyn alyp, aralastyryńyz da, úgitilgen irimshikti seýip, taǵy birneshe mınýtqa qaldyryńyz.

14. İrimshikti ýyzdyq

½ stakan suly qaýyzyna eki stakan qaınaǵan sý quıyńyz. Birneshe mınýtqa qaldyryńyz. Sol ýaqyt aralyǵynda kózi maıda úkkishten irimshikti ótkizińiz  (100–200 g), kók pıazdy týrańyz, sarymsaqty syǵyńyz. Bárin sulyǵa qosyp, tuzdap, burysh salyp, muqıat aralastyryńyz.

Basqa tabada birneshe jumyrtqany qýyryńyz. Qýyrylǵan jumyrtqany suly-irimshikti taǵamnyń ústine qoıý kerek. Ústine kókónis týrap, burysh sebýge bolady.

15. Taýyq pen qyzanaqty panını

Bir as qasyq maıonezdi, bir as qasyq qyzanaq tuzdyǵyn, ½ lımon sýyn jáne týralǵan raıhangúldi aralastyryńyz. Osy qospany panınıge arnalǵan toqashtyń astyńǵy bóligine jaǵyńyz. Ústine qaınatylǵan nemese keptirilgen taýyq súbesi men qyzanaqtardy qoıyńyz. Ústine úgitilgen irimshikti seýip, toqashtyń ekinshi bóligin qoıyńyz.  

Aýzyn qaqpaqpen nemese basqa tabamen basyp turyp panınıdi shoıyn tabada 3–5 mınýt qýyryńyz. Tómengi jaǵynda qabyqsha paıda bolady, al, irimshik erip ketedi.

16. Taýyq pen avokada qosylǵan kapreze

½ stakan bálzamdy sirke sýyna  2 as qasyq quraq qantty qosyp, qysqatolqyndy peshke birneshe mınýtqa qoıý kerek. Qant erýi kerek.

Sol ýaqyt aralyǵynda záıtún maıyna pisken taýyq súbesin qýyryńyz. Osylaısha qyzdyrsańyz, qabyqshasy qyzǵylt túske aınalady. Shuńǵyl ydysqa týralǵan taýyqty, avokado, mosarelllalardy jáne cherrı qyzanaǵyn (ortasynan bólýge bolady) salyńyz. Bálzamdy sirke sýyn quıyp, maıdalanǵan raıhan gúlin seýip, dastarhanǵa usynsańyz bolady.  

17. Sarymsaq qosylǵan dámdi asshaıandar

Úlken shuńǵyl tabaǵa 2–3 as qasyq záıtún maıyn quıyp, qyzdyryńyz. Ústine tazalanǵan 300–500 g asshaıan, 2–4 tal maıdalanǵan sarymsaq pen qalaýyńyzsha dámdeýishter salyńyz.

Asshaıandardy sál qyzarǵansha 3–5 mınýt qýyryńyz. Sosyn olardy ydysqa salyp, ústine bir lımon shyrynyn quıyp, maıdalanǵan kókónisterdi sebińiz.

18. Qýyrylǵan kálmarlar

Kálmarlardyń ishi-syrtyn tazalap, quıryqtaryn kesip, shemirshekti «tilin» alyp tastańyz. Jýyp, qaǵaz maılyqpen ishi-syrtyn muqıat keptirińiz. Kálmarlardy shamamen 2 santımetr qalyńdyqta saqına tárizdes etip kesińiz. Un men tuz aralasqan suıyq qamyrǵa aýnatyp, shyjyp turǵan maıda qýyryńyz (ár jaǵyn bir mınýttan). Artyq maıdy qaǵaz maılyqtyń kómegimen alyp tastańyz. 

19. Qyzanaq pen kókónis qosylǵan shujyq

Eki taba daıyndap alyńyz. Bireýine ósimdik maıyn quıyp, tórtburyshty etip týralǵan 500 g shujyqty qýyryńyz. Ekinshisine úlken etip týralǵan  500 g qyzanaqty qýyryńyz. Qyzanaqtardy kereginshe tuzdap, burysh salyńyz. Salat japyraqtarynyń ústine shujyqty, sosyn ústine tomat tuzdyǵyn quıyńyz. Maıdalanǵan kókónisterdi seýip, lımon shyrynyn quıyńyz. 

20. Shujyq qosylǵan lavashty rýlet

Maıonez ben kechýpty (shamamen 1–2 as qasyqtan) jáne syǵylǵan sarymsaqty aralastyryńyz. Daıyn qospany juqa lavashqa jaǵyńyz. Rýlet tyǵyz bolýy úshin sońǵysyn eki ret oraǵan jaqsy. Salma retinde shujyqty (jińishke etip týraǵan durys) jáne qatty irimshikti (úkkishten ótkizilgen) paıdalanǵan durys. Lavashty rýlet túrinde orap, qalyńdyǵyn eki santımetr kólemde kesińiz.  

21. Taýyq býrrıtosy

Súrlengen san etin nemese taýyq súbesin tekshe pishinde týrańyz. Tomat tuzdyǵy jaǵylǵan tortıláǵa etti jańa pisken qıarmen, salat japyraqtarymen jáne mosarellamen birge orańyz. Qalasańyz, týralǵan kúnze, raıhan nemese basqa da kókónisti qosýǵa bolady.

Býrrıtony qatty qyzǵan tabada qyzdyryńyz. Syrty qabyqshasy qyzaryp, ishindegi irimshik erýi tıis.

22. Shujyq pen irimshik qosylǵan sosıska

Sosıskanyń syrtyn tazalap, árqaısysyn bólińiz. Qatty irimshikti uzynsha etip týrańyz. Sosıskalardy irimshikpen farshtańyz da, syrtyn bir nemese eki shujyq tilimderine aınaldyryńyz. Jaqsylap qyzdyrylǵan peshke  5–7 mınýtqa qoıyńyz. Dastarhanǵa usynar aldynda dıjon qyshasyn nemese etke arnalǵan kez kelgen tuzdyq jaǵyńyz.  

23. Qozyquıryq qosylǵan frıkase

Pisirilgen qus tósin uzynsha etip týrap, syrty ábden qyzarǵansha záıtún maıyna qýyryńyz. Maıdalanǵan konservilengen qozyquıryqty nemese talǵamyńyzǵa qaraı basqa sańyraýqulaqty qosyńyz. Taǵy bir mınýt qýyryńyz. Ústine buryshpen, karrı untaǵymen jáne talǵamyńyzǵa saı basqa da dámdeýishtermen birge sýǵa aralasqan qaımaqty quıyńyz. Qaımaqty tuzdyq qoıýlanǵansha buqtyryńyz.

24. Kilegeıdegi qozyquıryqtar

Konservlengen qozyquıryqtardy nemese basqa da sańyraýqulaqtardy maıdalap týralǵan pıazben birge maıǵa qýyryńyz. Tuzdaýdy umytpańyz. Sańyraýqulaqtyń barlyq sýy tartylǵan soń, 100 g maıly kilegeı quıyńyz. Úgitilgen teńiz jańǵaǵyn seýip, taǵy da birneshe mınýt buqtyryńyz. Krem tústi qoıýlanǵan kilegeı — taǵamnyń daıyn boldy degeni.

25. Batondaǵy pıssa

Salma ázirleńiz: 200 gr shujyqty tórtburyshtap týrap, 200 gr qatty irimshikti úkkishten ótkizip, tuzdap, burysh qosyp, eki as qasyq maıonez ben kechýp qosyńyz. Osy salmany bir tilim batonnyń úctine qoıyp, maıdalap týralǵan kóktatar seýip, jaqsy qyzdyrylǵan peshte irimshik erigenshe ustańyz.

26. Brýsketta

Baton nemese tostqa arnalǵan nanǵa sarymsaq aralastyrylǵan sary maı jaǵyńyz. Sodan keıin 1-2 mınýt peshte keptirińiz. Onyń betine mosarella nemese ózińiz unatqan basqa irimshikti týrap salyp, onyń ústine maıdalap týralǵan raıhangúl aralastyryp, záıtún maıy, tuz, burysh jáne basqa da dámdeýishtermen aralastyrylǵan qyzanaq bólikterin qoıyńyz. Daıyn brýsketti birneshe mınýtqa irimshik erý úshin peshke qoıyńyz.  

27. Ashshy tuzdyq qosylǵan jumyrtqa pashoty

Jumyrtqa pashotyn daıyndańyz. Bul úshin eki staqan sýdy qaınatyp, oǵan tuz ben jarty qasyq sirke sýyn qosyńyz. Jumyrtqany aı jaǵylǵan pashot pisirgishke nemese shuńǵyl tabaqqa jaryp salyńyz. Ony abaılap qaınap turǵan sýǵa salyp, 3 mınýttaı qaınatyńyz. Jumyrtqa pashotyn ashshy tuzdyqpen birge usynyńyz: qospa qosylmaǵan 200 gr ıogýrtqa sarymsaq ezgishpen ezilgen sarymsaq, paprıka, tuz jáne burysh qosyńyz.  

28. Lımon shyrynyndaǵy sýkını

Tazalap, maıdalanyp týralǵan sýkınıdi (200-300 gr) erigen sary maı (20-30gr) salynǵan tabaǵa salyńyz. Dámine qaraı tuzdap, burysh qosyńyz. Bir lımondy syǵyp, shyrynyn qosyp, 5 mınýt boıy qaqpaǵyn jaýyp buqtyryńyz.

Tiskebasar

Kelesi taǵamdardy ózin ǵana jeýge nemese basqa taǵamdarǵa qosyp tutynýǵa bolady. Olardyń kóbin jeńil keshki as retinde usynýǵa da bolady.

29. Keptirilgen maıshabaqtan jasalǵan pashtet

Keptirilgen maıshabaqtyń bir súbesin alyńyz nemese balyqty ózińiz ázirleńiz. Ony 200 gr sary maı, qara untaqtalǵan burysh jáne bir lımonnyń jumsaǵyn qosyp blendrdiń kómegimen maıdalańyz. Osydan shyqqan birtekti massany áınek nemese plasık ydysqa salyp, birneshe saǵat tońazytqyshqa qoıý kerek. Maıshabaq pashtetimen jáne borodın nanymen dámdi býterbrod jasaýǵa bolady.

30. Jańǵaq qosylǵan qyzylsha

Bir ortasha qyzylshany pisirińiz. Kókónis sýyǵan soń, ony tazalap, ortasha kózdi úkkishten ótkizińiz. Tuzdańyz. Úkkishpen nemese kofe ýatqyshtyń kómegimen grek jańǵaǵyn maıdalańyz. Ony qyzylshaǵa qosyp, záıtún maıymen aralastyryp, dastarhanǵa qoıyńyz.

31. İrimshik pen sarymsaq qosylǵan qyzanaq

2–3 balǵyn qyzanaqty ortasynan bólińiz. Shaı qasyqpen ózegin alyp tastańyz. Eki balqytylǵan irimshikti úkkishten ótkizińiz. Olar qolyńyzǵa jabysyp qalmaý úshin aldyn ala tońazytqyshqa qoıyp qoıyńyz. İrimshikti sarymsaqtyń ezilgen 2-3 bóligimen aralastyryńyz. Maıonez qosyńyz. Alynǵan irimshikti massamen qyzanaqty toltyryńyz.

32. Ashshy sábiz

2 ortasha sábiz ben, sarymsaqtyń birneshe bóligin tazalańyz. Bul tiskebasardyń ashshylyǵyn óz qalaýyńyz boıynsha tańdaýǵa bolady. Sábizdi ortasha kózdi úkkishten ótkizip, oǵan ezilgen sarymsaqty qosyńyz. Tuzdap, burysh qosyp, maıonezben aralastyryńyz. Bul tiskebasardy býterbordyń ústine jaqsa bolady nemese nemese jumyrtqanyń ishine salsa bolady.

33. Qara órik qosylǵan sábiz

100 g qaraórikke ystyq sý quıyp, 2-3 mınýtqa qoıyp qoıyńyz. Bul ýaqytta 2 sábizdi tazalap, iri kózdi úkkishten ótkizińiz. Qaraórikti týrap, sábizge qosyńyz. Oǵan 30 gr ýatylǵan grek jańǵaǵyn qosyp, qaımaqpen aralastyryńyz. Eger qaraóriktiń dámi qyshqyldaý bolsa, onda bir qasyq qant qosyńyz.

34. «Stýdent» salaty

Salattyń ataýynyń ózi aıtyp turǵandaı, buǵan az qospa qosylyp, tez daıyndalady, ári qunarly bolady. Bul salatty tabıǵat aıasyna shyqqan kezde de tez ázirleýge bolady.

Konvervidegi júgeri men úrme burshaqtyń sýyn tógip tastańyz. Úrmeburyshaqtyń qyzanaq tuzdyǵyndaǵysyn alǵan durys. Ekeýin shuńǵyl ydysqa salyp, shujyq dámi bar kepken nan qosyp, maıonezben aralastyryńyz. Qajetine qaraı tuz ben burysh salyńyz.

35. Almurt pen anar salaty

1–2 almurtty jýyp, tórtburyshtap týrańyz. Qyzyl tátti pıazdy týrańyz. Osynyń bárin bir anardyń dánderimen aralastyryńyz. Onyń ústine maıdalap týralǵan kúnze, dámine qaraı tuz jáne untaqtalǵan qara burysh qosyńyz.  Záıtún maıy men lımon shyrynymen aralastyryńyz. Dıetalyq sergitkish salat daıyn.

36. Qyzanaq pen súzbe irimshik salaty

Birneshe qyzanaqty jýyp, iri-iri etip týrańyz. Súzbe irimshikti tórtburyshtap týrańyz. Súzbe irimshik ornyna feta irimshik nemese mosarella qoldanýǵa bolady. Tátti qyzyl pıazdy arshyp, týrańyz. Osy qospanyń bárin biriktirip, azdap tuz seýip, záıtún maıymen aralastyryńyz.

37. Shalǵam men qyzanaq qosylǵan salat

2–3 qyzanaq pen 3-4 shalǵamdy tazalap, iri-iri etip týrańyz. Tátti qyzyl pıazdy arshyp, jarty saqına túrinde týrańyz. Osy qospalardyń bárin aralastyryp, salatqa bir as qasyq sharap sirke sýyn, 4 as qasyq záıtún maıyn, ½ shaı qasyq quraq qantyn, tuz jáne untaqtalǵan qara burysh qosyńyz.

38. Ananas pen baldyrkók qosylǵan salat

Bir kók alma men 100 gr baldyrkókti iri kózdi úkkishten ótkizińiz. Konservidegi ananastyń sýyn tógip tastap, tórtburyshtap týrańyz. Barlyq qospany qosyp, dámine qaraı tuzdap, maıonezben aralastyryńyz. Qalaýyńyz boıynsha ýatylǵan keshú nemese badam qosýǵa bolady.

39. Aqserke men kıvı qosylǵan salat

Kıvıdi, bolgar buryshyn (dánderin alyp tastaýdy umytpańyz) jáne az tuzdalǵan aqserke súbesin tazalap, iri-iri tórtburyshtap týrańyz. Bir ortasha bas pıazdy jartylaı saqınalap týrańyz.  Barlyq qospany aralastyryp, bir as qasyq záıtún maıy men bir as qasyq lımon syǵyndysyn qosyńyz. Bir shymshym tuz, qant jáne qara burysh qosyńyz. Aralastyryńyz.

40. Ystyq maıdaǵy qozyquıryq

200–300 gr qozyquıryqty juqalap, uzynshalap týrańyz da, tuzdap birneshe mınýtqa qoıyp qoıyńyz. Oǵan deıin tabaǵa maı quıyp, qyzdyryńyz. Qozyquıryqtyń ár bóligin unǵa aýnatyp, qyzyp turǵan maıǵa qýyryńyz. Daıyn asty ystyq kúıinde nemese salqyn kúıinde jeı berýge bolady.  

41. Aqserke men avokado jaǵylǵan nan

Qara nandy týrańyz (3 × 3 sm kóleminde). Olarǵa kilegeıli irimshikten jaǵyńyz. Ár tilimge pisken avokadonyń bir tiliginen jáne az tuzdalǵan aqserkeniń bir kesimin qoıyńyz. Aqserkeniń ornyna albyrt nemese alabalyq ta bola beredi.

42. Taýyq naggetsi

Taýyqtyń tós etin tórtburyshtap týrap, olardyń árqaısyn tuz qosyp aralastyrylǵan jumyrtqaǵa aýnatyp alyp, ósimdik maıyna qýyryńyz. Naggetsterdi ydystarǵa salyp, janynan qıar men qyzanaq týrap qoıyńyz.

Desertter

Barlyq desertter úshin birneshe saǵat peshtiń janynda turýdyń keregi joq. Tez daıyndalyp, dámi jaǵynan basqalardan qalyspaıtyn desert túrleri de bar.

43. Tańqýraı balmuzdaǵy

500 gr muzdatylǵan tańqýraıǵa bir staqan maıly salqyn kilegeı, ½ staqan qant ulpasy jáne shaı qasyq vanıl qosyp, blendermen aralastyryńyz. Budan erigen balmuzdaqqa uqsaıtyn qoıý salqyn qospa shyǵady.  Solaı jeýge de bolady nemese biraz ýaqytqa muzdatqyshqa qoıyp qoıýǵa da bolady. Eger tońazytqyshyńyzda qatty tońazytý qyzmeti bolsa, bári budan da tez bolay.

44. Súzbe-qulpynaı deserti

Bir qorapsha súzbe men 100 gr jańa pisken qulpynaıdy blendermen nemese mıksermen aralastyryńyz. Eger suıyq bolyp ketse, banan qosyńyz. Al táttisi az bolsa, birneshe shaı qasyq qant ulpasyn qosyńyz.

45. Sháshkedegi shokoladty keks

Tez daıyndalatyn sháshkedegi desertterdiń túri óte kóp. Mine solardyń biri. 2 as qasyq sary maıdy eritip (qysqatolqyndy peshte 20-30 sekýnd ustasańyz jetkilikti) oǵan 2 as qasyq qant, ½ shaı qasyq vanılın jáne shymshym tuz salyńyz. Sháshkege jumyrtqanyń sary ýyzyn quıyp, bárin aralastyryńyz. Oǵan bir as qasyq kakao qosyp aralastyrylǵan 4 as qasyq un qosyńyz. Qamyrdy shokoladtyń birneshe bólikterimen aralastyryp, qysqatolqyndy peshke 3 mınýtqa qoıyńyz.

46. Jańǵaq torty

3 jumyrtqany untaqtalǵan orman jańǵaǵy nemese badam jańǵaǵymen aralastyryńyz. Oǵan 100 gr qant ulpasy men bir shaı qasyq qopsytqysh qosyńyz. Taǵy da jaqsylap aralastyryńyz. Qysqatolqyndy peshke arnalǵan shaǵyn áınek ydysty maılap, un sebińiz. Oǵan qamyrdy quıyp, qysqa tolqyndy peshte barlyq qýatymen 5 mınýt pisirińiz. Daıyn nanǵa sary maı qosylyp kópsitilgen qaınatylǵan qoıyltylǵan sút nemese kez-kelgen basqa kremdi jaǵyńyz. 

47. Anar qosylǵan apelsın

2 as qasyq quraq qanty qosylǵan bir staqan apelsın shyrynyn qaınatýǵa deıin jetkizińiz. Sodan keıin aldyn ala sýyq sýmen aralastyryp qoıǵan 2 as qasyq krahmal qosyńyz. Arshylǵan apelsındi saqına tárizdi etip týrap, shuńqyr ydysqa arasyna anar dánderin sebe otyryp jáne ystyq apelsın shyrynan quıa otyryp qabattap ornalastyryńyz.

48. Darshyn men bal qosylǵan greıpfrýt

Birneshe greıpfrýtty jýyp, ortasynan bólińiz. Ár jartysyna qońyr qant, darshyn (bir shaı qasyq mólsherinde) seýip, bal quıyńyz. Ony qaǵaz tóselgen tabaǵa ornalastyryp, 200 gradýsqa deıin qyzdyrylǵan peshte 5 mınýt pisirińiz.

49. Shokoladty mandarın bólikter

Ózińiz unatatyn súıikti shokoladyńyzdy sý býynda nemese qysqatolqyndy peshte eritińiz. Mandarındi arshyp, birneshe bólikterin ajyratyńyz. Onyń árqaısyn erigen shokoladqa batyryp alyp usaqtalǵan jańǵaqqa, mysaly badam nemese orman jańǵaǵyna aýnatyp alyńyz. Sýyǵan soń, dastarhanǵa qoıyńyz.

50. Banan qaıyǵy

Bir iri banandy tazalap, ortasyn azdap alyp, kóldeneńnen kesińiz. Ony marshmelloýmen toltyryp, úgitilgen shokolad pen dám qabyq qosyp, bal quıyńyz. Banandy folgamen orap, aldyn ala 200 gradýsqa deıin qyzdyrylǵan peshke 5 mınýtqa qoıyp alyńyz.

---